Շնորհավորենք միմյանց, բարեկամներ
![Համբույր](/images/2011/02/5-ej-shnorhavorenq-e1297774968169-400x249.jpg)
Մինչեւ բուն թեմային անցնելը` մնում է բացատրեմ, թե ինչ կապ ուներ երեկվա տոնական օրը նախորդ շաբաթվա կարեւոր իրադարձությունների ամփոփման հետ: Ընդամենը այն, որ իմ մեջ էլ մարդկանց շնորհավորելու անհագ ձգտում կա, իսկ այդ կապակցությամբ իրադարձություններ` որքան ուզես: Օրինակ Եգիպտոսի ծերունազարդ նախագահ Հոսնի Մուբարաքի հրաժարականը: Ուզում եմ բոլորիս սրտանց եւ մեծ պաթոսով շնորհավորել այդ կապակցությամբ: Սա բոլորիս հաղթանակն էր, մենք էլ մեր ֆեյսբուքյան մինչ այժմ չդադարող թեմատիկ ստատուսներով փոքրիկ լումա ունեցանք եգիպտական հեղափոխության գործում:
Անկեղծորեն ուրախ եմ Եգիպտոսի ժողովրդի համար, բավական արյունոտ, բայց համառ պայքարից հետո Մուբարաքը հրաժարական տվեց, ավելին (ցինիկ չհնչի)՝ ընկավ կոմայի մեջ: Ճիշտ է` դրանից շարքային եգիպտացու կյանքում առանձնապես բան չփոխվեց, ու դեռ երկար է մինչեւ լիարժեք հաղթանակ նրա ճամփան, սակայն այս իրադարձությունը, անշուշտ, անգերագնահատելի նշանակություն կունենա հայաստանյան իրականության համար: Ես դեռեւս այնքան էլ լավ չեմ հասկանում, թե կոնկրետ ինչ նշանակություն, սակայն սոցիալական ցանցերի հայկական տարածքներում տիրող ցնծության որակը հուշում է, որ դա անխուսափելիորեն այդպես է: Գուցե պատճառն այն է, որ այսպիսի մի եզրահանգում է արվում` եթե Եգիպտոսում ստացվեց, մեր մոտ ինչո՞ւ չպետք է ստացվի որ…
Գուցե հակառակը` մեր անհաջողություններից առաջացած հուսահատությունն ենք սուբլիմացնում մասամբ բռնապետության մեջ խարխափող եգիպտական ժողովրդին սատարելու ձգտման, մասամբ` 30 տարի այդ բռնապետության ղեկին եղած Մուբարաքի հանդեպ ատելության: Ինչ որ է, բայց դեռեւս ոչ լիարժեք հասկանալի տրամաբանության համաձայն, ոչինչ անցյալ շաբաթ մեզ այդքան չուրախացրեց, որքան Մուբարաքի հրաժարականը: Ու ոչինչ այդքան չզայրացրեց, որքան նրա պնդաճակատությունը, նույնիսկ այն, որ երեք օլիգարխներ իրենց բարի համբավի (մեղա, Տեր) վարկաբեկման գործով դատ շահեցին ընդդեմ «Հայկական ժամանակ» օրաթերթի: Այս կապակցությամբ նույնպես ուզում եմ անուն առ անուն շնորհավորել Ռուբեն Հայրապետյանին, Լեւոն Սարգսյանին եւ Սամվել Ալեքսանյանին` հավելյալ եկամուտներ ձեռք բերելու ուղղությամբ տարվող աշխատանքի փուլերից մեկի արդյունավետ ավարտի կապակցությամբ:
Կա արդարադատություն Հայաստանում, կաև, հո զոռո՞վ չի: Սա լուրջ նախադեպ է, որը կստիպի մեզ` լրագրողներիս, ավելի զգոն լինել հայրենի օլիգարխիայի մասին հիշատակումներ անելիս, քանի որ դատաիրավական համակարգը, նույնիսկ օրենքն ու տրամաբանությունը շրջանցելու հաշվին, ունակ է պաշտպանելու Հայաստանն առաջ տանողների բարի համբավը (եւս մեկ անգամ` մեղա, Տեր) ցանկացած տեսակի ոտնձգություններից: Շնորհավորում եմ, պարոնայք: Հոգ չէ, որ այս ձեռքբերումը փոքր-ինչ մթագնում է Հայաստանում խոսքի ազատությունը սանձելու փորձը, հոգ չէ, որ նրանց անունները պատմության մեջ հիշատակվելու են, ասենք, Մերուժան Արծրունու, Պետրոս Գետադարձի, Հովհաննես-Սմբատ Բագրատունու, Ազատ Վշտունու անունների կողքին: Առավել եւս հոգ չէ, որ այս անունները, թերեւս, նրանց ոչինչ չեն ասում:
Թեման շեղենք ավելի ներքաղաքական ուղղությամբ, մանավանդ որ այս ոլորտում էլ իրար շնորհավորելու բավական լուրջ առիթ կա՝ պայմանավորված ԲՀԿ համագումարով եւ դրան նախորդած մի շարք իրադարձություններով: Ճիշտ է` դեռ չեմ կողմնորոշվում` իրար շնորհավորենք այն կապակցությամբ, որ կոալիցիան չքանդվե՞ց, ու դեռ ԲՀԿ-ՀՀԿ գզվռտոցին հետեւելու երկարատեւ հնարավորությո՞ւն ունենք` դրանից բխող սենսացիաներով, հետեւություններով ու եզրահանգումներով հանդերձ, թե՞ որ ԲՀԿ-ն այդպես էլ չհայտարարեց, որ 2013-ին պաշտպանելու է Սերժ Սարգսյանի թեկնածությունը նախագահական ընտրություններում: Թերեւս արժե այս երկուսն իրար միացնել ու իրար շնորհավորել այն կապակցությամբ, որ չնայած սպասվող սրընթաց տեղաշարժերի մասին կանխատեսումներին, Հայաստանում ամեն ինչ մնաց անփոփոխ: Ու մենք հանդարտ, աշխարհաքաղաքական իրողություններին անհաղորդ, քայլ առ քայլ ճահճանում ենք:
Եվ անշուշտ անցած շաբաթվա ամենագլխավոր շնորհավորելու առիթը, բարեկամներ. վերջապես պատիվ ունեցանք վայելելու «Սիրուշոուի» վերջին սերիան: Շնորհավոր:
Վահագն ԹԵՎՈՍՅԱՆ
Կարծիքներ