Պիտի ունենալ ազգային երազ ու գնալ դրա հետևից. Սաղաթելյան
Մենք այժմ ունենք պարտություն, բայց դա հայ ժողովրդի հավաքական պարտությունը չէ, այլ իշխանության ղեկին հայտնված մի խումբ մարդկանց գործունեության արդյունքն է և բոլոր այն փորձերը՝ ներքին և արտաքին ուժերի կողմից, հայ ժողովրդին ներկայացնել որպես թույլ ու չհաղթող, ձախողված ու դատապարտված ազգ պետք է ստանան համարժեք պատասխան։ Այս մասին քիչ առաջ ՀՅԴ Հայ Դատի գրասենյակի խորհրդաժողովի ժամանակ իր ելույթում ասաց ՀՅԴ ԳՄ ներկայացուցիչ, ԱԺ փոխխոսնակ Իշխան Սաղաթելյանը։
«Պետք է չհաշտվել ինքնիշխանության կորստի և պարտության հետ։ Այս նիստն անց է կացվում հայ ժողովրդի համար բախտորոշ ժամանակահատվածում, երբ հայրենիքը կանգնած է ներքին և արտաքին անվտանգությանն առնչվող լրջագույն մարտահրավերների առջև։ Սակայն պատմությունը ինքնին ապացուցել է, որ այս տարածաշրջանում հայ ժողովուրդը եղել և լինելու է գոյապայքարի մեջ՝ հայրենիքի փոքր հողակտորի և անկախ պետականության պահպանման համար։ Ահա այստեղ է, որ ՀՅԴ-ն ասելիք ու անելիք ունի։ Պետք է հաղթահարել նվաստացումը և կառավարել կորուստները, ռիսկերը, վերականգնել արժանապատվությունը, հաղթահարել պարտվածի և փոքր պետություն լինելու հոգեբանությունը, ունենալ ազգային երազ և գնալ դրա հետևից։ Հայաստանի առջև այսօր ծառացած է համակարգային խոշոր ճգնաժամ և իշխանությունների այն պնդումները, թե ընտրություններից հետո ճգնաժամը հաղթահարված է, խաբեություն է»,- ասաց նա։
Կարծիքներ