Ինչո՞ւ Ոստիկանությունը հանրությանը չէր տեղեկացնում ռուս զինծառայողի անհետացման մասին

Մենք արդեն տեղեկացրել էինք, որ Գյումրիում լուրեր են շրջանառվում, որ արդեն մի քանի օր է՝ ռուսական 102-րդ ռազմաբազայից զինծառայող է փախել: Քաղաքացիներից ոմանց պնդմամբ՝ զինվորական ոստիկանները Գյումրու 8-րդ թաղամասում տեղակայված հիմնարկներից պահանջել են ներքին տեսագրման սարքերի նկարահանումները:

Լուրն ստուգելու համար փորձել էինք կապվել Ոստիկանության Գյումրու բաժանմունքների, նաև ՀՀ ոստիկանության հասարակայնության հետ կապի և լրատվության վարչության պետ Աշոտ Ահարոնյանի հետ, սակայն մեր բոլոր ջանքերն ապարդյուն էին:

Ընդամենը րոպեներ անց, սակայն, РИА Новости գործակալությունը, հղում կատարելով ոստիկանության Շիրակի մարզային վարչությանը, պարզաբանումներ ներկայացրեց Գյումրու 102-րդ ռազմական բազայից անհետ կորած ռուս զինվորականի մասին: Ըստ հաղորդման, անհետ կորած զինվորականը պայմանագրային զինծառայող Դմիտրի Լոշմանովն է, ով ապրում է հանրակացարանում և անհետացել է գնումներ կատարելու նպատակով խանութ գնալուց հետո:

Այս ողջ պատմության մեջ անհասկանալի է միայն, թե ինչու էին հայ իրավապահները ընդհատակ անցել և հանրությանը չէին տեղեկացնում ռազմաբազայից ռուս զինծառայողի անհետացման մասին: