Ճապոնիան եւ Ռուսաստանը կարող են քսան համատեղ նախագիծ իրականացնել

Ճապոնիան եւ Ռուսաստանը կարող են ավելի քան 20 համատեղ ծրագրի իրականացման համաձայնագիր կնքել, ինչը ռուս-ճապոնական հարաբերությունների վերջին ջերմացումներից հետո բավական դրական քայլ է: Այս մասին հայտնում է ճապոնական «Յոմիուրի» պարբերականը՝ գրելով, որ նշված նախագծերի հետ կապված համաձայնագրերի փաթեթները ներառված են Ճապոնիայի վարչապետ Սինդձո Աբեի` այս ամսվա վերջին Մոսկվա կատարելիք այցի օրակարգում: Նշենք, որ Ռուսաստանն ու Ճապոնիան իրենց հարաբերություններում նկատելի ակտիվություն սկսեցին՝ կապված հաշտության համաձայնագրի կնքման հետ: Մոսկվան Տոկիոյին առաջարկեց Հարավային Կուրիլյան կղզիներում համատեղ տնտեսական նախագծեր իրականացնել: Ներկայումս քննարկվում է ռուսական Р-Фарм ընկերության մինչեւ 20% բաժնեմասի` ճապոնական Mitsui ընկերության կողմից գնելու հարցը, որը նաեւ թույլ կտա ճապոնական դեղագործական ընկերությանը, մուտք գործելով ռուսական շուկա, ընդլայնել արտադրությունը Ռուսաստանում: Բացի այդ, նախատեսվում են նաեւ նավթի արդյունահանման համատեղ ծրագրեր: Նշենք, որ նախնական համաձայնությամբ՝ Սինդձո Աբեն Մոսկվա կայցելի ապրիլի 27-28-ին: