Արդարադատության հին եւ նոր նախարարների կարողությունը
Արդարադատության վերջերս ազատված եւ բոլորովին վերջերս նշանակված հին եւ նոր նախարարները Բարձրաստիճան անձանց էթիկայի հանձնաժողով են ներկայացրել իրենց հայտարարագրերը: Պաշտոնազուրկ նախարար Հովհաննես Մանուկյանը ներկայացրել է պաշտոնը դադարեցնելու հայտարարագիրը, իսկ նրա փոխարեն նշանակված նախարար Արփինե Հովհաննիսյանն էլ՝ պաշտոնը ստանձնելու հայտարարագիրը:
Միանգամից նշենք, որ երկու հայտարարագրերն էլ առանձնապես էական փոփոխությունների չեն ենթարկվել: Արփինե Հովհաննիսյանն էլ, Հովհաննես Մանուկյանն էլ շարժական գույքի մասով շարունակում են տնօրինել իրենց հիբրիդային ու դիզելային Toyota-ները, դրամական միջոցներն էլ են նույնը։ Այսպես. հուլիս ամսին պաշտոնանկ եղած Հովհաննես Մանուկյանը շարունակում է վարել 74 հազար դոլարով գնած դիզելային շարժիչով Toyota Land Cruiser 200 ամենագնացը: Սա, հիշեցնենք, Մանուկյանի անձնական մեքենան էր, որը երկար ժամանակ նա շահագործում էր որպես ծառայողական ավտոմեքենա, մինչեւ որ վերջին ամիսներին նոր, պետական ծառայողական ավտոմեքենա գնեց՝ Toyota Camry: Այն այժմ ծառայում է Արփինե Հովհաննիսյանին: Մանուկյանի դրամական միջոցներն էլ առանձնապես չեն աճել կամ նվազել: Նա պաշտոնը դադարեցնելու օրվա դրությամբ, ըստ հայտարարագրի, ունեցել է 5 միլիոն դրամ, 400 հազար դոլար եւ 300 հազար եվրո: Իսկ հունվարի 1-ից մինչեւ պաշտոնը դադարեցնելու օրը նրա ստացած եկամուտներն ընդհանուր հաշվով կազմել են 20 մլն. 135 հազար դրամ:
Մանուկյանի հայտարարագրին հուլիսին, պաշտոնանկությունից օրեր առաջ, մենք էլի էինք անդրադարձել եւ պետք է փաստենք, որ նրա եկամուտներն ու դրամական միջոցներն էական փոփոխություններ այս ամիսներին չեն կրել:
Ի տարբերություն իր նախորդի՝ անհամեմատ ավելի համեստ է նորանշանակ նախարար Արփինե Հովհաննիսյանի հայտարարագիրը: Նա շարունակում է վարել իր հին ավտոմեքենան՝ 2011 թվականի արտադրության հիբրիդային շարժիչով Toyota Prius-ը, որը գնել է 13 միլիոն 860 հազար դրամով: Հարկային տարում նորանշանակ նախարարի եկամուտները պաշտոնը ստանձնելու օրվա դրությամբ մի փոքր նվազել են՝ 6 միլիոն 735 հազար դրամից իջնելով 5 մլն. 789 հազար դրամի: Իսկ պաշտոնը ստանձնելու օրվա դրությամբ Հովհաննիսյանի դրամական միջոցները, ըստ նրա ներկայացրած հայտարարագրի, կազմել են 1 մլն. 500 հազար դրամ:
Վահե ՄԱԿԱՐՅԱՆ
Կարծիքներ