Արսեն Զախարյանը կգա Հայաստան ՀՀ քաղաքացիություն ստանալու համար․ սենսացիոն մանրամասներ Զախարյանի տրանսֆերի շուրջ ստեղծված իրավիճակից

Հանրահայտ մարզական լրագրող Ֆաբրիցիո Ռոմանոն նոր մանրամասներ է հայտնել Մոսկվայի «Դինամոյի» հայազգի կիսապաշտպան Արսեն Զախարյանի տրանսֆերի շուրջ ստեղծված իրավիճակից։

Լոնդոնի «Չելսին», Ռոմանոյի պնդմամբ, շարունակում է ջանքեր գործադրել, որպեսզի ֆուտբոլիստը հայտնվի ազնվականների կազմում։ Ըստ լրագրողի՝ հենց լոնդոնյան ակումբն է ֆավորիտը Զախարյանի տրանսֆերը գնելու հարցում։ Ռուսական մարզական լրատվամիջոցներն էլ գրում են, որ մյուս ամիս Զախարյանը ժամանելու է Հայաստան՝ ՀՀ անձնագիր ստանալու համար։ Սա թույլ կտա Զախարյանին Անգլիայում շատ ավելի հեշտ աշխատանքային թույլտվություն ստանալ։ Տարբեր հրապարակումների համաձայն՝ սա ամենևին չի նշանակում, որ Զախարյանը պատրաստվում է խաղալ Հայաստանի հավաքականում, ավելին՝ շարունակելու է լինել Ռուսաստանի հավաքականի ֆուտբոլիստ, քանի որ այս պահին գոնե խոսք չկա մարզական քաղաքացիության փոփոխության հետ կապված։

Նշվում է նաև, որ «Չելսիի» ղեկավարությունը ևս կողմ է, որպեսզի ֆուտբոլիստը մնա Ռուսաստանի հավաքականում, քանի որ սա հնարավորություն կտա Զախարյանին ավելի շատ ժամանակ տրամադրել անգլիական ակումբին, իսկ Ռուսաստանի հավաքականի նկատմամբ ռուս-ուկրաինական պատերազմով պայմանավորված, հիշեցնենք, պատժամիջոցներ են կիրառվում։ Նշվում է նաև, որ տրանսֆերի համար պահանջվող գումարը հնարավոր է «Չելսին» փոխանցի հենց հայկական բանկերից մեկի միջոցով։ Զախարյանի ընտանիքը, նշենք, Արցախից է՝ Մարտակերտից: Արցախյան առաջին պատերազմից հետո են որոշել տեղափոխվել Ռուսաստան, որտեղ էլ՝ Սամարայում, 2003 թվականի մայիսի 26-ին ծնվել է հայազգի աստղը։