Ինչպես հայտնի է, վարչապետ Նիկոլ Փաշինյանը, ստանալով խորհրդարանական ընդդիմության համաձայնությունը, արտահերթ խորհրդարանական ընտրությունների օր է նշանակել 2021 թվականի հունիսի 20-ը։ Մինչ այդ նա պետք է հրաժարական ներկայացնի և խորհրդարանը 2 անգամ չընտրի վարչապետ։
Մենք փորձեցինք պարզել, թե քանի կուսակցություն կա այսօր Հայաստանում, արդյոք կա՞ն նոր գրանցված կուսակցություններ։ Արդարադատության նախարարությունից «Հրապարակի» հարցմանն ի պատասխան հայտնում են, որ այսօրվա դրությամբ Հայաստանում կա 91 գրանցված կուսակցություն:
2021 թվականին պետական գրանցում են ստացել թվով 3 կուսակցություն՝ «Արդարություն և հայրենիք», «Քրիստոնեա-ժողովրդավարական» և «Հանուն հանրապետության ժողովրդավարության պաշտպանների դաշինք» կուսակցությունները: Այս պահին Պետական գրանցման համար դիմում են ներկայացրել և փաստաթղթերի ուսումնասիրության փուլում են գտնվում 2 կուսակցություններ՝ «Արև» եւ «Իմ Հայաստան» կուսակցությունները։
