Մարդիկ մահանում են նախարարության, կառավարության ապիկար աշխատանքի պատճառով

Քաղաքական դաշտում բուռն գործընթացներ են տեղի ունենում, որտե՞ղ է իրեն պատկերացնում խորհրդարանական ընդդիմություն «Լուսավոր Հայաստանը»՝ ընդդեմ իշխանության պայքարողների մե՞ջ է, թե՞ իշխանության կողքին։ Զրուցել ենք ԱԺ ԼՀԿ խմբակցության քարտուղար Գեւորգ Գորգիսյանի հետ։

- Պարոն Գորգիսյան, Գագիկ Ծառուկյանն առողջ ուժերին կոչ է անում միավորվել, ստեղծված իրավիճակից դուրս գալու ելքեր գտնել։ Դատելով նրա ելույթի այն հատվածից, որ կառավարությունը 100 տոկոսով պիտի փոխվի, ենթադրվում է, որ առաջիկայում կսկսեն վարչապետին անվստահություն հայտնելու գործընթաց։ Եթե այս սցենարը զարգանա, ո՞րն է լինելու ԼՀԿ-ի դիրքորոշումը, հատկապես, որ արդեն կան տեղեկություններ արտախորհրդարանական որոշ ուժերի միավորման եւ ընդդիմադիր բեւեռ ձեւավորելու մասին։

- Դուք «եթե»-ներով եք խոսում, ես այդպես չեմ կարող մեկնաբանել։ Թող անեն, նոր այն ժամանակ մեր մոտեցումը կհայտնենք։ Ես այժմ կրկնում եմ տիկին Թանդիլյանի ասածը, որը մեր դիրքորոշումն է՝ եթե պիտի իրականանա ընդդիմության կոնսոլիդացիա, դրա կենտրոնում, դրա առանցքը լինելու է «Լուսավոր Հայաստանը», որովհետեւ մենք միակ ուժն ենք, որ ունակ ենք եւ կարող ենք բոլորին համախմբել։ Բայց այսօր դրա անհրաժեշտությունը չենք տեսնում։

- Նախ ուզում եմ պարզաբանեք՝ ի՞նչ նկատի ունեք ասելով․ «Առանցքը մենք պիտի լինենք»։

- Երբ որ այդ ամեն ինչի ժամանակը գա, կմանրամասնենք։

- Նկատի ունեք, որ անվստահության դեպքում վարչապետի թեկնածուն պետք է ԼՀԿ-ի՞ց լինի։

- Մենք առայժմ խոսում ենք գլոբալ երեւույթների մասին։ Եթե պիտի տեղի ունենա ընդդիմության կոնսոլիդացիա, դա հնարավոր է միայն ԼՀԿ-ի շուրջ։

- Բայց դուք չեք ուզում կոնսոլիդացիա, չեք հայտարարել համախմբման մասին, իսկ ԲՀԿ-ն արդեն գործողություններ է նախաձեռնել։

- Մենք ասում ենք, որ հենց այսօր դրա ժամանակը չէ, որովհետեւ հենց այսօր կա լուրջ խնդիր, մարդիկ մահանում են նախարարության, կառավարության ապիկար աշխատանքի պատճառով, եւ նրանք պարտավոր են այս ճգնաժամի դեմն առնել, եւ հիմա իրենց պետք է թողնենք՝ ճգնաժամից երկիրը հանեն, ու նոր սկսենք գլոբալ քաղաքականությունը։

- Դուք է՞լ եք այն մոտեցման կողմնակիցը, որ երկիրը պատերազմական վիճակում է, եւ իշխանություններին քննադատելը կնշանակի դավաճանություն պետության եւ պետականության հանդեպ, ինչպես Տեր-Պետրոսյանն օրերս կարծիք հայտնեց։

- Ես Տեր-Պետրոսյանին չեմ ուզում անդրադառնալ, որովհետեւ դավաճաններից խոսելիս առաջինը միշտ իր անունն եմ տալիս, հետեւաբար, չեմ կարծում, որ ինքը բարոյական որեւէ իրավունք ունի խոսելու։ Ինչ վերաբերում է՝ անունը դնենք պատերազմ, թե այլ բան, ամեն դեպքում, հիմա ունենք ճգնաժամային իրավիճակ, որը մարդկանց կյանքեր է տանում։

- Իսկ ինչո՞ւ եք Լեւոն Տեր-Պետրոսյանին դավաճան անվանում։

- Լավ, դա անցած թեմա է, իր որեւէ ասած ես չեմ ուզում մեկնաբանել։ 

- Բայց գոնե ասեք՝ ո՞ր հարցում է «դավաճանել»։

- Եկեք անցնենք։

- Լավ, անցանք, այսինքն՝ Ձեր կարծիքով այս փուլում, երբ մարդիկ են մահանում, իշխանությունը չի կարողանում այդ ամենի դեմն առնել, չի՞ կարելի իշխանությանը քննադատել, հրաժարական պահանջել։

- Ամերիկացիները լավ ասացվածք ունեն, որը թարգմանաբար կնշանակի՝ պատեհ պահին պետք է ճիշտ քայլերն անես, հակառակ դեպքում այդ ամենը բուռն գործողության իմիտացիա կարող է դառնալ։ Ի դեպ, այն օրակարգերը, որի շուրջ մեր գործընկերները համախմբվելու կոչ են անում, արդեն 2 ամիս է՝ ԼՀԿ-ն բերել է քաղաքական դաշտ։ Այսինքն, իրենք մեր օրակարգը վերցրել են, ասում են՝ եկեք քննարկենք։ Այն, ինչ իրենք ասում են, ԼՀԿ-ն անում է եւ օրակարգ է բերել այդ թեմաները՝ սկսած քաղաքացիներին օգնություն տալուց, վերջացրած այն սահմանափակումներից, որոնք պիտի դրվեին ու բացվեին հետագայում։

- Հիմա Ձեր գործընկերներն  ասում են, որ իշխանությունը ձախողվել է բոլոր առումներով, եկեք համախմբվենք ու կառավարության հրաժարականին հասնենք, որովհետեւ «երկիր ենք կորցնում»․ դուք այդ մասին չե՞ք ասում։

- Հրաժարականի մեխանիզմ կա, ԲՀԿ-ն որեւէ մեկ քայլ այդ ուղղությամբ չի ձեռնարկել, երբ անի, կքննարկենք։ Բայց ես կրկնում եմ՝ մենք շարժվում ենք մեր օրակարգով, եւ այն պահին, երբ կարիք լինի համախմբել բոլոր կարող ուժերին, ԼՀԿ-ն դա կանի։

- Ե՞րբ է գալու այդ պահը։

- Երբ կգա, կասենք։

- Այսինքն, սպասելու եք, որ Հայաստանում, ինչպես Դուք էլ փաստեցիք, շատերը մահանան, հետո նո՞ր փորձեք կանխել։ 

- Իշխանությունը մերժելով մեր եւ ԲՀԿ-ի բոլոր առաջարկները՝ հիմա միանձնյա պատասխանատվություն է կրում այն ամենի համար, ինչ տեղի է ունենում։ Ասում են՝ թողեք աշխատենք, մենք թողել ենք, մենք միայն առաջարկներ ենք տվել այս ընթացքում եւ սպասում ենք, որ պետք է արդյունքներ տեսնենք, որ պիտի փոխվի իրավիճակ, տեմպը նվազի, մարդիկ սկսեն էլ չվարակվել։ Ճգնաժամային իրավիճակում երկրին լրացուցիչ ցնցումներ պետք չեն, դա հակապետական է։ Մեր երկրում հաճախ ընդդիմությունը քայլերն այնպես է պլանավորել, որ դրանք եղել են ուղղված պետության եւ պետականության դեմ, մենք երբեք նման բան չենք արել։ Մեզ համար պետության շահն ավելի կարեւոր է, քան ամեն ինչ։ Եվ այն պահին, երբ կզգանք, որ մեր քայլերը չեն վնասի պետությանն ու պետականությանը, մեր անելիքը կանենք։

- Դուք կարծում եք, որ  իշխանության այսօրվա քայլերը մեր պետության շահերի՞ց են բխում։

- Ես պնդում եմ, որ այսօր լրացուցիչ ցնցումները չեն բխում պետության շահից։ Այո, ես բազմիցս եմ խիստ քննադատել կառավարությանը, բայց այս պահին լրացուցիչ ցնցումներ պետք չեն։

- Այսինքն, ԼՀԿ-ի օրակարգում այսօր իշխանափոխության, վարչապետին անվստահություն հայտնելու հարց չկա, որովհետեւ դա չի բխում պետության շահերից։

- Այսօր՝ այո, որովհետեւ երբ խոսվում էր հակաճգնաժամային կառավարության ձեւավորման մասին, իմ կարծիքով, կառավարության կազմում, «Իմ քայլի» կազմում ես չեմ տեսնում մեկին, ով կարող է գալ ու կառավարել երկիրը, խոսվում է Ավինյանի մասին, բայց ես չեմ կարծում, որ պարետատան աշխատանքները բավարար են արվել։ Հետեւաբար, մենք՝ որպես ԼՀԿ, չենք տեսնում «Իմ քայլում» մի մարդ, որը կկարողանա երկիրը թռիչքաձեւ այլ ուղիով տանել, քան հիմա գնում է։

- Իսկ հավանական չե՞ք համարում, որ եթե ընդդիմությունը միավորվի, պարտադրի իր թեկնածուին։

- Ընդդիմությունը չունի մեծամասնություն, Դուք երեւի ակնարկում եք «Իմ քայլի» տրոհման մասին, պատգամավորների փախնելու մասին, ես որեւէ նախանշան այսօր չեմ տեսնում։ Դրա  համար եմ ասում՝ երբ պահը գա համախմբման, ԼՀԿ-ն կդառնա այդ համախմբման առանցքը։

- Իսկ եթե համոզված լինեք, որ «Իմ քայլից» էլ ոմանք կքվեարկեն ընդդիմության օգտին, կրկի՞ն չեք միանա վարչապետին անվստահություն ներկայացնելու նախաձեռնությանը։

- Մենք ոչ մեկին չենք միանալու, ԼՀԿ-ն շարժվում է իր օրակարգով, բայց եթե կարիք եղավ երկրի կարող ուժերին, անհատներին համախմբելու, դա անելու է ԼՀԿ-ն։

- Եթե իշխանությունը խնդրի աջակցել իրեն, կընդունե՞ք մեկնված ձեռքը, կհամագործակցե՞ք։

- Մենք ԱԺ-ում գտնվելու առաջին իսկ օրվանից փորձել ենք այդ աջակցության ձեռքը մեկնել, նրանց գոռոզությունը թույլ չի տալիս նախ ընդունել, որ սխալ են, ապա ընդունել օգնություն կամ համախմբել ինչ-որ մեկին՝ խնդիրներ լուծելու նպատակով։ Նրանք դա երբեք չեն անի։

- Պատկերացրեք՝ գոռոզությունը մի կողմ են դնում եւ, այնուամենայնիվ, առաջարկում են։

- Ես չեմ կարծում, որ մենք իրենց կողքին անելիք ունենք, որովհետեւ դու պիտի նաեւ հասկանաս՝ ինչ թիմի հետ ինչ խնդիրներ ես լուծում, ես չեմ  տեսնում կառավարության կազմում թիմ, որն ունակ է երկրի առջեւ ծառացած խնդիրները լուծել, եւ նրանք կառավարման այս ամբողջ ընթացքում իրենց ապիկարությունը ցույց տվեցին։

- Ստացվում է, որ ԼՀԿ-ն արձանագրում է, որ երկրում ամեն ինչ վատ է, բայց միեւնույն ժամանակ ոչ թե քայլեր է անելու, այլ դիտորդի կարգավիճակով հետեւելու է, թե ինչպես է ամեն ինչ վատ։

- Դուք հիմա գնահատական եք տալիս, չի կարելի։

- Լավ, հարցնեմ՝ դուք դիտորդի առաքելությո՞ւն եք ստանձնել։

- Բնականաբար՝ ոչ։