ՏԵՍՆԵՍ ՏԱՐՈՆՆ ԻՄԱՑԱ՞Վ, ՈՐ ԲԱԿ ԳԱԼՈՎ, ԱՅՍՕՐ ՄԵԿԻ ՀԱՑԸ ԿՏՐԵՑ
Տարոնն այսօր Արաբկիրի թաղամաս պիտի գար՝ շրջակա փոքրիկ երկու բակերի բացման կապակցությամբ: Մինչ նրա գալը Արաբկիրի թաղապետարանից եկան, շենքերի տակ ու գլուխն ուսումնասիրեցին, ցուցումներ տվին, որ շենքերի շրջակայքը լպստվի: Ինչ որ գույնզգույն փուչիկներ ամրացվեցին բակի կանաչ- կարմիր ցանցաճաղերից: Շենքի առաջ հավաքվել էին նոր շորեր հագած երեխաներն ու պատրաստ սպասում էին, որ երբ քեռին բակ գա, ասեն՝ բարով ես եկել: Եռագույնն էլ որպես երկրի խորհրդանիշ ամրացրել էին փուչիկների կողքին: Մի խոսքով մայիսի 1-ի զգացողություն էր: Գալուց կես ժամ առաջ տնից դուրս եկա, մի շատ փոքրիկ կրպակ-բուդկա ունենք՝ Սուրիկի բուդկա են ասում, մի երկու բողկ ու գազար գնելու: Շենքի առաջ ակտիվիստ կանայք էին: Մեկն ինձ ներկայացրեց Տարոնին նվիրված երախտիքի խոսքը. «Շնորհակալ ենք, որ ողջ Հանրապետությունը ծաղկեցրել եք… »: Հետո վառվող աչքերով ինձ նայեց՝ ո՞նց է: - Ի՞նչ գործ ունես Հանրապետության հետ,- ասացի,- դու միայն քո բակի անունից քծնիր: Նեղացավ՝ երևի որ իրեն ճիշտ էի հասկացել: Երբ մտա փոքրիկ բուդկա – կրպակը, որը վարձակալությամբ վերցրել էր մի աղքատ ընտանիք, աշխատող տիկնոջը չտեսա: Աչք ածեցի հազիվ ոտատեղ ունեցող բուդկայի ներսը: Մի երկու պարկ կարտոֆիլ, մի արկղ բադրիջան, մի քիչ սոխ, պոմիդոր, մրգերից՝ մի քանի ողկույզ խաղող… Փոքրիկ ու հնադարյան սառնարանի մեջ պահվում էր գազարն ու կանաչին, ինչ ինձ անհրաժեշտ էր: Բուդկայից դուրս եկա ու տեսա, որ ետևի «ժեշտյա կողի վրա» Սոնիկը կախել է գլուխը: Երբ ձեռքս դրի ուսին, գլուխը բարձրացրեց ու տեսա, որ նա լաց է լինում: Ի՞նչ է պատահել,- հարցրի: - Մի երկու կարտոշկա եմ ծախում, մեզ յոլա տանում,-արտասվելով պատմեց նա,- հազար տեղից վրա են տալիս՝ փող ուզում: Հիմա էլ թաղապետարանն է գալիս ու տուգանում: Մի թուղթ մեկնեց՝ թաղապետարանի առաջատար մասնագետ Ռոբերտ Պողոսյան: Գրել էր, որ եթե բուդկայի շրջակայքը Սոնիկը չմաքրի՝ Տարոնի գալու կապակցությամբ, 10-ից 20 հազար ռուբլի կտուգանվի: Սոնիկը շրջակայքը մաքրում էր, բայց առաջատար մասնագետը շրջակա տարածք էր համարում նաև կողքի շենքի օժանդակ բակային տարածքը, որը տվյալ պետական շենքի, թաղապետարանի ենթակայության տակ էր: Հավաքարարի հաստիքը խնայելով, թաղապետարանի համապատասխան աշխատողը թաղապետարանի պարտականությունը բարդում էր մի խեղճ ու կրակի վրա: Պարզվում է, որ տուգանքը առաջին անգամ չի կատարվում: Վաճառողուհին ստիպված օրվա աշխատած փողը տվել էր մի հավաքարարի, որպեսզի մաքրի պետական շենքի օժանդակ տարածքը: Տեսնես Տարոնն իմացա՞վ որ բակ գալով, այսօր մեկի հացը կտրեց:
ՀԱՍՄԻԿ ԲԱԲԱՋԱՆՅԱՆ
Կարծիքներ