«Վերածնվող Հայաստանը» վերակազմավորման փուլում է
2022 թվականի նոյեմբերին պատգամավորական մանդատը վայր դրեց «Հայաստան» խմբակցության պատգամավոր Վահե Հակոբյանը: «Վերածնվող Հայաստան» կուսակցության նախագահն ու փոխնախագահներ Հռիփսիմե Ստամբուլյանն ու Ելենա Կիրակոսյանը, հրաժարվելով մանդատներից, հարցազրույցներ էին տալիս, հայտարարություններ անում, որ չեն լքում խորտակվող «նավն» ու շարունակելու են իշխանությունների դեմ պայքարը: Անցել է 4 ամիս: Հասարակությունն արդեն, հավանաբար, մոռացել է նրանց էլ, նրանց խոստումներն էլ, քանզի նրանք պայքար, որպես այդպիսին, չեն ծավալում: «Հրապարակը» զրուցել է Վահե Հակոբյանի հետ:
- «Հայաստան» դաշինքին ոմանք գուցե նաեւ Ձեզ համար էին ձայն տվել, Ձեր թիմի, Ձեր կուսակցության համար, սակայն դուք վայր դրեցիք մանդատները, պնդելով, որ «պատերազմի» դաշտը չեք լքում: Ինչո՞ւ պասիվացաք: Վարչապետ Նիկոլ Փաշինյանն էլ այսօր ասուլիսով է հանդես գալիս, տեսակետ կա, որ Արցախում առաջիկայում նոր ինտեգրացիոն զարգացումներ են սպասվում, և ասուլիսի բուն նպատակը հենց դա է: Չե՞ք ցանկանում այդ մասին խոսել:
- Վարչապետի աթոռը զբաղեցնող Նիկոլ Փաշինյանը` սա շեշտենք: Ես դա որևէ կերպ չեմ վերագրում ոչ ակտիվությանը, մենք պարզապես վերակազմավորման փուլում ենք գտնվում, միգուցե վերջին մեկ ամսվա մեջ մեր հանրային ելույթները քիչ են եղել, և՞․․․
- Ի՞նչ եք անում այժմ, ինչո՞ւ եք վերակազմավորում կուսակցությունը: Ի՞նչ քայլեր եք ձեռնարկել:
- Չեմ կարող ասել:
- Նոր թի՞մ եք ձևավորում:
- Այո….
- Դուք ընդդիմադիր գործիչ եք, սակայն որևէ քայլ կարծես չեք ձեռնարկում: Համենայնդեպս, տեսանելի չեն Ձեր քայլերը:
- Ի՞նչ քայլ եք պատկերացնում, օրինակ:
- Դուք ունեք թիմ, ռեսուրսներ, ցանկացած տեսակի պայքար կարող է ընդունելի լինել հասարակության կողմից: Դրանք կարող են փողոցային պայքարի տեսքով լինել կամ այլ ձևով.
- Մենք ենք մեր մարտավարությունը որոշում: Մենք ենք որոշում` ինչ անել, շուտով կլսեք:
- Իսկ ի՞նչ մարտավարություն եք մշակել: Արցախի՝ Ադրբեջանին ինտեգրացիայի թեման է այժմ օրակարգում:
- Նիկոլն ու իր թիմը շարունակում են դավաճանական ուղին: Նա ձեռքերը լվացել է Արցախից և պնդում է, որ Արցախը պետք է լինի Ադրբեջանի կազմում, այդքան մի բան:
- Ի՞նչ անել` Նիկոլ Փաշինյանի գործողությունները կանխելու համար:
- Հանրային կոնսոլիդացիա, միմիայն դա: Այդ մասին ես խոսել եմ բազմիցս: Դեկտեմբերի 10-ին Արցախում էի, եղավ նաև «Լույս թունելի վերջում» հարթակի քննարկումը, հետո` նաև Երևանում: Կոնսոլիդացիայի պետք է հասնել ամեն գնով:
- Խորհրդարանական ընդդիմությունը ևս պասիվացել է, գուցե նրանց հե՞տ կոնսոլիդացվեք:
- Ես խորհրդարանական ընդդիմության հետ որևէ կապ չունեմ, խնդրում եմ ինձ իրենց մասին մի հարցրեք:
- Առաջիկայում ե՞րբ սպասենք Ձեր վերակազմավորված թիմի գործողություններին:
- Շուտով: Չեմ կարող ասել այլ բան:
- Առաջիկայում Սիսիան քաղաքում ընտրություններ են լինելու: Չե՞ք մասնակցելու որեւէ ձեւով:
- Չեմ տեսնում նման անհրաժեշտություն:
- Ձեր թիմակիցները` Հռիփսիմե Ստամբուլյանը, Ելենա Կիրակոսյանը, ինչո՞վ են զբաղվում այժմ: Նրանք ևս պասիվացել են:
- Զբաղվում են իրենց անձնական և կուսակցական գործերով:
- Չե՞ք կարծում, որ հասարակությունը կարող է հիասթափվել ձեր այս պասիվ կեցվածքից:
- Ումի՞ց հիասթափվի:
- Օրինակ, հենց ձեզանից, ընդդիմությունից:
- Ինձ տարանջատեք ընդդիմադիրներից, այո, ես էլ եմ ընդդիմադիր դաշտում, սակայն ես արտախորհրդարանական ընդդիմադիր եմ: Ճիշտն ասած` էդպիսի մտավախություն չունեմ:
- Մարդիկ Ձեզ ընտրել էին, Ձեզ հետ հույսեր էին կապել….
- Ես իմ քայլերն ինձ ընտրողների հետ համաձայնեցրել եմ:
- Բոլորի հետ համաձայնեցրե՞լ եք:
- Ում հետ որ կարողացել եմ՝ նրանց հետ, ովքեր վստահել են ինձ, ընտրել են։
Կարծիքներ