Ագրարային համալսարանը ընդլայնում է միջազգային համագործակցության աշխարհագրությունը

Այսօր՝ հունվարի 14-ին հրավիրված ասուլիսի ժամանակ ՀԱԱՀ ռեկտոր Վարդան ՈՒռուտյանը հակիրճ ներկայացրեց միջազգային համագործակցության ընդգրկուն ծրագրերը: Ըստ այդմ. տարվա ընթացքում համալսարանը կնքել է համագործակցության 13 հուշագիր արտերկրի տարբեր բուհերի եւ միջազգային, ինչպես նաեւ 40 տեղական կազմակերպությունների հետ։ ՀԱԱՀ-ում դասախոսություններով հանդես է եկել 39 մասնագետ՝ եվրոպական տարբեր համալսարաններից: Միջազգային շարժունության ծրագրերի եւ միջազգային վերապատրաստումների են մասնակցել ՀԱԱՀ-ի 63 ուսանող եւ 97 աշխատակից:

Միջազգային գործակցության կարեւորագույն ծրագրերից են Վահենշտեֆան-Թրիսդորֆի կիրառական գիտությունների համալսարանի հետ համատեղ իրականացվող Ագրարային մենեջմենթ մագիստրոսական ծրագիրը, որի շրջանակում 2019-ին ստորագրվել է կրկնակի դիպլոմ տալու վերաբերյալ հուշագիր։

2000թ.-ից գործում է Ագրոբիզնեսի ուսուցման կենտրոնը, որը տալիս է ՀԱԱՀ-ի դիպլոմ եւ ԱՄՆ Տեխասի A&M համալսարանի ավարտական հավաստագիր Ագրոբիզնեսի եւ մարկետինգի բակալավրական ու մագիստրոսական ծրագրերի շրջանակում:

2020թ. կրկնակի դիպլոմ առաջարկելու վերաբերյալ եւս մեկ համաձայնագիր կկնքվի՝ Ագրարային համալսարանի եւ Գերմանիայի Գայզենհայմի համալսարանի միջեւ՝ Երեւանի (EVN) գինու ակադեմիայի Գինեգործության եւ գինու բիզնես երկամյա կրթական ծրագրի շրջանակում։
Վիեննայի Բնական ռեսուրսների եւ բնական գիտությունների համալսարանի (BOKU) հետ իրականացվող «Խթանել օրգանական գյուղատնտեսությունը Հայաստանում» նախագծի շրջանակում ավարտին է հասցվել Օրգանական գյուղատնտեսության մագիստրոսական ծրագրի ուսումնական պլանի մշակումը: Այն կմեկնարկի 2020-2021 ուսումնական տարում: 

ՀԱԱՀ Լրատվության եւ հասարակայնության հետ կապերի բաժին