Բա էլ ո՞ւր մնաց մեր ավանդույթները, տղուն պատիվ չի բերում, որ աղջիկը ամուսնության առաջարկ անի
Ըստ հին իռլանդական ավանդույթի՝ չորս տարին մեկ օրացույցում հայտնվող փետրվարի 29-ին աղջիկները իրավունք ունեն ամուսնության առաջարկ անել տղաներին, և տղամարդիկ իրավունք չունեն հրաժարվելու: Բայց եթե հրաժարվեն, ապա պարտավոր են տուգանք վճարել 100 £-ի չափով: Տղամարդիկ, եթե Ձեր սիրելի էակին այս օրը տեսնեք կարմիր կիսաշրջազգեստով կամ պարզապես զգեստով, ապա դա կխոսի այն մասին, որ նա հավանաբար ուզում է Ձեզ ամուսնության առաջարկություն անել: Իսկ ինչպե՞ս են իռլանդական այս ավանդույթին վերաբերում հայ աղջիկներն ու տղաները:
Լիլիթը, ով ունի ընկեր, տեղյակ է այս ավանդույթի մասին, սակայն չի պատրաստվում ամուսնության առաջարկություն անել ընկերոջը.«Որովհետև մեր հայ մտածելակերպի մեջ չկա այն հասկացությունը, որ կինը պետք է տղամարդուն առաջարկություն անի, ես համբերատար կսպասեմ կողակցիս կողմից առաջարկության, բայց երբևէ նման քայլի ինքս չեմ դիմի»: Իսկ Անահիտը թեեւ չի պատրաստվում ընկերոջը ամուսնության առաջարկություն անել, այնուամենայնիվ, կարծում է, որ գեղեցիկ ավանդույթ է և հետաքրքիր կլինի, որ Հայաստան նույնպես գա այդ սովորույթը.«Հայ տղաների ռեակցիան չեմ պատկերացնում, չեմ կարող պատկերացնել` ինչպես կարձագանքեն, որովհետև այստեղ հստակ տղաների տեսակներ կան, իսկ եթե չորս տարի հետո ես ամուսնացած չեղա, ինքս կանեմ առաջարկություն»:
Գարիկը դեմ է այս ամենին. «Բա էլ ո՞ւր մնաց մեր ավանդույթները, եթե պիտի գնանք Իռլանդիայի ավանդույթներին տեր կանգնեք, նախ և առաջ էդ տղուն պատիվ չի բերում, որ աղջիկը կանգնի իրեն առաջարկություն անի ամուսնության, հետո էլ եթե տղան գտնի, որ ժամանակն ա ընտանիք կազմելու, էլ իռլանդական բարքերին չի նայի»: Մեզ հետ զրույցում տղաներից մեկը, ով չցանկացավ իր անունը նշել, ասաց, որ իր համար շատ զվարճալի կլիներ այդ պրոցեսը, ու հետաքրքիր` կիմանար, թե ով է իրեն սիրում և ուզում կյանքը իր հետ շարունակել:
Իսկ ինչո՞ւ ոչ: Ի՞նչ տարբերություն, եթե տղան առաջարկում չի անում կամ մտքով անգամ չի անցնում ամուսնության առաջարկություն անել աղջկան, ինչո՞ւ աղջիկը չանի այդ քայլը առաջինը: Այստեղ կարևորը ոչ թե հպարտությունն է, ոչ հայեցի մտածելակերպը, այլ ցանկությունների ազատություն տալն ու երազանքներին հասնելը: Դե, աղջիկներ համարձակ եղեք Ձեր քայլերում, որովհետև վաղն արդեն գարնան առաջին օրն է, իսկ առիթը սարերի ետևում է, չորս տարի սպասել է պետք լինելու:
Աննա Պապիկյան
Կարծիքներ