Օսկանյանի վերաբերյալ խուսափում են խոսել

Լուրերը, որ ԲՀԿ անդամ, նախկին արտգործնախարար Վարդան Օսկանյանի շուրջ հյուսվող պատմությունը եւ նրան պատգամավորական անձեռնմխելիությունից զրկելու գործընթացը ՀՀԿ-ականների մեծամասնության սրտով չի եղել, կարծես թե անհերքելի է դառնում: ՀՀԿ-ականները, որոնք հարգելի պատճառներով չեն մասնակցել նախորդ շաբաթվա հայտնի իրադարձություններին, այժմ Օսկանյանի գործի վերաբերյալ կամ հրաժարվում են տեսակետ հայտնել, կամ էլ բավականին լղոզված են դրանք ներկայացնում, քանի որ, ինչպես ասում են, վտանգն արդեն անցել է:



Օրերս Հայաստան վերադարձած ԵԽԽՎ հայկական պատվիրակության ղեկավար ՀՀԿ-ական Դավիթ Հարությունյանը, ով նաեւ ԱԺ պետաիրավական հարցերով հանձնաժողովի նախագահն է, երեկ հրաժարվեց գնահատական տալ կամ կարծիք հայտնել այս մասին՝ պատճառաբանելով, թե ներկա չի եղել խորհրդարանի քննարկմանը եւ մանրամասն ծանոթ չէ հանգամանքներին: Պատվիրակության մյուս ՀՀԿ-ական ներկայացուցիչ, ԱԺ փոխխոսնակ Հերմինե Նաղդալյանն էլ մեզ հետ զրույցում կոնկրետ պատասխան չտվեց, թե ինքը կողմ կքվեարկե՞ր Օսկանյանին անձեռնմխելիությունից զրկելու քվեարկությանը, եթե Հայաստանում լիներ եւ մասնակցեր: Մեր զրույցը տիկին Նաղդալյանի հետ:



 



- Տիկին Նաղդալյան, քանի որ Դուք ներկա չեք եղել Օսկանյանի վերաբերյալ ԱԺ ներկայացված միջնորդագրի քննարկմանը, հետաքրքիր է լսել նաեւ Ձեր տեսակետը: Ճի՞շտ եք համարում Օսկանյանին անձեռնմխելիությունից զրկելը, երբ շատերը, ինքը՝ Օսկանյանը հայտարարեցին, որ սա քաղաքական հետապնդում է:



 



- Որպես կոլեգա, որպես գործընկեր, որին շատ-շատ հարգում եմ (ես պարոն Օսկանյանին մեծ հարգանքով եմ վերաբերվում), բնականաբար, ցավ եմ ապրում, որ նման գործընթաց կա: Իմ դիրքորոշումն էնպիսին է, ինչպիսին իմ կուսակցությանը, այնտեղ էլ որեւէ մեկը չկա, որ կանխամտածված կամ արհեստական ինչ-որ  վարկածով է մոտենում պարոն Օսկանյանի գործին: Կարծում եմ՝ բոլորս ուղղակի շահագրգիռ ենք, որ խնդիրը հնարավորինս շուտ պարզաբանվի, կնճիռ է, ու պիտի հարթվի: Եվ, իմ կարծիքով, պարոն Օսկանյանն այն մարդն է, որը պիտի կարողանա բոլոր բացատրությունները ներկայացնել, որպեսզի այս խնդիրը լուծում ունենա, ու, կարծում եմ, բոլորս դրանում պետք է շահագրգիռ լինենք:



 



- Տարօրինակ չե՞ք համարում, որ միայն Ձեր խմբակցությունն է դրանում շահագրգիռ, քանի որ խորհրդարանական բոլոր խմբակցությունները բոյկոտեցին այդ քվեարկությունը՝ Օսկանյանի պատմությունը համարելով քաղաքական հետապնդում:



 



- Տարօրինակ չեմ համարում, քաղաքական դիրքորոշումների խնդիր է, եւ ամեն քաղաքական ուժ իր դիրքորոշումը բացատրում է: Ես կարծում եմ՝ այն ուղին, որը բռնել է մեր կուսակցությունը, այդ ուղուն համահունչ է խնդիրը, եւ եթե կա որեւէ կասկած, ապա այս կասկածը թող բացահայտվի եւ ավարտվի:



 



- Այսինքն, եթե ներկա լինեիք քվեարկությանը, նույնպե՞ս հանգիստ խղճով կողմ կքվեարկեիք Օսկանյանին անձեռնմխելիությունից զրկելուն:



 



- Նիստին ներկա չեմ եղել եւ ծանոթ չեմ մանրամասներին, այն արգումենտներին, որոնք բերվել են գլխավոր դատախազի կողմից, բայց, այնուամենայնիվ, կուզենայի, որ որեւէ մեկի մոտ որեւէ կասկած չմնար, ու դա թող լինի բոլորի պարագայում:



 



- Ձեր կուսակիցներից շատերն են այս առիթով դժգոհություններ հայտնել եւ դեմ եղել գործընթացին՝ հասկանալով, որ սխալ են վարվում, եւ իրենց շարքերում ցանկացածի դեմ կարող է նման գործընթաց կիրառվել:  Դուք համաձայն չե՞ք այդ տեսակետին:



 



- Այդ հարցն իրենց տվեք:



 



- Իսկ եթե պարզվի, որ Օսկանյանը մեղավոր չէ, Ձեր կարծիքով, ո՞վ է արժանի պատժվելու:



 



- Կարծում եմ՝ այդ հարցին պարոն Հովիկ Աբրահամյանն ասել է, շատ ճիշտ մոտեցում է, եւ պատասխանատվության մշակույթը, թերեւս փոքր բացառությամբ, բոլոր ոլորտներում պետք է կիրառվի:



 



ՀԳ - Հիշեցնենք, որ ԱԺ նախագահ Հովիկ Աբրահամյանն ասել է. «Եթե իրոք Վարդան Օսկանյանը մեղավոր չլինի, պատասխան են տալու այն մարմինները, որոնք այդ գործընթացը սկսել են»: