Հայաստանը և Իրանը պետք է տրանսպորտի ու բեռնափոխադրումների ոլորտում ավելի մեծ քայլեր կատարեն. Իրանի դեսպան
ՀՀ տրանսպորտի և կապի նախարար Գագիկ Բեգլարյանը հոկտեմբերի 27-ին հանդիպել է Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադիի հետ:
ՀՀ տրանսպորտի և կապի նախարարության լրատվական ծառայությունից հայտնում են, որ Գագիկ Բեգլարյանը, ողջունելով նորանշանակ դեսպանին, շնորհավորել է Հայաստանում դիվանագիտական առաքելություն սկսելու կապակցությամբ, մաղթել է արդյունավետ աշխատանք և նորանոր հաջողություններ:
Նախարարն իր խոսքում անդրադարձել է հայ-իրանական բարեկամական հարաբերություններին, նշել է, որ դրանք շատ կարևոր են համատեղ իրականացվող ծրագրերում փոխադարձ վստահության համար:
«Հայաստանի և Իրանի Հանրապետությունների միջև տրանսպորտի և կապի ոլորտում միշտ եղել է փոխշահավետ համագործակցություն: Այս պահին քննարկում ենք Հայաստան-Իրան երկաթուղու կառուցման նախագիծը, ինչպես նաև «Հյուսիս-հարավ ճանապարհային միջանցք» ներդրումային ծրագրում իրանական ընկերությունների ներգրավման խնդիրը: Այս ծրագրերի մասին ես վերջերս առիթ ունեցել եմ մեզ մոտ՝ Հայաստանում, զրուցելու նաև ԻԻՀ տրանսպորտի և քաղաքաշինության նախարար Աբբաս Ախունդիի hետ: Նախագծերի իրականացումը կարևոր նշանակություն կունենա ինչպես երկու պետությունների տնտեսությունների զարգացման համար, այնպես էլ կնպաստի տարածաշրջանի երկրների ակտիվ փոխհամագործակցությանը»,- ասել է Գագիկ Բեգլարյանը:
Սեյեդ Քազեմ Սաջադին շնորհակալություն է հայտնել ջերմ ընդունելության համար՝ նշելով, որ Գագիկ Բեգլարյանի և Աբբաս Ախունդիի միջև տեղի ունեցած հանդիպման ընթացքում ձեռք բերված պայմանավորվածությունների ուղղությամբ Իրանի Իսլամական Հանրապետության դեսպանատունը ակտիվ աշխատանքներ է տանում:
«Հաշվի առնելով, որ ակտիվացել են Իրան-Հայաստան էլեկտրահաղորդման երրորդ գծի շինարարության աշխատանքները, մենք կարծում ենք, որ տրանսպորտի և բեռնափոխադրումների ոլորտում երկու երկրները հաջողության հասնելու համար պետք է ավելի մեծ քայլեր կատարեն: Ինչ վերաբերում է Հյուսիս-հարավ ճանապարհային միջանցքին, մենք այստեղ ևս ակնկալում ենք լուրջ համագործակցություն: Իրանցի առաջատար ճարտարապետներն ու ճանապարհաշինարարները կարող են մասնակցություն ունենալ այդ աշխատանքներում»,- նշել է դեսպանը:
Հանդիպման ընթացքում խոսվել է նաև ՀՀ տրանսպորտի և կապի նախարար Գագիկ Բեգլարյանի՝ Իրանի Իսլամական Հանրապետություն առաջիկա այցի մասին, ինչպես նաև քննարկվել են փոխադարձ հետաքրքրություն ներկայացնող մի շարք այլ հարցեր:
Կարծիքներ