«Հրապարակ». Խելքներդ գլուխներդ հավաքեք եւ միմյանց հետ լեզու գտեք
Երեւանի ավագանու երեկվա նիստը, որն ընդհատվել էր դահլիճում, ապա դահլիճից դուրս տեղի ունեցած ծեծկռտուքի եւ բռնության պատճառով, երեկ շարունակվեց: Քաղաքապետ Տիգրան Ավինյանն իր խոսքում նշեց, որ բռնության բոլոր դրսեւորումները մերժելի են: Հիշեցնենք, որ երեկ, ավագանու նիստի ժամանակ ավագանու «Հանրապետություն» խմբակցության ղեկավար Անի Խաչատրյանի եւ «Մայր Հայաստան» խմբակցության երկու կին անդամների` Սոնա Աղեկյանի եւ Նարինե Հայրապետյանի միջեւ ծեծկռտուք էր տեղի ունեցել: Տեղի ունեցած միջադեպի մասին մենք զրուցել ենք Երեւանի ավագանու նախկին անդամ Դավիթ Խաժակյանի հետ:
- Ավագանու նիստի ժամանակ բավականին տգեղ միջադեպ տեղի ունեցավ: Ի՞նչ կանխարգելիչ քայլեր կարելի է անել, որ նման միջադեպերը չկրկնվեն: Օրինակ` Ազգային ժողովում կա Էթիկայի հանձնաժողով, որը նման դեպքերում ինչ-որ անելիք ունի` ձայնի իրավունքից են զրկում պատգամավորներին, քրեական գործ հարուցում` անձեռնմխելիությունից զրկում եւ այլն: Ինչպե՞ս է խնդիրը կարգավորվում ավագանիում:
- Ավագանու կանոնակարգով` Երեւանի ՏԻՄ օրենքով նման կարգավորում նախատեսված չէ: Հարցը թողնված է ավագանու անդամների վարքագծի կանոնների վրա: Իրավական գործընթաց, որպես այդպիսին, կարող են, իհարկե, նախատեսել, սակայն դրանք օրենքի նախատեսումով չեն:
- Այսինքն` ավագանու անդամները կարող են իրար ծեծել-ջարդել, ջրել, մազ քաշել, սեռական բնույթի հայհոյանքներ տալ եւ առա՞ջ անցնել:
- Այո, ըստ էության, իրավիճակն անգամ էթիկայի կանոններին չի վերաբերում, այլ նրան, որ մեծամասնությունն անգամ չունի սեփական քվորում: Այսինքն` իշխանությունն ամեն անգամ պետք է ունենա ընդդիմադիր ուժերի աջակցությունը, որպեսզի կարողանա ինչ-որ հարց անցկացնել: Այս պայմաններում նրանք դատապարտված են կա՛մ իրար հետ լեզու գտնել, կա՛մ էլ` աշխատել ոչ արդյունավետ: Մենք տեսնում ենք, որ Երեւանի ավագանիում պարբերաբար քվորման խնդիր է առաջանում:
- Այսինքն` անգամ չե՞ն կարող ավագանու անդամին զրկել մանդատից, եթե իրեն պահում է ոչ քաղաքակիրթ ձեւով:
- Ավագանուն մանդատից կարող են զրկել միայն այն դեպքում, երբ անհարգելի բացակայությունները գերազանցում են: Մնացյալ դեպքերում չեն կարող: Ողջ խնդիրն այն է, որ մեծամասնությունը չունի մեծամասնություն:
- Իսկ եթե մեծամասնություն լիներ, կարո՞ղ էր այս առումով ինչ-որ բան փոխել:
- Եթե մեծամասնություն ունենար, հարցը կարող էր այլ հարթության մեջ դիտվել: Այդ դեպքում ընդդիմությունը կլիներ կառուցողական, բայց հիմա իրավիճակն այնպիսին է, որ իշխող ուժն առանց ընդդիմության աջակցության ոչինչ անել չի կարող: Ընդդիմության նկատմամբ սանկցիաներ կիրառել չի կարող, որովհետեւ ընդդիմությունն էլ կարող է ասել, որ նիստերին չի մասնակցի: Նիստի անհրաժեշտ իրավազորությունն այդկերպ չի ապահովվի:
- Երեւանի ավագանու ամբիոնից հնչող գրեթե բոլոր ելույթները քաղաքական են, այլ ոչ թե քաղաքային: Սա նորմա՞լ է:
- Այո, նորմալ է, քանի որ քաղաքացիների ընտրությունը եղել է քաղաքական, ոչ թե քաղաքային: Կան ուժեր, որ անգամ քաղաքային ծրագիր չեն ներկայացրել, օրինակ` «Մայր Հայաստանը»: Նրանք հանդես են եկել իշխանափոխության օրակարգով: «Մայր Հայաստանն» իր ընտրողներին չի էլ խոստացել քաղաքային ծրագրեր իրականացնել: «Հանրապետություն» կուսակցությունն էլ ընտրություններին մասնակցում էր ՀԱՊԿ-ին անդամակցությունը դադարեցնելու համար: Այս ավագանին քաղաքային խնդիրներով զբաղվելու պարտավորություն չունի: Ես բոլորին կասեմ, որ խելքները գլուխները հավաքեն եւ միմյանց հետ լեզու գտնեն ու զբաղվեն քաղաքային զարգացման տրամաբանությունը զարգացնելու ուղղությամբ կամ էլ ինքնարձակվեն:
Կարծիքներ