Շատ սխալ էր նման տարածքում հող օտարել, շինթույլտվություն տալ. Կոտայքի մարզպետը կառուցվող առանձնատան մասին

Աբովյան քաղաքում գործող թիվ 6 մանկապարտեզը վաղուց  հայտնվել էր  օլիգարխների «ուշադրության կենտրոնում»: Մանկապարտեզի մի մասնաշենքը ծառայում է, որպես  գեղարվեստի դպրոց: Այստեղ ե´ւ մանկապարտեզի երեխաներ են հաճախում, ե´ւ գեղարվեստի դպրոցի սաներ: Մանկապարտեզին պատկանող հսկայական կանաչապատ տարածքի հաշվին  մեկ տարի է,  ինչ մասնավոր կառույցի շինարարություն է ընթանում, որը աբովյանցիների դժգոհության պատճառ է դարձել: Նրանք անգամ բողոքի ցույց կազմակերպեցին, որոշ ժամանակով շինարարությունը դադարեցվեց: Սակայն, որոշ ժամանակ անց ակտիվ կերպով սկսվեցին շինարարական աշխատանքները:

Աբովյանցիները պնդում են, որ շինությունը պատկանում է Աբովյանի քաղաքապետ՝ Վահագն Գեւորգյանին. «Ինչ ուզում է անում է քաղաքապետը, ով է տեսել մանկապարտեզի տարածքի ծառերը հատել եւ առանձնատուն կառուցել: Երեխաները դուրս են գալիս մանկապարտեզից հանդիպում են պարիսպների: Քաղաքապետը նաեւ խոստացավ, որ կվերանորոգի մանկապարտեզը, բայց ոչ էլ խոստումը կատարեց: Անգամ ձմռվա ամիսներին մանկապարտեզը չի գործում:  Թող մտածի՝ ի՞նչպես անի,  մանկապարտեզը հունվար, փետրվար ամիսներին աշխատի, ոչ թե մտածի ո՞նց անի, իր առանձնատունն ավելի շքեղ դարձնի»,-բողոքում էին աբովյանցիները:

 Ըստ Աբովյանի քաղաքապետի   19 մարտի 2018 թվականի N 233 որոշման՝   թույլատրել փոփոխելու Շուշան Կարապետյանին սեփականության իրավունքով պատկանող (հիմք՝ 2018 թվականի հունվարի 09-ի N 09012018-07-0006 վկայական) Աբովյան քաղաքի 3-րդ միկրոշրջանի Սուրեն Մնացականյան փողոցի թիվ 1/5/2 հասցեում գտնվող 1200.6 300 եւ 49 քառակուսի մետր մակերեսով բնակավայրերի նշանակության հասարակական կառուցապատման հողամասի գործառնական նշանակությունը, որպես բնակելի կառուցապատման հողամաս, որի համար Շուշան Կարապետյանը պարտավոր է Աբովյանի համայնքապետարան մուծել  169 հազար 900 դրամ՝ որպես հողամասերի գործառնական նշանակության փոփոխության և 5հազար դրամ` հասցեի տրամադրման ծառայության վճարներ:   

Այն, որ տարիներ շարունակ օլիգարխները իրենց ունեցվածը բարեկամների եւ ծանոթների անունով են անում, դա գաղտնիք չէ: Եվ այս դեպքն էլ դրա ապացույցն է, որ քաղաքապետի  առանձնատան դիմումատուն իր ծանոթ է եղել: Վահագն Գեւորգյանի հետ կապ հաստացել չկարողացանք: Առանձնատունը դարձել է աբովյանցիների թիվ 1 քննարկող թեման:  Կոտայքի մարզպետ Ռոմանոս Պետրոսյանը    մեզ հետ զրույցում ասաց, որ ինքը զրուցել է քաղաքապետի հետ եւ դատապարտել է, որ մանկապարտեզի տարածքում  հող է օտարել եւ շինթույլտվություն տվել. «Ծանոթ եմ խնդրին:  Մեր մարզում չկան հանրային հնչեղություն ստացած հիմնախնդիրներ,  որոնք ինձ ծանոթ չլինեն: Իմ նշանակումից հետո հարցում ենք արել  եւ քաղաքապետարանից փաստաթղթեր ենք պահանջել:  Այդ պահի դրությամբ օրինական   են եղել  բոլոր գործընթացները,  տվյալ անձի անունով են  ներկայացված եղել փաստաթղթերը:  Սերժի ժամանակ էլ՝ թղթերով ամեն ինչ կարգին էր, բայց կյանքը այնքան դժգույն էր:    Բայց իմ  հասած տեղեկություններով ում անունով,  որ այդ շինարարությունը ընթանում է  հանդիսանում է գործող քաղաքապետի բարեկամուհիներից մեկը: Թե որքանո՞վ է այդ կառույց իրեն  պատկանում՝ դժվար է ասել:  Որպես քաղաքացի հետաքրքրվում ես, ո՞ւմն է, իսկ ողջ քաղաքը խոսում է մի բանի մասին, որ դա Աբովյանի քաղաքապետին  է:  Ես դատապարտել եմ այդ առանձնատան կառուցապատումը, իրավական առումով ոչինչ չենք կարողանում անել, խնդիրը բարոյական դաշտում է: Ես զրույց եմ ունեցել քաղաքապետի հետ եւ ասել եմ, որ շատ սխալ էր նման տարածքում հող օտարել, շինթույլտվություն տալ:  Առավել եւս, ես ինքս այդ թաղամասի բնակիչ եմ, շատ տհաճ է, երբ որ քո դստերը տանում ես  մանկապարտեզ, իսկ մանկապարտեզի   հետեւի մասում  շինարարական աշխատանքներ են ընթանում»: