Եթե կառավարությունը չընդառաջեց, ճանապարհ փակելուց բացի ուրիշ քայլեր էլ կանենք

Գեղարքունիքի մարզի Ծովագյուղ եւ Սեմյոնովկա համայնքի բնակիչները չեն համակերպվել իրենց համայնքների` Սեւան խոշորացված համայնքի մեջ ներառելու փաստի հետ։ Այս գյուղերի բնակիչները, որոնք դեմ էին համայնքների խոշորացմանն ու Սևան համայնքի կազմում ընդգրկվելուն, մեկ մարդու նման չմասնակցեցին 2021 թվականի դեկտեմբերի 5-ի ՏԻՄ ընտրություններին` բոյկոտեցին ընտրությունները: Խոշորացման որոշումը չեղարկելու պահանջով, նրանք մի քանի անգամ ճանապարհ են փակել: Մինչ գյուղացիները փակ էին պահում ճանապարհը, եւ հանդիպում էին պահանջում տարածքային կառավարման և ենթակառուցվածքների նախարար՝ Գնել Սանոսյանի հետ, այդ ընթացքում նախարարությունից պարզաբանում էին, որ վարչատարածքային բաժանման օրենքի համաձայն՝ Ծովագյուղը և Սեմյոնովկան համարվում են խոշորացված համայնք եւ ներառված են Սևան խոշորացված համայնքում` որևէ այլընտրանքային լուծում, տարբերակ չի քննարկվում։

Ի՞նչ են պատրաստվում անել գյուղացիները, որպեսզի հասնեն իրենց նպատակին, հարցրեցինք Սեմյոնովկա համայնքի նախկին ղեկավար Դավիթ Մնացականյանին. «Հիմա ձեւավորվում է աշխատանքային խումբ, 2 գյուղերից ներկայացուցիչներ կլինեն, մոտ 20 հոգի եւ փաստաբանների հետ միասին կառավարության հետ հանդիպում կլինի, որտեղ էլ քննարկելու է 2 համայնքների ճակատագիրը: Դեռ օրը որոշված չի, իսկ մինչ այդ համայնքներում շարունակվելու է այս վիճակը մնալ, համայնքապետարանները չեն աշխատելու: Բնակիչները իրենց պահանջ են ներկայացնելու եւ հետ չեն կանգնելու իրենց պահանջից:

- Կարծում եք, որ Կառավարության հետ հանդիպումը արդյունք կտա՞:

- Դեռ ոչինչ չգիտենք, թե ինչ կլինի, հարցն այն է, որ բնակիչները իրենց ձայնը մինչեւ վերջ պետք է հասցնեն:

Ծովագյուղ համայնքի նախկին համայնքապետ Վահրամ Գևորգյանն էլ պնդում է, որ սա գյուղացիների պահանջն է. «Կներեք ինձ ոչինչ չի հետաքրքրում: Խոշորացում եղավ` միանշանակ չեմ աշխատելու, եթե երկու համայնքները միացան՝ անպայման աշխատելու են»:

- Գյուղացիները Ձեր մասին լավ կարծիք ունեն, նշում են, որ Դուք համայնքի համար ամեն ինչ արել եք:

- Լավ գյուղապետ էի, ամեն բան էլ անում էի: Ինձ ասում են, որ պաշտոնի համար եմ պայքարում, էդ ասողներին պիտի ապացուցեմ, որ պաշտոնի համար միայն իրենք կարող են պայքարել, ես պաշտոնի համար չեն պայքարում:

- Պարո՛ն Գեւորգյան, կմասնակցե՞ք այսօրվա հանրահավաքին:

- (Ծիծաղում է): Չեմ մասնակցում, մյուս հանրահավաքին` նոր կմասնակցեմ:

ՀԳ Նշենք, որ գյուղացիները որոշել են` եթե Կառավարության հետ հանդիպումից հետո ոչ մի բան չփոխվեց, ճանապարհ փակելուց բացի այլ քայլեր եւս կձեռնարկեն: