Իմ կեցվածքն ինձ ձեռ ա տալիս
-Ֆորշ, նախընտրական շրջան է, եւ շատ երգիչ-երգչուհիներ անդամագրվում են այս կամ այն կուսակցությանը, ո՞նց եք նայում այդ փաստին:
- Ոչ մի ձեւ էլ էդ ամեն ինչին չեմ նայում, ես հեռու եմ դրանից:
- Դուք նման մտադրություն չե՞ք ունեցել երբեւէ:
- Չէ, իմ կուսակցությունը երաժշտությունն է, ազիզ ջան:
- Առաջարկնե՞ր էլ չեն եղել կուսակցություններից:
- Ի՞նչ՝ մտնել կուսակցական շարքե՞ր:
- Այո:
- Աբսալյուտնը:
- Բայց, օրինակ, Շուշան Պետրոսյանն ուզում է փոխել մշակութային դաշտում տիրող իրավիճակը, դրա համար անդամագրվել է արդեն ՀՀԿ-ին: Ձեզ մոտ նման ցանկություն չկա՞:
- Եթե Շուշանը կարա անի՝ լավ ա, ես մենակ ուրախ եմ:
- Դուք մասնակցություն չե՞ք ուզում ունենալ:
- Չէ, ես քաղաքականությամբ չեմ զբաղվում:
- Քաղաքականությամբ չեք զբաղվում, բայց ի՞նչն է խանգարում Ձեզ մասնակցություն ունենալ Մաշտոցի պուրակի համար մղվող պայքարում, այս մեկ ամսվա ընթացքում շատ ճանաչված արվեստագետներ իրենց ներկայությամբ աջակցեցին բնապահպաններին: Ձեզ բնապահպանական խնդիրները չե՞ն հետաքրքրում:
- Ես դրան մասնակցել եմ նրանով, որ էդտեղ հավաքված էրեխեքն իմ երգն էին երգում:
- Բայց դա ամեն դեպքում Ձեր մասնակցությունը չի:
- Բա ի՞նչ ա, բա ո՞վ ա էդ երգը հորինել:
- Ձեր մասնակցությունը կլիներ, եթե անձամբ գնայիք ու այնտեղ նրանց հետ երգեիք:
- Էդպես ավելի օրիգինալ ա:
- Այսինքն չեք գնում, որովհետեւ մտածում եք, թե արդար չի՞ բնապահպանների պահանջը:
- Չեմ մասնակցում ոչ թե որ ինչ-որ բան եմ մտածում, այլ ժամանակս չի ներում:
- Բայց պայքարը մի քանի օր չէ, որ սկսվել է, արդեն մեկ ամիս է՝ բնապահպաններն այգում են:
- Ցավդ տանեմ, ես զբաղված եմ, ես առավոտը մտնում եմ ստուդիա, գիշերը նոր դուրս եմ գալիս:
- Բոլոր դեպքերում կրավորական կեցվածք եք ընդունել: Երեւանի մասին անվերջ երգում եք, Երեւանին նվիրված ձայնասկավառակ թողարկում, իսկ Երեւանը վերջին մեկ ամսում կենտրոնացած է Մաշտոցի պուրակում, որտեղ Դուք ոչ մի անգամ չեկաք:
- Ամեն մարդ իրա գործը պիտի անի, ես իմ գործն եմ անում:
- Ձեր գործն այս դեպքում միայն երգե՞լն է:
- Այս դեպքում չէ՝ ընդհանրապես, կյանքում:
- Չե՞ք կարծում, որ մշակութային գործիչը պետք է նաեւ քաղաքացիական կեցվածք դրսեւորի:
- Իմ կեցվածքն ինձ ձեռ ա տալիս:
- Այսինքն Ձեզ չի՞ մտահոգում, թե Ձեր ունկնդիրներն ինչ կմտածեն Ձեր մասին:
- Իմ մասին ով որ մտածում ա, էն էլ գիտի, թե ինչ ա մտածում, լավ, էլի, ժամանակ չունեմ, ֆսյո...
Այստեղ Ֆորշն անջատեց հեռախոսը, նորից զանգահարեցի եւ փորձեցի պարզել, թե ինչո՞ւ:
- Ներվայնացնում ես դու ինձ արդեն, ինչ տարօրինակ հարցեր ես տալիս:
- Բայց ի՞նչն է տարօրինակ, Դուք վրդովվեցիք, բայց տարօրինակ բան չկա, պարզապես հետաքրքիր է, ասացիք՝ Ձեր կուսակցությունը երաժշտությունն է, եթե այդպես է, ինչո՞ւ չեք գնում Ձեր երգով սատարեք բնապահպաններին, գուցե խանգարում է այն, որ երգում եք նաեւ՝ «տղերքը հանրապետական»:
- Ինձ ոչ մի բան չի խանգարում, ես որտեղ ուզում եմ, էնտեղ էլ երգում եմ, արի «Պապլավոկ»՝ կլսես:
- Գալիս եմ ու լսում եմ, բայց ուզում եմ իմանալ՝ Ձեր իշխանամետ կեցվածքը Ձեզ խանգարո՞ւմ է քաղաքացիական կեցվածք ունենալ:
- Ես ոչ մի կեցվածք էլ չեմ դրսեւորում, ու ինձ ոչ մի բան էլ չի խանգարում:
- Ամեն դեպքում, քաղաքապետը հանրապետական է, իսկ Դուք երգում եք «տղերքը հանրապետական», գուցե չե՞ք ուզում նրան դեմ դուրս գալ՝ հայտնվելով Մաշտոցի պուրակում:
- Ո՞վ ա ասում, որ ես նրանց դեմ եմ դուրս գալիս:
- Բա էդ դեպքում ինչո՞ւ չեք գնում Մաշտոցի պուրակ:
- Որովհետեւ ժամանակ չունեմ:
- Մինչդեռ Ձեր ներկայությունը շատերին կոգեւորեր, առավել եւս, որ բնապահպաններն աջակցության համար զանգահարել էին Ձեզ. այս մեկ ամսվա մեջ ժամանակ չգտնվե՞ց:
- Ժամանակ չունեմ, ես առավոտից իրիկուն ձայնագրությունների մեջ եմ, հետո որ ասում ես՝ երգերը սիրում են, լսում են, այ հիմա դա եմ անում, որ հետո նոր բաներ լսեք, հասկացա՞ր:
- Հասկացա, բայց Երեւանը «Պապլավոկում» չի ամփոփվում մենակ:
- Ազիզ ջան, որտեղ որ ամփոփվում ա, քեզանից մի քիչ լավ գիտեմ երեւի... թեման փակեցինք:
Կարծիքներ