Դիլիջանում կբացվի Արքայազն Չարլզի ծառուղի

Արմեն Սարգսյանի բարեգործական «Երեւան, իմ սեր» նախաձեռնության հրավերով Հայաստան այցելած Արքայազն Չարլզին պատվին Տավուշի մարզի Դիլիջան քաղաքում կհիմնվի ծառուղի, ուր կտնկվեն 65 չինարի:



 



 



Դիլիջանի միջազգային դպրոցից տեղեկացանք, որ ծառուղու հավաստագիրը արքայազնին է հանձնվել մայիսի 28-ին` Մատենադարան այցելության ժամանակ: Մատենադարանի ձեռագրերի հավաքածուին ծանոթանալուց հետո Արքայազն Չարլզին ներկայացվել է Դիլիջանի միջազգային դպրոցը, որը 2014 թվականի սեպտեմբերին կբացի իր դռները առաջին աշակերտների համար:



 



Գիտելիքի ծառ համարվող չինարին Դիլիջանի միջազգային դպրոցի խորհրդանիշն է: Ծառուղու բացման հավաստագիրը Նորին Արքայական Մեծություն Ուելսի արքայազնին են հանձնել  Դիլիջանի միջազգային դպրոցի հիմնադիրներ Վերոնիկա Զոնաբենդին եւ Ռուբեն Վարդանյանը: