Առուշ Առուշանյանը քրեական հանցագործ չէ, բայց գորիսեցիները հարգում են քրեական հեղինակությանը

Իշխանական պատգամավոր Նարեկ Բաբայանից հետաքրքրվեցինք, թե ինչպես է գնահատում Գորիսում իրենց պարտությունը, վերլուծե՞լ են, թե ինչպես ստացվեց, որ կալանավայրում գտնվող թեկնածուն՝ Առուշ Առուշանյանը, հաղթեց իրենց՝ ամբողջ ռեսուրսով քարոզարշավի նետված իշխանություններին։ Բաբայանը փորձեց սառը արձագանքել իրենց պարտությանը, միեւնույն ժամանակ ակնարկեց, թե վերլուծելու նյութ է այն, որ գորիսեցիները քրեական ենթամշակույթի կրող են ու իրենց ձայնը, ըստ էության, տվել են քրեական հեղինակության։ Երբ փորձեցինք հստակեցնել՝ Առուշ Առուշանյանը քրեական հանցագո՞րծ է, կամ՝ նրան քրեական ենթամշակույթ կրող ա՞նձ է համարում, Բաբայանը փորձեց մանեւրել, որ չասի, թե իր ակնարկն ուղիղ ում էր ուղղված։

- ՏԻՄ ընտրություններում որոշ համայնքներում ՔՊ-ն հաղթեց, որոշ համայնքներում պարտվեց։ Հատկապես շատ քննարկվեց Գորիսում ձեր պարտությունը։ Դուք սա ինչո՞վ եք բացատրում, վերլուծե՞լ եք պատճառները։

- Տարբեր տեղեր տարբեր հանգամանքների բերումով՝ կարող եմ ասել։ Դեռ երկար է պետք վերլուծել, բայց, կարծում եմ, արտառոց որեւէ բան տեղի չի ունեցել։ Էնպես չէ, որ մենք կարծում ենք՝ ամենուրեք եւ պարտադիր կերպով միայն ՔՊ-ն պիտի հաղթի։

- Բայց դուք շատ ջանասիրաբար էիք լծված այդ ընտրություններում հաղթանակի հասնելու խնդրին, տպավորություն էր, թե թասիբի հարց է ձեզ համար հատկապես Գորիսում հաղթանակ տանելը։

- Նման տերմիններ քաղաքականության մեջ տեղին չեն։ Մենք ամենուրեք ջանասիրաբար ենք լծված եւ լծվելու ենք։

- Ամեն դեպքում, Առուշ Առուշանյանը, գտնվելով կալանքի տակ, հաղթեց ամբողջ ռեսուրսով քարոզարշավ իրականացնող իշխանական թիմին։

- Ես չգիտեմ՝ Դուք ինչ նկատի ունեք «իշխանական ռեսուրս» ասելով, որովհետեւ էդ ռեսուրս ասվածը դեռ պետք է հասկանալ՝ ով ինչ ռեսուրսների է տիրապետում։

- Օրինակ՝ պատգամավորներով, մարզպետով քարոզարշավի մեջ էիք, նաեւ տեղեկություն տարածվեց, որ Գորիսում եւ Գյումրիում սոցիալական աջակցություն եք բաժանել, որը գուցե քողարկված ընտրակաշառք է եղել։

- Եկեք՝ ստերի եւ ասեկոսեների մասին մի բարձրաձայնեք։

- Բայց չեն հերքել ձեր թիմակիցները։

- Իսկ, կներեք, եթե ինչ-որ մեկն ասի, որ Դուք ուղտ եք, Դուք կհերքե՞ք։

- Ինձ չեն կարող ասել, իմ դեմքին նայելով՝ դժվար թե նման բան ասեն։

- Չէ, բայց եթե ասեն, Դուք կհերքե՞ք։

- Չեմ կարծում, թե որեւէ մեկը համարձակություն կունենա ինձ նման բան ասել։

- Հարցը համարձակության մասին չէ, հարցը նրա մասին է, որ չի կարելի ստերի մասին բարձրաձայնել։

- Պարոն Բաբայան, խոսքը ստի մասին չէ, այլ այն մասին, որ Գյումրիում, օրինակ, ձեր քաղաքապետի թեկնածուն ասել է՝ այդ բաժանված 50 հազար դրամները սոցիալական աջակցություն են եղել։

- Ո՞ւմ կողմից, ի՞նչ աջակցության մասին է խոսքը, ո՞ւմ է բաժանվել։

- Քաղաքացիներին՝ իշխանության կողմից։

- Չէ, «իշխանությունը» վերացական հասկացություն չէ, անձամբ ո՞ւմ կողմից է բաժանվել։

- Չեմ կարող ասել, թե անձամբ ում կողմից։ Հարցը հետեւյալն է․ ընտրություններից առաջ պետությունը, օգտագործելով պետական բյուջեի ռեսուրսները, սոցիալական աջակցություն է բաժանում քաղաքացիներին, որը կարող է դիտվել որպես խրախուսանքի կամ ընտրակաշառքի միջոց։

- Եթե խոսքը սոցիալական աջակցության մասին է, որը տրամադրվում է պետության կամ տեղական ինքնակառավարման մարմինների կողմից, դրանք ընտրությունների հետ կապ չունեն։

- Բայց դրանք ընտրություններից առաջ են լինում։

- Բայց ընտրություններից առաջ 5 տարի կամ 4 տարի միշտ լինում են նման բաներ, դրա համար ընտրություններից առաջ ցանկացած ժամանակահատվածում կամ հավասարաչափ կարող են բաժանված լինել, ոչ թե բաժանված լինել, այլ տրվել աջակցություններ, ինչի՞ պետք է դա կապել անպայման ընտրությունների հետ։

- Նախկինում էլ էին նման բաներ լինում, եւ ձեր թիմը քննադատում էր այդ երեւույթը։

- Ուրեմն, ցանկացած քննադատություն պետք է լինի առարկայական ու փաստարկված եւ ոչ թե սենց գաք, ինչ-որ բան ասեք եւ հիմքերը չբերեք։

- Լավ, դուք պատրա՞ստ եք աշխատել Առուշ Առուշանյանի հետ՝ որպես նորընտիր համայնքապետ, եւ շնորհավորել նրան։

- Առուշ Առուշանյանը կալանավորված է, եթե չեմ սխալվում։

- Բայց ժամանակավոր կալանքը դեռ դատավճիռ չէ։

- Դե, եկեք սպասենք դատարանի վերջնական որոշմանը։

- Ի դեպ, ինչպե՞ս եք պատկերացնում՝ ժողովրդի կողմից ընտրված քաղաքապետը պետք է մնա կալանքի տա՞կ։

- Կարծում եմ՝ դատարանը պետք է որոշի, եւ եթե դատարանը որոշի, որ պետք է մնա կալանքի տակ, կամ սահմանի, որ նա պետք է ազատազրկվի, ուրեմն պետք է ազատազրկվի։

- Տեսեք` իրավապահ մարմինները նրան մեղադրում են Քրեական օրենսգրքով նախատեսված ինչ-որ արարքների մեջ, բայց գորիսեցիները դարձյալ իրենց վստահության քվեն տվեցին նրան։ Սա Ձեզ համար վերլուծելու ցուցի՞չ է։

- Այո, վերլուծելու ցուցիչ է, կարծում եմ՝ մեծ խնդիր կա քրեական ենթամշակույթի հետ կապված, որովհետեւ Հայաստանի Հանրապետությունում քրեական ենթամշակույթը ոչ միայն Գորիսում, այլեւ շատ տեղերում դեռեւս շատ խորը արմատներ ունի։

- Կարծում եք՝ քրեական հեղինակությա՞ն են ձայն տվել գորիսեցիները։

- Կարծում եմ՝ քրեական ենթամշակույթը ենթամշակույթ է եւ շատ քաղաքացիների մեջ է թափանցված։

- Այսինքն՝ Դուք ունեք կանխավարկած, որ Առուշ Առուշանյանը քրեական հանցագո՞րծ է։

- Ոչ, քրեական հանցագործ չէ, ես խոսում եմ քրեական ենթամշակույթի մասին, երբ որ կարող են քրեական հեղինակությանը հարգել։

- Ո՞ւմ եք ակնարկում, Առուշ Առուշանյանը քրեական հեղինակությո՞ւն է։

- Ցանկացած քրեական հեղինակության, որը հեղինակություն է վայելում Հայաստանում, որովհետեւ «քրեական հեղինակություն» բառակապակցությունն արտառոց է նրանով, որ քրեականն ունի հեղինակություն։

- Այսինքն՝ կարող ենք ասել, որ ձեր թեկնածո՞ւն էլ որեւէ հեղինակություն չի ունեցել՝ ո՛չ քրեական, ո՛չ այլ։

- Կարող է․․․․ Բայց եթե որեւէ հեղինակություն չունենար, չէր հավաքի համապատասխան ձայներ։

- Գուցե իշխանության թիմից էր, ձեր թեկնածուն էր, դրա համա՞ր է այդքան ձայն հավաքել։

- Այսինքն` իշխանության թիմից լինելն արդեն իսկ նշանակում է, որ պետք է ընտրվի՞։

- Դե, շատերն իշխանությանն ընտրում են, այդ թվում՝ երբեմնի ՀՀԿ-ականներ, քանի որ մարդկանց մի տեսակ կա, որը միշտ իշխանության կողմն է բռնում։

- Եթե դրանից ունեն ակնկալիք։ Կարող է իրենց թվում է, որ իրենք կարող է ակնկալիք ունենան, բայց չունենան արդյունքում։ Էդ Ձեր ասած մարդկանց մասին է խոսքը։

- Լավ, Գյումրիի մասով ի՞նչ կարող եք ասել, հաղթած ուժը կարո՞ղ է ՔՊ-ի հետ կոալիցիա ձեւավորել։

- Կարծում եմ՝ դեռեւս պետք է քննարկումներ լինեն, դրա համար որեւէ բան չեմ ասի։

- Ի դեպ, Գյումրիում մասնակցության տոկոսը շատ ցածր էր, եւ այդ տոկոսի պարագայում ՔՊ-ն հավաքել էր ընդամենը 7 հազար ձայն, մինչդեռ մի քանի ամիս առաջ նույն Գյումրիում 26 հազար մարդ էր ձեզ ձայն տվել։

- Կարծում եմ՝ ՔՊ-ի ընտրողները վստահ են եղել հաղթանակի մեջ եւ չեն մասնակցել։

- Չե՞ք կարծում, որ այստեղ իշխանության հանդեպ վստահության դեֆիցիտ է ձեւավորվել։

- Ոչ, կարծում եմ՝ ավելի վստահ են եղել հաղթանակի մեջ, դրա համար չեն գնացել ընտրությունների, ինչը խնդիր է։