ՄԱԿ-ը ունի ֆինանսական միջոցներ, որոնք կբավականացնեն մինչեւ օգոստոս ամսվա վերջը։ Հարկ է, որ անդամ երկրները կատարեն իրենց ֆինանսական պարտավորությունները կանոնավոր բյուջեն լցնելու համար։ Այլապես, սեպտեմբերից գլոբալ այդ կառույցում կարող է սկսվել ֆինանսական ծանր վիճակ։ Այս մասին հայտարարել է ՄԱԿ Գլխավոր քարտուղարի օգնական Չանդրու Ռամանաթանը, ով նաեւ իրականացնում է կառույցի ֆինանսական վերահսկիչի պարտականությունները։
Պաշտոնյան ասել է, որ նույնիսկ այն դեպքում, եթե որոշակի վճարումներ կատարվեն, այնուհանդերձ՝ տարին կփակեն զրոյական վիճակում։ Ֆինանսական խնդիրը ՄԱԿ-ում սկսվել էր այն բանից հետո, երբ Միացյալ Նահանգները հրաժարվել էր մուծումներ կատարել կանոնավոր բյուջեում, ինչպես նաեւ՝ կրճատել էր կամավոր ֆինանսական հատկացումները վերջինիս ենթակայության ներքո գործող կառույցներին։
