Հյուրընկալ Չինարիում բոլոր բարենպաստ պայմաններն ստեղծված են արցախցիների համար

Արցախցիների բռնի տեղահանության առաջին իսկ օրից Տավուշի մարզի Չինարի վարչական շրջանի ղեկավարն իր աշխատակիցների, ընտանիքի անդամների ու ընկերների հետ անցավ գործի՝ գյուղում պայմաններ ստեղծելու՝ արցախցիներին ընդունելու համար: Սամվել Սաղոյանն անձամբ դիմել է դրսում՝ ՌԴ-ում, Հոլանդիայում եւ տարբեր երկրներում ապրող չինարեցիներին, որոնց տներում ապրող չկա, դռները փակ են, եւ ստացել է նրանց համաձայնությունը՝ տներն առանց վարձավճարի արցախցիներին հատկացնելու համար:

Բոլորը մեծ սիրով համաձայնել են: Գյուղացիներն էլ համատեղ ուժերով մաքրել, կարգի են բերել տները, իրենց եղածից լրացրել կենցաղային անհրաժեշտ պարագաներով, թարմ անկողիններով: Մի խոսքով՝ տները կազմ ու պատրաստ սպասում են իրենց նոր բնակիչներին: Սամվել Սաղոյանն ասում է, որ անգամ էլեկտրաէներգիայի եւ գազի հարցերն է կարգավորել համապատասխան կառույցների հետ, որպեսզի մարդիկ առանց հոսանքի ու գազի չմնան: Նույնիսկ ձմեռվա վառելիք ցախի մասին է հոգացել, որ մարդիկ ձմռանը չմրսեն: Իսկ Մոսկվայում ապրող չինարեցիների համայնքը երաշխավորել է, որ իրենք էլ կօգնեն նման ընտանիքներին, միայն թե նրանք գան իրենց գյուղում ապրեն: Չինարիում լուծված է նաեւ աշխատատեղերի խնդիրը՝ հարեւան Այգեձոր գյուղում կա պահածոների գործարան, ձեռնոցի գործարան: Կանայք ու տղամարդիկ առանց աշխատանքի չեն մնա: Անվարձահատույց կտրվեն նաեւ հողատարածքներ, անասնագոմեր:

Արցախում զինվորական կյանքին սովոր տղամարդիկ էլ կարող են դառնալ պայմանագրային զինծառայողներ: «Եւ իրենք կապահովվեն ամեն ինչով, տան վարձ չեն տա, ապրելը հեշտ կլինի, եւ սահմանամերձ գյուղը Հայաստանի թիկունքն ավելի ամուր կպահի».- ասում է Սամվել Սաղոյանը: Բայց նեղսրտում է, որ շատերն իրենց չքնաղ Չինարիում չեն ուզում ապրել, այլ գերադասում են դաշտային Մասիսը՝ իր գյուղերով: Արցախցիներն ասում են, որ չեն ուզում նորից սահմանի բերանին ապրել, հոգնել են պատերազմներից, ուզում են, որ իրենց երեխաներն այլեւս վախի մեջ չապրեն: Եւ այս իրավիճակում ոչ ոք չի կարող երաշխավորել, որ վաղը Չինարին չի հայտնվելու Արցախի վիճակում եւ հաշված ժամերի ընթացքում չինարեցիները չեն տեղահանվելու` տեղափոխվելով դեպի Հայաստանի խորք: Այնպես որ մարդկանց չի կարելի մեղադրել, որ ուզում են Մասիսում հիմնվորվել, չնայած Չինարիում այս պահին ավելի լավ պայմաններ են առաջարկում: