Երբ ընդունակ չես որևէ բան լավ անել

Երեւանի մամուլի ակումբում «Հանրաքվեի լուսաբանումը Հայաստանում» թեմայով քննարկման ժամանակ Եվրոպայի խորհրդի փորձագետ Լորան Ռուին նախ զարմացել է, որ Հանրային հեռուստատսությունը կարող է քարոզարշավի ժամանակ հստակ քարոզչություն պարունակող հաղորդում հեռարձակել, ապա՝ ավելի զարմացել, երբ իմացել է, որ նման հաղորդումը վարում է իշխող կուսակցության փոխնախագահ և նախարար Արմեն Աշոտյանը: Լո՞ւրջ եք ասում, որ նման բան կա՝ իր լսածին չի հավատացել Լորան Ռուին: Փորձագետը նույնիսկ մտահոգվել է, իսկ դա նշանակում է, որ նրա մտահոգությունը մի տեղ դուրս կգա Հայաստանի դեմ:

Փաստորեն Աշոտյանի հեռուստատեսային կարիերայի գլխին, հենց այդ կարիերայի արշալույսին, քար ընկավ, և շարունակելը, այն էլ նույն ոգով, կարող է վատ վերջանալ ոչ միայն շոումեն Աշոտյանի, այլև Հանրայինի ղեկավարության, ՀՀԿ-ի և առհասարակ Հայաստանի համար:

Որ հայրենասիրությունը խոդի գցենք, կարելի է այդ եվրոպացուն որոշ բաներ ասել, օրինակ՝ քո ի՞նչ գործն է, այ Ռուի, թե ինչ է անում մեր Աշոտյանը, բայց բոլորս էլ հասկանում ենք, որ այդ եվրոպացիները հենց Աշոտյանի ու նրա կուսակցության շնորհիվ են այսպես ինքնահաստատվել Հայաստանում, հետևաբար նաև Աշոտյանն է առաջին հաշվետուն: Թող գնա, ուրեմն, ու ինքն էլ տակից դուրս գա, ինչպես ասում են:

Տակից դուրս գալը պետք է որ Աշոտյանի համար խնդիր չլինի: ՀԱԿ-ի տակից ի՞նչպես դուրս եկավ: Նրա ցինիկությունը սահման չի ճանաչում: Շնորհակալություն էր հայտնում ՀԱԿ-ին՝ իր հաղորդումը գովազդելու համար: Թող հիմա էլ Լորան Ռուիին շնորհակալություն հայտնի «Եռանկյունին» եվրագովազդելու համար:

Слабо?

Էդիկ Անդրեասյան