Իրանը մտահոգ է, որ Թուրքիայի դիրքերը կարող են ուժեղանալ մեր տարածաշրջանում․ իրանցի քաղաքագետ

Իրանը միշտ հայտարարել է, որ դեմ է երրորդ կողմերի ներկայությանը տարածաշրջանում․ դա կբերի հակասությունների խորացման և շահերի բախման, տարածաշրջանը կդառնա գերտերությունների, ուժային կետնրոնների բախման թատերաբեմ և դա Իրանին մտահոգում է։ «Հրապարակի» հետ զրույցում ասաց իրանցի քաղաքագետ Փույա Հոսսեյնին։
«Իրանին մտահոգում է նաև այն, որ այլ ուժերի ներկայությունը կարող է վտանգ ստեղծել Իրանի անվտանգության համար և տարածաշրջանում իրենց ներկայությունն օգտագործել Իրանի դեմ։ Իրանն անհանգիստ է նաև այն հանգամանքից, որ այդ ուժերը կարող են ամրապնդել Թուրքիայի դերն այս տարածաշրջանում»,-ասաց Հոսսեյնին։

Դա Իրանի շահերի դեմ է, ու այստեղ համընկնում են նաև Հայաստանի ու Իրանի շահերը, որովհետև հայկական պետական ու ազգային շահին հակասում է մեր տարածաշրջանում Թուրքիայի դերի մեծացումը, ինչը լուրջ անվտանգային խնդիրներ է ստեղծելու։ Սրանով է պայմանավորված այն, որ Իրանը միշտ դեմ է արտահայտվում արտատարածաշրջանային ուժերի ներկայությանը տարածաշրջանում։ Հոսսեյնին շեշտում է, որ երբ Իրանն ասում է, որ տարածաշրջանի երկրները պետք է մեր տարածաշրջանի խնդիրները լուծեն, ամենևին չի նշանակում, որ այդ խնդիրները պետք է լուծեն Թուրքիան կամ Ադրբեջանը, Իրանն այդպես հայտարարելով՝ նկատի ունի հենց իր դերը՝ անվնտանգային հարցերը լուծելու տեսանկյունից։

«Իրանը ցույց է տվել այս տարածաշրջանում անվտանգային հարցերում իր դերակատարությունը, նույն Զանգեզուրի միջանցքի ծրագրի իրականացման չեզոքացումը և բոլորը խոստովանում են այդ մասին։ Նաև Էրդողանը հարցազրույցներից մեկում ինքն է խոստովանել, որ եթե Իրանը չլիներ՝ Զանգեզուրի միջանցքը իրականություն կդառնար և Իրանը մեծ խոչընդոտ է հանդիսացել դրա իրականացման ճանապարհին», նշեց իրանցի քաղաքագետը։
Եւ այդ հարցում մեծ դեր են խաղացել Իրանի զորավարժություններն ու զորքերի առկայությունը Ադրբեջանի հետ սահմանին։ Հենց Իրանն է, որ մեր տարածաշրջանում կարող է անվտանգային երաշխավորի դեր ստանձնել ու ապահովել տարածաշրջանի անվտանգությունը, կայունությունը՝ համոզված է իրանցի քաղաքագետը։