Այն մարդիկ, ովքեր Ծառուկյանին են խփում, վաղը իրեն են խփելու…
Գագիկ Ծառուկյանին ժամանակին ինչքան էլ ասեին, որ կերակրատաշտային հարաբերություններում ամենաառաջինը ամենամտերիմդ է խփում, չէր հավատա: Հիմա երևի տեսնում և ուշացած հետևություններ է անում: Տեսնում ու զարմանում է:
Բայց մի սփոփանք կա: Կերակրատաշտային հարաբերությունների մեջ է նաև ՀՀԿ-ն: Վաղը կամ մյուս օրը նույնի կրկնությունը լինելու է նաև այնտեղ: ՀՀԿ-ին ամենամոտ կանգնած մարդը առաջինն է դավաճանելու շեֆին:
Հիշում եմ կուսշրջկոմի քարտուղարներից մեկին, երբ աշխատանքից ազատել էին, մինչև մահվան վերջին օրը, անընդհատ կրկնում էր` բա չիմանայի~, թե ինչ շրջապատ ունեի, բա չճանաչեի~ մարդկանց…
Աշխատանքից ազատվելուց հետո նրա հետ միայն մեկին էինք տեսնում, ում ժամանակին ազատել էր աշխատանքից:
Հիմա ՀՀԿ նախագահի համար հարմար պահ է: Տեսնելու, զգալու, որ այն մարդիկ, ովքեր այդպես պատվախնդորեն Ծառուկյանին են խփում, վաղը նույն փութաջանությամբ իրեն են խփելու:
Գուցե դա հուշի, որ մի քիչ էլ կարևորվի մարդկային արժանիքները, մարդու~ն տեղ տրվի, սովորական մարդուն` առանց քաղաքականության, առանց քծնելու, առանց տակ փորելու…
ՀԱՍՄԻԿ Բաբաջանյան
Կարծիքներ