«Տարոն, սիրուն չի» խոսքը դարձավ նախադեպ, սպասում են «Բիբին, սիրուն չի» խոսքին
«Ոչ թալանին» նախաձեռնության անդամները համոզված են, որ Էլեկտրաէներգիայի հնարավոր թանկացումը կարող են կանխել երկրի նախագահ Սերժ Սարգսյանը և վարչապետ Հովիկ Աբրահամյանը: «Նրանք մի խոսքով կարող են լուծել ամիսներ շարունակ ձգվող խնդիրները: Սերժ Սարգսյանի «Տարոն, սիրուն չի» խոսքը դարձավ նախադեպ, որ Մաշտոցի պուրակում չդրվեն բուտիկներ»,- այսօր լրագրողների հետ հանդիպման ժամանակ ասաց «Ոչ թալանին» նախաձեռնության համակարգող խմբի անդամ` Մաքսիմ Սարգսյանը: Նախաձեռնությունը հունիսի 19-ին մեծ հավաք և երթ է հրավիրում և օրը համարում է պահանջատիրության օր: «Նախորդ երթով մենք ցույց տվեցինք, որ պայքարում ենք, իսկ այս երթով ցույց ենք տալու, որ տեր ենք մեր պայքարին և չենք նահանջելու»,-ասաց Մաքսիմ Սարգսյանը: «Ոչ թալանին» նախաձեռնության անդամ Լևոն Զաքարյանն էլ ասում է, որ իրենք քննարկելու որևէ բան չունեն, կառավարության հետ իրենք պահանջ են ներկայացրել և ամեն ինչ անելու են, որ այն իրագրոծվի։
«Մենք չենք նահանջելու և շարունակելու ենք մեր պայքարը, մինչև հասնենք մեր ուզածին»,-ասաց նա: Անդրադառնալով ԱԺ փոխնախագահ Էդուարդ Շարմազանովի այն հայտարարությանը, թե էլեկտրաէներգիայի սակագնի բարձրացման հետ կապված քննարկումը փակ է անցկացվելու, որովհետեւ շատերը այն շոուի կվերածեն, Լևոն Զաքարյանը նշեց, որ իրենք պատրաստ են շոուների, և ԱԺ-ում միշտ էլ շոուներ են լինում: Ի դեպ, այսօրվա ասուլիսի մասնակիցներն էլցանցերի տնօրենին խոստացան թարգմանված տրամադրել այսօրվա ասուլիսի ձայնագրությունը՝ առանց գումարի, քանի որ թարգմանվելու դեպքում ծախսերը մի քանի միլիոնով կավելանան:
Կարծիքներ