Հիշողություններ վարքագրության մասին
Խանջյան փողոցի վրա տաքսի եմ վերցնում, վարորդին խնդրում եմ.
- Գնանք Քանաքեռի հիվանդանոց:
- Էդ ո՞րն ա:
- Միքայելյան հիվանդանոց՝ Քանաքեռում:
- Հա, պարզ ա, ի՞նչ կա:
Չգիտեմ վարորդին ինչ պատասխանեմ, ասեմ, որ հայրս հիվա՞նդ է, ասեմ, որ ի զորո՞ւ չեմ պատասխանելու, թե՞ ընդհանրապես ինչ կա կամ ինչ կարող է լինել, ասեմ, որ իր ի՞նչ գործն է, որ նման հարց է տալիս: Հետո մտածում եմ՝ գուցե մարդկայնորեն անհանգստանում է, մտածում է. եթե հաճախորդը հիվանդանոց է գնում, ուրեմն դժբախտություն է պատահել, ու ինքն անպայման պիտի հարցնի դժբախտության մասին, եւ այդ հարցը սփոփանքի պես մի բան է, տխուր մտքերը ժամանակավորապես ցրելու միջոց:
- Հայրս իրեն լավ չէր զգում, տարել են Քանաքեռի հիվանդանոց:
- Քանի՞ տարեկան ա:
- Հիսունյոթ:
- Վտանգավոր տարիք ա, վաթսունի շեմն անցավ՝ մինչեւ իննսուն կձգի, տենց ա, ես էլ լավ չեմ:
Չգիտեմ ինչպես մեկնաբանել՝ «ձգելու» «մարդկային տարիքի», «իր լավ չլինելու» մասին:
Վարորդը քշում է ու հայելու մեջ անընդհատ ինձ փնտրում:
- Ինչի՞ դեմը չնստեցիր:
- Էստեղ ավելի հարմար եմ ինձ զգում:
Աշխատում եմ հայելու մեջ չերեւալ, որ դեմքիս որեւէ բեկոր խոսելու առիթ չտա նրան:
Տաքսին կանգնում է Միքայելյան վիրաբուժության ինստիտուտի դարպասի մոտ:
- Առողջություն, Ասծով, Ասծով,- համարյա բղավում է վարորդը:
- Շնորհակալ եմ:
Հիվանդանոց եմ մտնում, ընդունարանում հարցնում եմ սրտանոթային բաժանմունքի տեղը:
- Ո՞ւմ եք ուզում:
- Հայրիկիս էստեղ են բերել, ուզում եմ իր մոտ գնալ:
- Որտե՞ղ:
- Սրտանոթային բաժանմունք:
- Անուն-ազգանունը:
Ասում եմ:
- Տենց անուն-ազգանունով հիվանդ չունենք:
- Շատ լավ, իսկ Քանաքեռում կա՞ սրտաբանական մեկ ուրիշ կենտրոն:
- Եսիմ, երեւի կա, Օնկոլոգիայի մոտերքը:
Դուրս եմ գալիս, նորից տաքսի եմ վերցնում:
- Գնանք Օնկոլոգիայի կենտրոն:
Միքայելյանի վիրաբուժության ինստիտուտից Օնկոլոգիայի կենտրոն շատ մոտ է:
Տաքսու վարորդի հետ երկխոսելու հնարավորությունը մեռնում է:
Իջնում եմ, քայլում Օնկոլոգիայի կենտրոնի գլխավոր մասնաշենք:
Կապույտ խալաթով բուժքույր եմ տեսնում.
- Կներեք, էստեղ սրտաբանական բաժանմունք կամ կենտրոն կա՞:
- Չգիտեմ, ուրիշին հարցրու:
Մտնում եմ ընդունարան, մոտենում մի ուրիշ բուժքրոջ, նորից հարցնում:
- Ի՞նչ իմանամ, ես ի՞նչ իմանամ:
Դուրս եմ գալիս, կանգնում շենքի առջեւ: Երկրորդ հարկի մի պատուհանից երիտասարդ բուժքույր է նայում: Դիմում եմ նրան:
- Կներեք, էստեղ սրտաբանական բաժանմունք կամ կենտրոն կա՞:
Ուշադիր նայում է, նայում ու հանկարծ ափը սեղմելով բերանին՝ քրքջում է, հետո փախչում: Քայլում եմ հիվանդանոցի ետեւամաս: Բուժքրոջ քրքջոցը դեռ լսվում է: Մտածում եմ՝ տեսնես ինչո՞ւ քրքջաց, երեւի դեմքիս անիմաստ արտահայտությունից ազդվեց, բայց դիմելաձեւս, խնդրանքս հստակ էր, զուսպ:
Դիմացս սքանչելի այգի է բացվում: Լսվում է ծառերի տերեւների ու կանաչ խոտի քնքուշ սոսափյունը: Երկհարկանի շենք եմ տեսնում, սանդուղքների մոտ մարդ է նստած: Մոտենում եմ, հարցնում նրան:
- Կներես, սրտաբանականի տեղը չգիտեմ, սա ճառագայթի մասնաշենքն է, դուրս արի փողոց, էնտեղ հարցրու՝ կասեն:
Ժպտում է բարի աչքերով ու ավելացնում.
- Բայց տարեց մարդուց կհարցնես:
- Շնորհակալություն:
Քայլում եմ դեպի փողոց ու մտածում՝ «ինչո՞ւ տարեց մարդ, ինչո՞ւ էդպես ասեց»:
Կանգնում եմ փողոցի մայթին, սպասում:
Մթերային խանութի ետնամասից շագանակագույն վերնաշապիկով պապիկ է դուրս գալիս ու դանդաղ քայլքով առաջանում:
Մոտենում եմ նրան:
- Բարեւ ձեզ:
- Հազար բարի:
- Ես սրտաբանականն եմ փնտրում, կարո՞ղ է տեղն իմանաք:
- Շատ լավ, հիմա ուշադիր ինձ լսի: Փողոցով քայլում ես մինչեւ լուսացույց, տեսնո՞ւմ ես:
- Տեսնում եմ:
- Ապրես, երբ հասնես դրան, թեքվի ձախ ու մի քանի մետր քայլի, դեղնավուն երկհարկանի շենքը սրտաբանականն է:
Գլխով եմ անում, ուզում եմ շնորհակալություն հայտնել, չի ստացվում:
- Արի, ես քեզ կուղեկցեմ:
Քայլում ենք կողք կողքի:
Պապիկը լուռ է:
Ինձ ոչինչ չի հարցնում:
Երբ տեղ ենք հասնում, սեղմում է ձեռքս:
- Ցտեսություն:
Ես երկար նայում եմ նրա ետեւից:
Սա էր օրվա իմ հիշատակարանը:
Արամ ՊԱՉՅԱՆ
Կարծիքներ