Չլսված բան է՝ մնալ ԱԱԽ անդամ և լինել ԱԱԽ փաստացի ղեկավարի ընդդիմադիր

Հարցազրույց «Նոր ժամանակներ» կուսակցության ղեկավար, քաղաքագետ Արամ Կարապետյանի հետ

- Եթե ամփոփելու լինենք եռյակի այդքան սպասված հանրահավաքը, հնչեցրած ուղերձները, ի՞նչ հետեւություններ կանեք, ի՞նչ պայքար է սա, ո՞ւր է տանելու:

- Ես չեմ կարող ասել, երեւի պետք է մասնակիցը լինել նրանց քննարկման, որպեսզի իմանաս, թե ինչ են անելու: Այն, ինչ որ լսեցի, ասացին, որ մյուս անգամ կասեն: Դրա համար Ֆեյսբուքում գրեցի. «Գնացի հանրահավաք, լսեցի, եկա տուն»:

- Եռյակի ներկայացուցիչները հայտարարում են, որ չեն հրաժարվելու իշխանափոխության պահանջից: Դուք հավատո՞ւմ եք եռյակի խոստումներին:

- Գիտեք՝ ես չգիտեմ եւ չեմ էլ ուզում դրա մեջ մտնել, ես իրենց կարող եմ հաջողություն ցանկանալ: Կարող եմ ընդամենը մի բան ասել՝ որպես զուտ քաղաքագետ. ես շատ երկար փորձեցի փնտրել-գտնել մի դեպք, երբ որ Անվտանգության խորհրդի անդամն ընդդիմադիր է ԱԱԽ փաստացի նախագահին եւ մնում է կառույցի անդամ: Եղել են մարդիկ, ովքեր ընդդիմացել են եւ շատ շուտ հրաժարական են տվել ու դարձել ընդդիմադիր: Բայց մնալով ԱԱԽ անդամ եւ լինել ԱԱԽ փաստացի ղեկավարի ընդդիմադիր, ես այդպիսի բան չտեսա: Կարող եմ միայն մի խորհուրդ տալ. կարծում եմ, որ իրենք իրար հետ ԱԱԽ նիստերին գոնե հանդիպում են, կարծում եմ՝ այդ պահանջները շատ հանգիստ կարելի է ձեւակերպել եւ այդ նիստերից մեկի ժամանակ ներկայացնել: Որքան ես եմ հասկանում, եռյակի շարժիչ ուժը ԲՀԿ-ն է, որի ղեկավարը վարչապետի խնամին է եւ, մյուս կողմից՝ ԱԱԽ անդամ, ես իսկապես չեմ կարողանում հասկանալ գործընթացի իմաստը: Ես ամենայն լրջությամբ եմ ասում, ուզում եմ հասկանալ՝ չի՞ կարելի խնամու հետ խոսել, հետո նոր հարցերը բարձրացնել կամ ԱԱԽ նիստում խոսել, ներկայացնել հարցերը, պատմել եւ սկսել այնտեղից:

- Հետեւաբար, ըստ Ձեզ, ի՞նչ նպատակ է հետապնդում գործընթացը, ո՞ւր կարող է այն տանել:

- Ես իսկապես չեմ կարող ասել, նորից եմ կրկնում՝ կարող եմ միայն իրենց հաջողություն ցանկանալ այն պայքարի մեջ, որը, հավանաբար, իրենք հասկանում են:

- Վարկածներ են նաեւ հնչում եռյակ-իշխանություն պայմանավորվածությունների, դաշտը փակելու, ինչպես նաեւ իշխանությունը կիսելու մասին: Ո՞ր մեկին եք Դուք ավելի շատ հավատում, եւ դրանցից որի՞ համար են հրապարակն զբաղեցնում:

- Իսկապես չեմ կարող պատասխանել, բայց կարող եմ շատ հետաքրքիր մի բան ասել, որ ուշագրավ ամսաթվեր են ընտրվում՝ հանրահավաքի օրվա հետ կապված. հոկտեմբերի 10-ը, ինչպես գիտեք, ԵՏՄ անդամակցության օրն էր եւ, կարելի է ասել, այդ օրվա հավաքն էր, երկրորդ հանրահավաքը հոկտեմբերի 24-ին է, ամենայն հավանականությամբ: Ճիշտ է՝ պաշտոնապես դեռ հաստատված չէ, բայց սպասվում է Սերժ Սարգսյան-Ալիեւ հանդիպումը, սա երկրորդ ֆայլստարտը կարող է լինել: Ես հանրահավաքին ներկա եմ եղել, հետեւել եմ, բայց ինչքան ես գիտեմ, հոկտեմբերի 10-ին լայնամասշտաբ ճանապարհները չեն փակվել, դա, իմ տեղեկություններով, հավաստել են նաեւ եռյակի ներկայացուցիչները: Գիտեք, ես շարունակում եմ մնալ արմատական ընդդիմության դաշտում, բայց չեմ հիշում, եթե արմատական ընդդիմության որեւէ գործիչ փորձի որեւէ հանրահավաքի նույնիսկ իրազեկում անել եւ ծեծի-ջարդի մեջ չընկնի, ճանապարհներ չփակվեն, մարդկանց չձերբակալեն: Եթե դուք հիշում եք այդպիսի դեպք՝ խնդրեմ հիշեցրեք:

- Կա վարկած, որ եռյակը հենց իրական ընդդիմադիրների ճանապարհն է ուզում փակել: Համարելով Ձեզ այդ դաշտի ներկայացուցիչ, զգո՞ւմ եք նման բան:

- Վարկածները կարող են տարբեր լինել, բայց կարող եմ ասել, որ այն, ինչ այսօր կատարվում է, եւ եթե այսպիսին պետք է լինի ամեն ինչ, այս ճանապարհով գնա, զարգացումներն այսպես գնան, Ձեզ կարող եմ հանգստացնել, ինձ նույնպես, որ ոչ մեկի ճանապարհը չեն փակի, ընդհակառակը:

- Իսկ ինչի՞ մասին է խոսում փաստը, որ եռյակը մեծ հաշվով չանդրադարձավ հանրահավաքի հիմնական հարցերին եւ ԵՏՄ պայմանագրին:

- Ես այդ հարցին հիմա չեմ կարող պատասխանել, բայց պատրաստ եմ ապագայում դրանով կիսվել, բայց ապագայում թողնենք պրոցեսները գնան, Հայաստանն ամբողջական միանա ԵՏՄ-ին, դա կլինի հունվարին, եւ հենց այդ ժամանակ էլ ես ձեզ կբացատրեմ եւ կարծում եմ՝ չեմ սխալվի:

- Ասացիք, որ երկրորդ հանրահավաքի օրն էլ պատահական չէ ընտրված, ի՞նչ է սպասվում այդ օրը:

- Եթե Դուք ինձ հարցնեիք գոնե այն պահին, որ հրապարակված կլիներ սահմանադրական բարեփոխումների հայեցակարգը, ես Ձեզ հետաքրքիր վերսիա կասեի, թե ինչով կարող է այս ամենն ավարտվել, եթե նաեւ հստակեցվի, որ Փարիզում հոկտեմբերի 27-ին իսկապես հանդիպում է լինելու, գուցե էլի ինչ-որ բաներ ներկայացնեի, հիմա ես չեմ կարող ոչինչ ասել, որովհետեւ դեռ ամեն ինչ որոշված չէ:

- Հանրահավաքից հետո եռյակի հիմքերը կարծես խարխլվեցին, Րաֆֆի Հովհաննիսյանը նեղացած է եւ հայտարարեց իշխանափոխության միասնական օրակարգ չլինելու մասին, սակայն հույս հայտնեց, որ առաջիկայում կձեւավորեն այդ օրակարգը: Կկարողանա՞ն ձեւավորել, եւ եռյակի քանդվելու հիմքեր տեսնո՞ւմ եք:

- «Ժառանգության»՝ որպես գաղափարակիր կուսակցության (համենայնդեպս, մենք գիտենք, որ նա գաղափար կրող կուսակցություն է եւ դեռեւս չի հայտարարել փոփոխության մասին) գոյությունը եռյակում լիովին փաստարկված չէ: Հասկանում են ներքին քաղաքականությունը, բայց, իշխանափոխության կոչերից բացի, որը, ինչպես «Ժառանգությունը», այնպես էլ ՀԱԿ-ը միշտ են բարձրացրել, մնացած հարցերում «Ժառանգությունը» հարթակում կանգնող գաղափարական մարտիկների հետ ոչ մի ընդհանրություն չունի, թե ինչ կլինի, ոնց կլինի հետո, չեմ կարող ասել: Ու պետք է նորից կրկնեմ, որ ես կողմնակից եմ չխանգարել շարժումներին, հավատացնում եմ ձեզ՝ դրա կարիքը չկա՝ ոչ խանգարելու եւ ոչ էլ օգնելու, շարժումներն ինքնին ձեւավորվում են, տանում են, եւ, ինչպես տեսնում եք, շատ հաճախ կոնկրետ վարկածներ կան, բայց ոչինչ չի փոխվի, հանգիստ հետեւենք, եւ ապագայում, իմ կարծիքով, իրավիճակը կթելադրի (հատկապես տնտեսական) Հայաստանում գործողությունները: