Ավելի բարեկա՞րգ Երևան, թե՞ ավելի այլանդակ մայրաքաղաք

Եթե ոչ վաղ անցյալում շինարարություն կատարող կազմակերպությունը մետաղյա թիթեղներով քողարկում էր կառուցվող «օբյեկտը», ապա այսօր այն վերափոխվել է նկարազարդ պաստառի, որի վրա գրված է. «Ավելի բարեկարգ դարձնենք Երևանը»: Հեղինակը պարզ է՝ Երևանի քաղաքապետարան: Այս կարգախոսի առումով և ընդհանուր առմամբ կառավարության վերին օղակների կողմից վերջերս շրջանառության մեջ մտած շատ կարգախոսներ առօրյա կյանքում հակառակ իմաստ և բովանդակություն են ստանում:

Օրինակ, երբ կառավարությունն ասում է՝ տվյալ ոլորտում բարեփոխում ենք կատարելու, նշանակում է, որ այդ ոլորտը շատ մոտ ապագայում կամ գոյություն չի ունենալու, կամ էլ գործելու է ի չարս ու ի հեճուկս սեփական ժողովրդի: Եթե ուշադրություն դարձնենք մայրաքաղաքի ծայրամասերում ընթացող շինարարություններին, անպայման կնկատենք, որ դրանց գերակշռող մասում կան քաղաքաշինական նորմերի ցցուն խախտումներ: Հետո էլ՝ ծայրամասերն ինչո՞վ են առավել կենտրոնից:

Երբ կարող են կենտրոնը դարձնել մեռած և քարերի շենքերի թագավորություն, ինչո՞ւ նույն քաղաքաշինական նորմերը չկիրառել ծայրամասերում, մանավանդ որ ծայրամասերի նկատմամբ հետաքրքրությունն այդքան շատ չէ: Մինչև գլխի ընկնողները գլխի ընկնեն, իրենք սև գործն ավարտած կլինեն: Բոլորովին վերջերս, ավելի ստույգ՝ աշնան սկզբին, Հալաբյան փողոցի թիվ 35 և 36 շենքերի դիմաց հայտնվեց «Ավելի բարեկարգ Երևան» կարգախոսով պաստառը: Առաջին հայացքից թվում էր, թե պաստառի ներսում ընդամենը սանհանգույց պետք է վերանորոգել: Մյուս կողմից՝ պաստառը զարդարում էր եռահարկ մի շինության նկար, որը զարմանք էր առաջացնում ճարտարապետությունից հեռու ցանկացած մարդու մոտ: Ապագա կառույցը պետք է խցկվեր նշված շենքերի արանքում, իսկ ճակատային մասը կախվեր մայթին:

Հարց է առաջանում. եթե կառուցվի, մարդիկ ինչպե՞ս պետք է ապրեն այդ առանձնատանը, հետիոտնը ինչպե՞ս պետք է անցնի մայթը: Սակայն շատ կարճ ժամանակահատվածում պարզվեց, որ առաջացած բոլոր հարցերն ու խնդիրները եղած-չեղածի նման մի բան են: Եռահարկը կառուցվեց՝ փակելով երկու բազմաբնակարան շենքի և ճակատային մասը, և լույսը: Հարց. լավ, առանձնատան տերը, չգիտես ինչից ելնելով, գումարներ է շաղ տալիս այստեղ, բա քաղաքապետարանում խելքը գլխին մեկը չկա՞ր, որ արգելեր՝ ասելով, որ ընտրված վայրը հարմար չէ առանձնատուն կառուցելու համար: Չեն ասել. շենքը կանգուն է՝ նշանակում է քաղաքապետարանն էլ շահագրգռված կողմ է, եթե ոչ՝ ինչո՞ւ պետք է շինթույլտվություն տար նման վայրում: Կարծում ենք, որ ոչ գեղեցիկ աչքերի համար: Իսկ ինչի համար, որ թույլտվությունը տրված է, ժամանակավորապես բարելավելու է մի քանի հոգու բարեկեցությունը, խաթարելու է ներկա և դեռ չգիտես քանի սերնդի անդորրը:

Նորայր ԳՐԻԳՈՐՅԱՆ