«Հրապարակ». Լիսկայի որդուն առաջադրված մեղադրանքներից մեկը կարճվել է, մյուսները, ըստ փաստաբանի, «ջուր» են

Սյունիքի նախկին մարզպետ Սուրիկ Խաչատրյանի որդու՝ Տիգրան Խաչատրյանի դեմ հարուցված քրեական գործերից մեկը կարճվել է։ Այս մասին հայտնել էր Տիգրան Խաչատրյանի պաշտպան Բենիկ Գալստյանը: Տիգրան Խաչատրյանին, հիշեցնենք, մեղադրանք էր առաջադրվել Քրեական օրենսգրքի 225-րդ հոդվածի 2-րդ մասով (զանգվածային անկարգությունների մասնակցի կողմից բռնություն գործադրելը)։

«Այսօր ստացանք ՀՀ գլխավոր դատախազության համապատասխան վարչության պետի կողմից կայացված որոշումը, համաձայն որի՝ դադարեցվել է Տիգրան Սուրիկի Խաչատրյանի նկատմամբ ՀՀ քրեական օրենսգրքի 225-րդ հոդվածի 2-րդ մասով  իրականացվող քրեական հետապնդումը՝ այն հիմքով, որ Տիգրանը չի կատարել իրեն մեղսագրվող արարքը։ Մեղադրանքը վերաբերում էր 2022թ. մայիսի 30-ին ՀՀ կառավարության երրորդ մասնաշենքի մոտ տեղի ունեցած դեպքերին։

Այսպիսով, արդեն պաշտոնապես հաստատվեց, որ Տիգրան Խաչատրյանի նկատմամբ իրականացված քրեական հետապնդումը, այդ թվում՝ 2 ամսով կալանավորումը, ուներ միմիայն եւ բացառապես քաղաքական ենթատեքստ։ Առավել քան վստահ եմ, որ այս հետապնդման նախաձեռնողները, նախագծողները, կատարողները եւ շահառուները վաղ թե ուշ դատվելու են»,- հայտնել էր Բենիկ Գալստյանը։

Մեզ հետ զրույցում Բենիկ Գալստյանն ասաց, որ Տիգրան Խաչատրյանը 2 ամիս կալանք է կրել։ «Դրանից հետո կալանքի ժամկետը չեն երկարացրել, քննություն են արել եւ որոշում են կայացրել քրեական հետապնդումը դադարեցնելու մասին, քննիչը միջնորդել է դատախազին, դատախազը քրեական հետապնդումը դադարեցնելու վերաբերյալ միջնորդությունը բավարարել է՝ այն հիմքով, որ անձը չի կատարել իրեն մեղսագրվող արարքը»,- ասաց Գալստյանը։

Սակայն սա միակ գործը չէ, որ հարուցված էր Լիսկայի որդու դեմ։ Մեկ այլ քրեական գործի շրջանակներում Տիգրան Խաչատրյանն այս պահին հետախուզվում է։ Խոսքը վերաբերում է մոտ մեկ ամիս առաջ տեղի ունեցած դեպքի առթիվ հարուցված քրեական գործին։ Ըստ Քննչական կոմիտեի տարածած հաղորդագրության՝ Տիգրան Խաչատրյանը հունիսի 19-ին Գորիսի ավտոտեխսպասարկման կետերից մեկում կրակել է 46-ամյա տղամարդու ուղղությամբ՝ նրան պատճառելով մարմնական վնասվածք․ «Ըստ նախաքննությամբ ստացված փաստական տվյալների՝ Տ․ Խաչատրյանը հունիսի 19-ին, ժամը 20․30-ի սահմաններում, իրեն պատկանող Mercedes-Benz մակնիշի ավտոմեքենայով, երկու մտերիմների հետ, գնացել է ավտոտեխսպասարկման կետ, որտեղ հիշյալ հարցի շուրջ պարզաբանումներ կատարելու ընթացքում, չնչին առիթն օգտագործելով, իր սեփական անձի առավելություններն ընդգծելու եւ այդկերպ հանդուգն վարքագիծ դրսեւորելու մոլուցքից դրդված, խուլիգանական դրդումներով, վիճաբանություն է հրահրել աշխատակիցների հետ, նրանց հասցեին հնչեցրել սեռական բնույթի հայհոյանքներ։

Ապա, համակեցության կանոնների ցուցադրաբար անտեսմամբ, ավտոտեխսպասարկման կետի հարեւանությամբ գտնվող քաղաքացիների, թաղամասի բնակիչների, սպասարկման կետերի անդորրը խախտելով, իր մոտ ապօրինի կրած հրազենով կրակոց է արձակել 46-ամյա տղամարդու ուղղությամբ` վերջինիս պատճառելով առողջության թեթեւ վնասի հատկանիշներ պարունակող վերոնշյալ մարմնական վնասվածքը եւ հեռացել դեպքի վայրից»,- ասված էր Քննչականի տարածած հայտարարության մեջ։ Ի դեպ, այս գործի հարուցումն անմիջականորեն կապված է մեր հրապարակումների հետ. եթե «Հրապարակում» նույն օրը տեղեկատվություն չգնար, եւ մենք հետեւողականորեն չշարունակեինք լուսաբանել այդ օրը Գորիսում տեղի ունեցած 3 միջադեպերը, որտեղ գլխավոր գործող անձը Տիգրան Խաչատրյանն էր, թերեւս ո՛չ գործ կհարուցվեր, ո՛չ հետախուզում կհայտարարվեր։ Ընդ որում, հետախուզումն այնքան ուշ հայտարարվեց, որ մեղադրյալը կարողացավ անհետանալ։

Այս գործով Տիգրան Խաչատրյանի շահերը ներկայացնում է մեկ այլ փաստաբան՝ Վահագն Քեշիշյանը, ով մեզ ասաց, որ իր պաշտպանյալի նկատմամբ կայացված կալանքի որոշումը բողոքարկել է, սակայն բողոքը դեռեւս չի քննվել։ «Պարտադիր բողոքարկվել է, ցանկացած ապօրինի որոշում ենթակա է բողոքարկման, ես գտել եմ, որ տվյալ որոշումն ապօրինի է, դրա համար էլ բողոքարկել եմ»,- ասաց Քեշիշյանը։ Նրանց հարցրինք՝ Տիգրան Խաչատրյանը ներկայացե՞լ է վարույթ իրականացնող մարմին։ «Իմ պաշտպանյալի նկատմամբ ապօրինի քրեական հետապնդում է, մինչեւ ապօրինությունները չվերանան, իմ կարծիքով՝ նման բան չի լինի»,- ասաց Քեշիշյանը։

Պաշտպանին նաեւ հարցրինք, թե ինչ կարող է ասել Քննչական կոմիտեի տարածած հայտարարության մեջ նշված դեպքերի մասին, որ Տիգրան Խաչատրյանը կրակել է 46-ամյա տղամարդու ուղղությամբ եւ վնասել նրա թեւը եւ այլն։ «Նման բան չկա, ես ասում եմ՝ ապօրինի քրեական հետապնդում է հարուցվել, եւ նման բան չկա, ինչ ներկայացված է, դրանք, իմ կարծիքով, այսպես ասած, ջուր են, որը շուտով կհիմնավորվի»,- ասաց Քեշիշյանը։