Ինչո՞ւ է վարչապետը թոռնիկին տանում Շիրակացի ճեմարան (ֆոտոշարք)
Վարչապետ Հովիկ Աբրահամյանն այսօր` սեպտեմբերի 1-ին, այցելեց «Շիրակացի» կրթահամալիր: Նա իր թոռնիկի` Ջուլիետայի հետ էր, որն այս տարի առաջին դասարան կգնա հենց այս կրթահամալիրում: Նկատենք, որ նրա մյուս թոռնիկները ևս այստեղ են սովորում:
Hraparak.am-ի հարցին, թե ինչու որոշեց իր թոռնիկին հենց այս դպրոցն ուղարկել ուսման, Հովիկ Աբրահամյանն ասաց. «Քանի որ իր մայրիկն այս դպրոցում է սովորել, դրա համար որոշեցինք իրեն էլ այս դպրոցը բերել»: Լրագրողների դիտարկմանը, թե այս դպրոցում վարձը բավականին բարձր է` տարեկան շուրջ 2 մլն դրամ, ի՞նչ միջոցներով են վճարելու այդքան մեծ գումար, վարչապետն ասաց. «Կմտածենք, միջոցների մասին կհայտնենք»:
Վարչապետին ուղեկցում էր կինը` Ջուլիետա Աբրահամյանը, հարսը, ով Գագիկ Ծառուկյանի դուստրն է: Դահլիճում ելույթ ունեցավ «Շիրակացի» կրթահամալիրի տնօրեն Աշոտ Ալիխանյանը, նա շնորհավորեց սեպտեմբեի 1-ի առթիվ, այնուհետեւ տեղի ունեցավ փոքրիկ հանդես-ներկայացում, որին ներկա էր նաեւ վարչապետը:
Ի դեպ, այս դպրոց է հաճախում նաև առաջին նախագահ Լեւոն Տեր-Պետրոսյանի թոռնիկը:
Վահե ՄԱԿԱՐՅԱՆ
Լուսանկարները` «Հրապարակի»
Կարծիքներ