Ալեքսանդր Նավալնին ԿԸՀ նախագահի հետ հանդիպման կուղարկի իր իրավաբաններին

ՌԴ ԿԸՀ նախագահ Էլլա Պամֆիլովան կհանդիպի ՌԴ նախագահի ընտրություններին մասնակցելու մերժում ստացած Ալեքսանդր Նավալնու թիմի ներկայացուցիչների հետ: Այս մասին հայտնում է РБК-ն` հղում կատարելով ԿԸՀ և ընդդիմադիր գործչի շտաբի մամլո ծառայություններին:



«Պամֆիլովան Նավալնուն և նրա գործընկերներին հրավիրել է հանդիպման: Նրանք հաստատել են, որ կներկայանան այդ հանդիպմանը»,- հայտնում է ԿԸՀ-ն: Ընդդիմադիր ճամբարից հայտնել են, որ հանդիպումը նշանակված է մարտի 15-ին, ժամը 16-ին, սակայն Նավալնին հանդիպմանը չի գա: Նրա փոխարեն հանդիպմանը կմասնակցեն շտաբի իրավաբանները:



Նշենք, որ օրերս Ալեքսանդր Նավալնին ԿԸՀ-ին մեղադրել էր ՌԴ նախագահական ընտրություններում «մեծ խաբեություն» նախապատրաստելու մեջ: Նրա խոսքով` «ԿԸՀ աշխատակիցները, ներառյալ հանձնաժողովի նախագահ Պամֆիլովան մի քանի միլիոն ձայն կնետեն հրապարակ, որպեսզի ցույց տան ընտրողների` Պուտինին վայել մասնակցություն»:



Նավալնու այս հայտարարությունից հետո Պամֆիլովան նրան առաջարկել է հանդիպել, ինչին ի պատասխան Նավալնին իր բլոգում պատմել էր Կալինինգրադի իր շտաբում անցկացված խուզարկության մասին, որի ժամանակ այնտեղ քվեաթերթիկներ են հայտնաբերել:



2017թ. դեկտեմբերի վերջին Գերագույն դատարանը մերժել էր Նավալնու բողոքն ընդդեմ ԿԸՀ-ի` ՌԴ նախագահի ընտրություններում իր թեկնածությունը չգրանցելու համար: Դատարանը հաստատել էր, որ Նավալնին չի կարող մասնակցել ընտրություններին` դատվածության չմարված ժամկետ ունենալու պատճառով: Ընդ որում ԿԸՀ-ն հայտարարել էր, որ թեկնածությունն առաջադրելու Նավալնու փաստաթղթերը կարգին են: