Եթե կյանքում մի գիրք կարդացած լիներ, գրքերն այս վիճակում չէին լինի

2019 թվականի մի օր Արմավիրի մարզի Ջրառատ գյուղի բնակիչները համայնքային գրադարանը հայտնաբերեցին տակնուվրա եղած: Ինչ-որ մարդիկ ներխուժել էին գրադարան եւ դարակների ամբողջ պարունակությունը դատարկել հատակին: Ակնհայտորեն, ինչ-որ բան էին որոնել: Թե ինչ, բնակիչներն ակնկալում էին իմանալ ոստիկանությունից, որին դիմել էին դեպքից անմիջապես հետո:
Բայց դեպքից երեք տարի է անցել: Իրավիճակը նույնն է, ինչ հազարավոր այլ գործերով․ ոստիկանությունը գործը «քնեցրել» է, ամենայն հավանականությամբ՝ չկարեւորելով գրադարանի վրա հարձակվող մոլագարի բացահայտումը: 

Գրադարանի նկատմամբ ոտնձգությունը չի հուզել նաեւ համայնքի նախկին ղեկավար Սամվել Գալստյանին: Բնակիչների կարծիքով՝ վերջինիս անտարբերությունն է պատճառը, որ ոստիկանությունը գործը տեղից չի շարժում: «Եթե նա կյանքի մեջ գոնե մի գիրք կարդացած լիներ, խիղճը կտանջեր՝ տեսնելով հատակին թափված գրքերը»,- ասաց գյուղապետարանից դուրս եկող տղամարդը:

Հիմա Ջրառատն Արաքս խոշորացված համայնքի կազմում է: Համայնքապետը հարեւան Ջրարբիի գյուղապետ Ղազար Ղազարյանն է: Իսկ Ջրառատի նախկին ղեկավար Սամվել Գալստյանը՝ երբեմնի ոստիկանապետ Լյովա Երանոսյանի զարմիկը, այլեւս պաշտոնազուրկ է: Զրուցակիցս Ջրառատի գորշ կյանքը կապում է Սամվել Գալստյանի վատ կառավարման հետ:

«Միայն իր շահի մասին էր մտածում: Եթե իրենց օբյեկտներից մեկը մտած լինեին, գործը ոստիկանությանն էլ չէր հասի. իրենք իրենցով հարիֆին կգտնեին ու հարցերը կլուծեին: Նրան սկի գյուղն ու գյուղացին չէին հետաքրքրում, էլ ուր մնաց գրադարանի ու գրքի մասին դարդ աներ: Մեր իմացածն այն է, որ գրադարանի գործը ոստիկանությունում է, բայց ոչ մի տեղաշարժ չենք տեսնում: Էդպես էլ անհայտ մնաց՝ ով էր, ինչ էր ուզում էդ գրքերից: Ինչ-որ բա՞ն է փնտրել դրանց մեջ, թե՞ ուղղակի վատություն է արել, չիմացանք: Գոնե թույլ տան՝ գրքերը հատակից հավաքենք, ախր ափսոս են»:

Տղամարդը խոշորացված համայնքի նոր ղեկավարության հետ էլ առանձնապես հույսեր չի կապում: «Մենք սկի մեր համագյուղացուն հետաքրքիր չէինք, հարեւանի՞ն ինչի պիտի հետաքրքրենք: Հետո, կարծում եմ՝ նոր ղեկավարի համար մենք արդեն ընդդիմություն ենք,  որովհետեւ ընտրություններին իրեն ձայն չտվեցինք: Չնայած Երանոսյան Լյովան իր թիմով աշխատում էր Ղազարի օգտին, բայց մեր համայնքը նրան չընտրեց»:

Նկատենք, որ Ջրառատը դեռ վարչական ղեկավար չունի: Խոշորացված համայքի կազմում գտնվող 13 գյուղերի մի մասում Ղազար Ղազարյանը վարչական ղեկավարներ է նշանակել նախկին գյուղապետերին: «Իրեն մերժած Ջրառատը կոկորդին է»,- ասաց զրուցակիցս: