ԱՄՆ-ի օգնությունը Կիևին ուշացած է․ Reuters
Hraparak
23 Ապրիլ 2024 | 16:00
0
ԱՄՆ Կոնգրեսի Ներկայացուցիչների պալատը հավանություն է տվել Ուկրաինային լրացուցիչ ֆինանսավորում հատկացնելու օրինագծին, բայց դա Կիևի համար չափազանց «ուշացած» է։ Այս մասին հայտնում է Reuters-ը՝ վերլուծաբաններին հղումով։
Նրանց պնդմամբ, երաշխիք չկա, որ ուկրաինացի զինվորականներն այլևս օգնություն կստանան նախաձեռնության հաստատումից հետո, և որ այն, ինչ արդեն համաձայնեցված է, «կհասնի շատ ավելի ուշ, քան Ուկրաինան, որը զինամթերքի պակաս է զգում, ակնկալում էր»։
Ինչպես նշում է գործակալությունը, 2024 թվականից հետո Կիևը կանգնած է անորոշության առաջ՝ ԱՄՆ նախկին նախագահ Դոնալդ Թրամփի հնարավոր վերընտրման ֆոնին։
ԱՄՆ Ներկայացուցիչների պալատում ապրիլի 20-ին հաստատվել են Ուկրաինային, Իսրայելին և Թայվանին ռազմական օգնություն տրամադրելու, Ռուսաստանի սառեցված ակտիվները Կիևին փոխանցելու համար բռնագրավելու և Չինաստանի դեմ լրացուցիչ պատժամիջոցներ կիրառելու մասին օրինագծերը։ Փաթեթի ծավալը կազմել է 95 մլրդ դոլար:
Այն ներառում է, մասնավորապես, 61 մլրդ դոլար՝ Ուկրաինայի, 26 մլրդ դոլար՝ Իսրայելի համար, ինչպես նաև հակամարտությունների գոտիներում, այդ թվում՝ Գազայի հատվածում, մարդասիրական օգնություն տրամադրելու համար։ Այժմ օրինագծերը պետք է հաստատվեն ԱՄՆ Սենատի կողմից, դրանց քննարկումը կսկսվի ապրիլի 23-ին։ Եթե դրանք ընդունվեն, ապա կուղարկվեն ԱՄՆ նախագահ Ջո Բայդենի վավերացմանը։ Ամերիկացի առաջնորդն արդեն խոստացել է ստորագրել օրինագծերի այս փաթեթը։
Կարծիքներ