Դիտորդ չի եղել, սակայն պնդել է. ընտրախախտումներ Գյումրիում
Չնայած նրան, որ Գյումրիում առերևույթ ընտրությունները խաղաղ են ընթանում, այնուամենայնիվ որոշ խախտումներ արդեն իսկ գրանցվել են: Դիտորդներն ահազանգում են լուրջ խախտումների մասին: Հելսինկյան կոմիտեի դիտորդն արձանագրել է, որ առավոտյան 08:15 սահմաններում Գյումրու 31/34 ընտրատեղամաս է ներկայացել Յազիչյան Աննա Կարապետի անվամբ քաղաքացին եւ հայտնել է, որ հանդիսանում է «Բարգավաճ Հայաստան» կուսակցության կողմից ուղարկված դիտորդ, սակայն վկայականի վրա նշված է եղել «Աբովյանի ուսանողական խորհուրդ»:
Դիտորդը պահանջել է հանձնաժողովի նախագահից, որպեսզի տվյալ փաստը արձանագրվի գրանցամատյանում, սակայն պահանջը մերժվել է: ԿԸՀ-ի կայքից պարզվում է, որ տվյալ կազմակերպության դիտորդների ցանկում այդ անվամբ դիտորդ գրանցված չէ:
Գյումրու մի շարք ընտրատեղամասերում դեռևս փակցված են քարոզչական պաստառներ: Մինչդեռ, ըստ գործող կանոնակարգի, ընտրության օրը չի թույլատրվում փակցնել նախընտրական պաստառներ, այն էլ տեղամասային կենտրոնների հարակից տարածքներում:
Գյումրու 31/29 , 32/32 ընտրատեղամասերում նմանատիպ խախտումներ գրանցվել են: 31/29 ընտրատեղամասում ընտրողների ցուցակների կողքին փակցված է եղել «Իմ քայլը» դաշինքի քարոզչապաստառները, որոնք հեռացրել են` դիտորդների դիտարկումներից հետո:
Նշենք, որ Գյումրիում ընտրողները դեռևս պասիվ են: Դա է վկայում նաև ժամը 11:00-ի ԿԸՀ տվյալները, ըստ որի՝ Շիրակում ընտրությանը մասնակցել են ընտրության իրավունք ունեցողների 5 տոկոսից քիչ ավելին:
Կարծիքներ