Պատերազմից ու շատ ծանր տարի ունենալուց հետո Հայաստանում մարդկանց դեմքին ժպիտ հայտնվեց․ Կապառոս
Հայաստանի ազգային հավաքականի գլխավոր մարզիչ Խոակին Կապառոսը հարցազրույց է տվել իսպանական հեռուստաընկերություններին, անդրադարձել Հայաստանի ազգային հավաքականի գրանցած վերջին հաջողություններին։
«Ցանկանում եմ ձեզ մի գաղտնիք բացել։ Ֆուտբոլիստները ցանկանում են, որ ամեն խաղից առաջ հնչեցնեմ «Սևիլիայի» օրհներգը: Հետաքրքիր է, չէ՞: Ուրախալին ու ամենակարևորն իհարկե հիմա այն է, որ մենք մեր խմբի առաջատարն ենք, և մինչև սեպտեմբեր դա մեզնից ոչ ոք չի կարող խլել: Շատ հեռուն չենք նայում, շարժվում ենք խաղից խաղ, քայլ առ քայլ: Մենք պրոֆեսիոնալներ ենք ու լավ գիտենք, որ շատ դժվար է լինելու: Ռումինիան հզոր հավաքական է, Իսլանդիան նույնպես լավ թիմ ունի, դե Գերմանիայի մասին էլ՝ չխոսենք: Բայց, կրկնում եմ, մինչև սեպտեմբեր ոչ ոք չի կարող մեզնից խլել մրցաշարային աղյուսակին ոգևորությամբ նայելու իրավունքը: Կարելի է ասել՝ ամեն ինչ նոր է սկսվում, պետք է աշխատել, աշխատել ու շարունակ աշխատել։ Ինչ խոսք՝ մարդկանց դեմքին ժպիտ է հայտնվել շատ ծանր տարի ունենալուց հետո: Կորոնավիրուսից բացի՝ այստեղ պատերազմ էր. շատերը զոհվեցին, բոլորը շատ տխուր էին: Բայց հենց այստեղ է ֆուտբոլի հզորությունը: Փողոցներում արդեն կարող ենք տեսնել ուրախ մարդկանց: Ինձ ասում են, որ այս օրերին հեռուստաեթերում չի քննարկվում քաղաքական թեմաներ, բոլորը խոսում են միայն ֆուտբոլի մասին: Մեզ համար մեծ պատիվ է փոխել տրամադրությունն այս երկրում »,- ասել է իսպանացի հանրահայտ մասնագետը։
Հայաստանի հավաքականը, հիշեցնենք, ԱԱ 2022 թվականի առաջնության նախընտրական փուլի մեկնարկային երեք հանդիպումներում տարել է նույնքան հաղթանակ, վաստակած 9 միավորով գլխավորում է J խմբի մրցաշարային աղյուսակը, գերազանցում է անգամ Գերմանիայի ընտրանուն, որը առաջին երկու հանդիպումներում հաղթելուց հետո, պարտվեց Հյուսիսային Մակեդոնիայի ընտրանուն։
Կարծիքներ