Այն, ինչ ասել եմ, ՀԱԿ-ը նոր-նոր է անում
hraparak
18 Ապրիլ 2013 | 06:49
0
Ղարաբաղյան պատերազմի «Սասուն» ջոկատի հրամանատար, 2008-2011 թթ. քաղբանտարկյալ, ՀԱԿ ակտիվ գործիչ Սասուն Միքայելյանը ներկա չէր ՀԱԿ համագումարին: Միքայելյանն ասում է, որ իրեն հրավիրել են, պարզապես առողջական խնդիրների պատճառով ինքը չի ներկայացել: Հիշեցնենք, որ նախագահական ընտրություններին ընդառաջ, երբ հայտնի դարձավ, որ Լեւոն Տեր-Պետրոսյանը չի մասնակցում ընտրություններին, Միքայելյանը հանդես եկավ քննադատական հոդվածով:«ՀԱԿ-ի կողմից վերջին մեկ տարվա ընթացքում իրականացված քաղաքականությունը ես ճիշտ չեմ համարում։ Ի սկզբանե անհեռանկար քաղաքագիտական վերլուծությունն ու դրան հաջորդած անհեռատես քաղաքական սիրախաղերը, համաժողովրդական պայքարի հստակ նախանշված ուղուց շեղումը եւ անհասկանալի ինտրիգների մեջ մտնելը, ի վերջո, բերել են նրան, որ առաջիկա քաղաքական ամենակարեւոր միջոցառմանը` նախագահական ընտրություններին, մոտենում ենք գրեթե ամայացված քաղաքական դաշտով։ Փաստորեն այն, ինչը հալածանքներով, բանտարկություններով ու այլ բիրտ մեթոդներով վերջին չորս տարիների ընթացքում չկարողացան անել իշխանությունները, ՀԱԿ-ի ղեկավարությունն ընդամենը մեկ տարվա ընթացքում իրականություն դարձրեց»,- իր հոդվածում մասնավորապես նշել է Միքայելյանը: Ի՞նչ է մտածում Սասուն Միքայելյանը հիմա, վերջնականապես խզե՞լ է կապը ՀԱԿ-ի հետ. այս եւ այլ հարցերի շուրջ զրուցեցինք ԱԺ նախկին պատգամավորի հետ:
- Պարոն Միքայելյան, արդյո՞ք առողջական խնդիրներն են եղել պատճառը համագումարին չներկայանալու, խոսվում է, որ կասեցրել եք Ձեր հարաբերությունները ՀԱԿ-ի հետ, Դուք եւս մի տեսակ նեղացած կերպարի մեջ եք վերջին տարում:
- Ինձ ոչ մեկ չի նեղացրել, նման բան չկա: Շփվում եմ Կոնգրեսի հետ, հինգ տարին քիչ ժամանակ չի, ես ո՞նց կարող եմ չշփվել: Իհարկե, մարդիկ կան, որոնց հետ չեմ շփվում, թաքցնելու բան չկա (անուն չեմ տա, բայց էդպես է):
- Փաստորեն, ՀԱԿ-ը նոր կուսակցությունով է քաղաքական ասպարեզ մտնում, Դուք ի՞նչ կարծիք ունեք այդ կուսակցության մասին, եւ հնարավո՞ր է Դուք էլ անդամագրվեք:
- Ոչ, հնարավոր է դառնամ համակիր, օգնեմ ՀԱԿ-ին, բայց հաստատ չեմ մտնի կուսակցություն:
- Պարոն Միքայելյան, Ձեր քննադատական հոդվածով ցույց տվեցիք հիասթափությունը շարժման առաջնորդների նկատմամբ, հիմա նորից հույսե՞ր են արթնացել Ձեր մեջ, պատրաստ եք նորի՞ց պայքարել, աջակցել:
- Կա՞ աշխարհի տակ որեւէ մարդ, որ համաժողովրդական շարժումից հիասթափվի, հուսահատվի, ես գնացել եմ, ժողովրդի կողքին եմ կանգնել, ո՞նց կարող եմ ժողովրդից հիասթափվել:
- Ասացի՝ շարժման առաջնորդներից, որոնց գործունեությունը քննադատել էիք նաեւ Ձեր հայտնի հոդվածում:
- Ես ընդամենը այդ ժամանակահատվածում իմ գնահատականն եմ տվել:
- Պարոն Միքայելյան, ուզում եք ասել, որ նորից պայքարելո՞ւ եք ՀԱԿ-ի կողքին, իրենք հայտ են ներկայացրել Երեւանի ավագանու ընտրություններին եւ ասել են, որ իշխանափոխությունն սկսելու են Երեւանից: Աջակցելո՞ւ եք ՀԱԿ-ին:
- Հատկապես, որ Խաչատրյան Վահագն է համամասնական ցուցակի առաջին հորիզոնականում, ես, իհարկե, օգնելու եմ Վահագին՝ որպես նախկին լավ քաղաքապետի եւ նորմալ, բանիմաց մարդու:
- ՀԱԿ համագումարի ժամանակ Լեւոն Տեր-Պետրոսյանը կրկին գովեստի խոսքեր շռայլեց Գագիկ Ծառուկյանի հասցեին եւ նրա հետ համագործակցության առաջարկը հիմնավորեց Խաչատուր Սուքիասյանի օրինակով, այն է՝ իբր վերջինն էլ 2008թ. օլիգարխ էր, եւ իրեն հաջողվեց Սուքիասյանին անջատել իշխանություններից: Դուք համաձա՞յն եք այս համեմատության հետ, կիսո՞ւմ եք Տեր-Պետրոսյանի կարծիքը:
- Ես իմ կարծիքն ունեմ, հարցը կարող եք ուղղել Տեր-Պետրոսյանին:
- Պարզապես Սուքիասյանը որոշ իմաստով Ձեր բախտակիցն է, Դուք աշխատում էիք նրա հետ նույն խորհրդարանում, տեղի՞ն է համեմատությունը նրա եւ Ծառուկյանի:
- Բայց ինչո՞ւ եմ Սուքիասյանի բախտակիցը, ի՞նչ կապ ունի Ձեր ասածը, ես կանգնել եմ իմ ժողովրդի կողքին, ես պայքարել եմ, որ երկրում հաստատվի սահմանադրական կարգը, իրավունքը, բնական է՝ հիմա էլ պայքարելու եմ, պայքարը չի ավարտվել, չի էլ ավարտվելու, քանի երկիրն այս վիճակի մեջ է: Քանի իմ երկրից այսպիսի դաժան արտագաղթ է տեղի ունենում:
- Պարոն Միքայելյան, նկատի ունեի՝ Սուքիասյանն այն որակի պատգամավոր էր, ինչպես հիմա Ծառուկյա՞նն է:
- Ես այդ հարցին չեմ պատասխանի, ես չեմ կարող այդ հարցով իր հետ կարծիք կիսել…
- Դուք կարծես դեմ էիք ԲՀԿ-ի հետ ՀԱԿ համագործակցությանը, կուսակցական համագումարում Տեր-Պետրոսյանի խոսքից ենթադրվում է, որ համագործակցության հարցը դեռ փակված չէ ԲՀԿ-ի հետ…
- Ես դեմ չէի, եթե նման իրավիճակ է երկրում ձեւավորվել… Ես ասել եմ եւ պատրաստ եմ նորից կրկնել՝ պարզապես մենք, որպես համաժողովրդական շարժում առաջացրած ուժ, նման կարգավիճակում չպետք է հայտնվեինք եւ պետք է նորմալ մասնակցեինք նախագահական ընտրություններին, եթե տարիքն էր պատճառը, ապա ես ասել եմ, որ այս ամեն ինչը կարելի էր անել մի քանի տարի առաջ, նորմալ ընդդիմություն ձեւավորել եւ մասնակցել: Թող պարտվեինք, հոգ չէր, բայց ես գերադասում էի, որ, իբրեւ նորմալ ընդդիմադիր, պետք է անպայման մասնակցեինք նախագահական եւ ընդհանրապես համապետական բոլոր ընտրություններին:
- Ազատության հրապարակում այժմ կարծես թե նորից շարժում է ծավալվում, մարդիկ Րաֆֆի Հովհաննիսյանի գլխավորությամբ վիճարկում են նախագահական ընտրությունների արդյունքները, Դուք ասում եք, որ միշտ պատրաստ եք ժողովրդի հետ պայքարելու, երբեւէ եղե՞լ եք Ազատության հրապարակում, ինչպե՞ս եք գնահատում այս շարժումը:
- Ես Ազատության հրապարակ չեմ եկել, բայց ես մարտի 1-ին ելույթ եմ ունեցել եւ ասել եմ՝ որտեղ ժողովուրդն է, ես այնտեղ եմ, եւ կապ չունի, թե ով է այդ շարժման առաջնորդը: Բայց այսօր, եթե նկատել եք, նոր մշակույթ է ձեւավորվել, ոչ թե ժողովուրդն է գնում լիդերի հետեւից, այլ, իրավիճակից ելնելով, ժողովուրդն է ընտրում լիդերին: Եվ դրա համար եմ ասում (ինչի մասին նաեւ հայտնի հոդվածում եմ գրել), որ կարելի էր 1-2 տարի առաջ նորմալ ընդդիմություն ձեւավորել, եթե չէր ստացվում իրականացնել իշխանափոխություն եւ մնալ նորմալ ընդդիմադիր ուժ ու կայացնել այն, ինչն ավելի օգտակար կլինի մեր պետության ու ժողովրդի համար, ու կարելի էր 1-2 տարի առաջ արժանի փոխարինող ասպարեզ բերել եւ մասնակցել նույն նախագահական ընտրություններին: Այսինքն այն, ինչը որ հիմա է ՀԱԿ-ն անում: Մինչդեռ ՀԱԿ-ը երկու տարի առաջ ավելի հզոր էր, ավելի մեծ էր հավատը նրա նկատմամբ, եւ համաժողովրդական շարժումն էլ իր գագաթնակետին էր հասել: Ստացվում է՝ այն, ինչը որ ես ասել եմ, նոր-նոր է արվում:
