Ակցիան այս անգամ չստացվեց

«Բրաբիոն ֆլորա սերվիսը» երեկ, Սուրբ Վալենտինի օրվա հետ կապված, հայտարարել էր ամենաերկար համբույրի մրցույթ, որի հաղթողը հնարավորություն էր ունենալու ընտրել ցանկացած արժեքի ծաղկեփունջ: Մրցույթի համար նշանակված ժամից անցել էր արդեն մի կես ժամ, բայց հորիզոնում դեռ միայն լրագրողներն էին:



Վերջապես գտնվեց այն քաջ ու ամոթխած զույգը, որն էլ դարձավ մրցույթի միակ մասնակիցն ու հաղթողը: Մասնակիցները 15-16 տարեկան պատանիներ էին: Խոստացված անակնկալն էլ գեղեցիկ տեսք ուներ՝ 118 հազար դրամ արժողության ծաղկային կոմպոզիցիա: «Բրաբիոն ֆլորա սերվիսի» PR մենեջեր Ծովինար Սարգսյանը նշեց, որ ակնկալիքները մեծ էին, բայց երեւի մեզ հատուկ հայի մենթալիտետն ու ամոթխածությունը թույլ չտվեցին, որ շատ զույգեր գան-մասնակցեն մրցույթին, չնայած հիշեց, որ անցած տարի նույն օրը լողազգեստներով մրցույթի ժամանակ 14 կիսամերկ տղաներ էին եկել ծաղկեփնջի հետեւից: Ստացվում է, որ կամ մեր սիրահար զույգերը չեն համբուրվում, կամ էլ «Բրաբիոնի» ակցիան այս անգամ չստացվեց: