Մասնավոր դպրոցի չերեւացող թանկ առավելությունները

Այս օրերին դպրոցահասակ երեխաներ ունեցող ծնողները մտահոգված են, թե որ դպրոց տանեն իրենց երեխային, որտեղ են պայմաններն ավելի բարվոք եւ կրթությունը` ավելի որակյալ: Այն ծնողները, ովքեր գումարի հետ կապված խնդիրներ չունեն կամ էլ գերզբաղված են, նախընտրում են մասնավոր` վճարովի դպրոցները:

Հայաստանի Հանրապետությունում գործում է շուրջ 1400 դպրոց, մասնավոր դպրոցների թիվը մոտ 50-ն է: Կրթության եւ գիտության նախարարության հանրակրթության վարչության պետ Նարինե Հովհաննիսյանը մեզ հետ զրույցում տեղեկացրեց, որ այս տարի նոր մասնավոր դպրոցներ չեն բացվել: Պետական անվճար դպրոցից մասնավոր դպրոցը տարբերվում է այնքանով, որ այնտեղ դասապատրաստում է տեղի ունենում, եւ երեխաները դպրոցում ավելի երկար ժամանակ են անցկացնում: Այստեղ ավելի փոքր դասարաններ են, եւ ենթադրվում է, որ ուսուցիչն ավելի ուշադիր է յուրաքանչյուր աշակերտի նկատմամբ: Այլ առավելություն կարծես թե չի նկատվում:

Փորձեցինք Երեւանում գործող մասնավոր դպրոցներից ճշտել, թե ինչ արժե այնտեղ սովորելը, եւ վճարած գումարի դիմաց ինչ պայմաններ ու կրթություն են առաջարկում: Մալաթիա-Սեբաստիա վարչական շրջանում` Սեբաստիայի փող. 3/7 շենքի 3-րդ եւ 4-րդ հարկերում գործող «Տաթեւ» մասնավոր դպրոցում դասերից հետո գործում է երկարօրյա դպրոց՝ ժամը 9:00- 17:00-ն: Դպրոցի աշխատակից Սիլվարդ Գմբիկյանը տեղեկացրեց, որ իրենցեդպրոցի առաջին դասարանում սովորելու համար հարկավոր է ամսական վճարել 50 հազար դրամ, երկրորդ դասարանում՝ 53, երրորդ դասարանում` 59 հազար: Վարձավճարի մեջ մտնում է երեքանգամյա սնունդը, ուսումնական տարվա ընթացքում նախատեսված գրքերը, ինչպես նաեւ երխաներին տալիս են օրագրեր: «Դպրոցում կարող են սովորել տարրականից մինչեւ ավագ դպրոցի երեխաները, գումարը տատանվում է` կախված դասարանից,- ասաց Գմբիկյանը` հավելելով, որ դասարաններում աշակերտների թիվը չի գերազանցում 15-ը:- «Տաթեւի» 2-4-րդ դասարանցիները գնում են շախմատի, առաջին դասարանից սկսում են ուսումնասիրել օտար լեզուներ` ռուսերեն, անգլերեն, իսկ 4-րդ դասարանից սովորում են նաեւ ֆրանսերեն»: Գմբիկյանը հավելեց, որ տարրական դպրոցում առանց լրացուցիչ վճարի երեխաներն այցելում են պարի դասընթացների, իսկ միջին դպրոցի երեխաները՝ ձիարշավարան:

«Ալմանախ» մասնավոր դպրոցի գները եւս մատչելի չեն: 1-4-րդ դասարաններում սովորելու համար տարեկան հարկավոր է վճարել 400 հազար դրամ, միջին դպրոցում` 450, իսկ ավագ դպրոցում` 500 հազար: «Վարձավճարն իր մեջ ներառում է դասապատրաստում, տնից դպրոցեհետադարձով երթուղային, իսկ 1-2-րդ դասարանների վարձավճարի մեջ մտնում է նաեւ սնունդը»,-ասաց դպրոցի աշխատակցուհի Հասմիկ Մուրադյանը` հավելելով, որ երեխաների հետ անհատական շփում է տեղի ունենում: «Ալմանախը» գտնվում է Միչուրինի փողոցի 36ե հասցեում: Այստեղ երեխաներին օգնում են դասերը պատրաստել եւ առանց որեւէ մեկի աջակցության ինքնուրույն սովորել: «Դպրոցում շարունակվում է ընդունելությունը, ավելի շատ դիմում են տարրական դասարաններում սովորելու համար»,-ասաց աշխատակցուհին: Շենգավիթ վարչական շրջանի Սեւանի փողոցի 132 շենքում տեղակայված «Փոքրիկ իշխան» կրթահամալիրում կարեւորում են օտար լեզուների ուսուցումը: Կրթահամալիրի տնօրեն Մարիա Խախամյանը տեղեկացրեց, որ գները տատանվում են ամսական 30-50 հազար: Գնային տատանումը կախված է այն բանից, թե երեխան որ դասարան է հաճախում: Գումարը ներառում է սնունդ, տեղափոխում, օտար լեզուների ուսուցում եւ դասապատրաստում: Կրթահամալիրում գործում է նաեւ նախակրթարան:

Աննա ՄԱԹԵՎՈՍՅԱՆ