- Այսինքն՝ Դուք դեռ հույսեր ունեք, որ ՀԱԿ-ը, ի դեմս նոր կուսակցության եւ նոր լիդերի, նորից ժողովրդական ընդվզման հզոր ալիք կբարձրացնի:
- Ես չգիտեմ ով ինչ ալիք կբարձրացնի, մի բան կարող եմ վստահ ասել, որ ես դեմ եմ այս իշխանություններին, դեմ եմ ձեւավորված իշխանական մոնոլիտ բուրգին: Պետք է իշխանությունից մի բան պոկել, այլեւս հնարավոր չէ այսպես, դրա համար է, որ Երեւանի քաղաքապետի ընտրություններին ես մեծ նշանակություն եմ տալիս: Եթե քաղաքապետի պաշտոնում ՀՀԿ-ական չլինի, հնարավոր է ինչ-որ բան երկրում փոխել: Ես այս տարիների ընթացքում ձգտել եմ, որ երկրի այս վիճակը փոխվի, որ հայն իր երկրում իրեն հայ ու մարդ զգա, իր երկրի տերն զգա, չփախչի այստեղից, այլ աճի, բարգավաճի: Ես 88 թ. մինչ օրս շարժման ակունքներում եմ, եւ էնպես չի, որ պահի տակ եմ այսօր այս տեղում հայտնվել: Ես ինձ իրավունք եմ վերապահում նման բաներ ասելու, որովհետեւ իմ սիրտը ցավում է, ես էլ եմ այս երկիրը կառուցել, բանակաշինության, մեր պետության, պետականության ձեւավորման մեջ, պատերազմում ես մեծ ներդրում եմ ունեցել եւ այսօր ուզում եմ արդյունքը տեսնեմ: Մինչդեռ այսօր երկիրը բաժանվել է երկու մասի՝ նոր եւ հին հայեր են ձեւավորվել: Մարդիկ, որոնք երկրում ոչինչ չեն արել, հիմա իրենք են իշխում երկրին, իհարկե, կան քչերը այդ ավանդ ունեցողներից, որոնք իշխանության համակարգում ստիպված են մնացել եւ ընդամենը հացի խնդիր են լուծում:
- Ասում եք՝ Երեւանի գրավումով էլ է հնարավոր որոշակի փոփոխություններ իրականացնել, Ձեր կարծիքով, քաղաքական ուժերից ո՞րն է այսօր ի զորու ՀՀԿ-ի դեմ լուրջ հայտ ներկայացնել, ՀԱ՞Կ-ը:
- ՀԱԿ-ԲՀԿ-ՀՅԴ միավորը, եթե, իհարկե, նորից խաղեր չլինեն:
- Իսկ «Ժառանգությո՞ւնը»:
- Այո, նաեւ «Ժառանգությունը», բայց չեմ կարծում, որ «Ժառանգությունը» որեւէ ուժի կողքը կկանգնի ընտրություններին կամ դրանից հետո: Տա աստված, որ ինքն էլ միանա, բայց ես այդ լավատեսությունը չունեմ:
- Կարծես լուրջ չեք վերաբերվում Րաֆֆի Հովհաննիսյանի պայքարին:
- Րաֆֆի Հովհաննիսյանի հանդեպ ոչինչ չունեմ, շատ լուրջ եմ վերաբերվում, բայց ես… ինչ-որ բաներ էլ ես եմ հասկանում եւ այդ պատճառով հրապարակ չեմ եկել: Որովհետեւ չեմ հասկանում, թե Րաֆֆի Հովհաննիսյանն ուր է տանում շարժումը, բայց միշտ պատրաստ եմ կանգնել նրա կողքը, եթե ռեալ քայլեր անի:
- Իսկ մյուս ճակատի՝ ՀԱԿ-ԲՀԿ-ՀՅԴ հանդեպ վստահությունն ինչո՞վ է պայմանավորված, մանավանդ, որ Ձեր տառապանքը փորձ ունի…
- Վստահությունը ո՞րն է: Ով ինչ կեղծիք արել է… բայց եթե ուզում են բան փոխվի, պետք է միանան, տա աստված, որ միանան, որովհետեւ ոչ մեկը չի կարող միայնակ բան փոխել, միայնակ գնալ ընտրության եւ հաղթել: Դրա համար եմ ես գերադասում, որ այս ուժերը կոալիցիա կազմեն:
- Անկեղծ ասեք, հավատո՞ւմ եք, որ ԲՀԿ-ն իսկապես պայքարում է ՀՀԿ-ի դեմ եւ կմիավորվի մյուս ուժերին:
- Չեմ կարող ասել, ժամանակը ցույց կտա, բան չի մնացել:
Կարծիքներ