Դատարանը փաստեց, որ ես իրավացի եմ

Դատարանն անվավեր է ճանաչել մշակույթի նախարարի՝ Խորեոգրաֆիայի թատրոնի տնօրեն Գայանե Կարապետյանին պաշտոնից ազատելու վերաբերյալ հրամանը: Որոշումը, որը հրապարակվել է հուլիսի 4-ին, օգոստոսի 4-ից արդեն ուժի մեջ է մտել։ «Դատարանը որոշել է, որ ինձ աշխատանքից ազատելու հրամանը խախտմամբ է տրվել, եւ մշակույթի նախարարությանը տուգանել են 800 հազար դրամով՝ միաժամանակ չեղյալ համարելով հրամանը»,- ասում է Գայանե Կարապետյանն ու հավելում, որ մշակույթի նախարարությունը 20 օր ժամկետ ուներ որոշումը բողոքարկելու համար, բայց չի բողոքարկել։   

«Նախարարությունը պետք է վճարի ոչ միայն 800 հազար դրամ տուգանքը՝ ինձ ապօրինի աշխատանքից ազատելու համար, այլ նաեւ իմ մեկ օրվա հարկադիր պարապուրդի աշխատավարձը եւ 150 հազար փաստաբանի վճար, մոտավորապես 1 մլն-ից ավել գումար, էլ չասեմ, որ իմ վերջնահաշվարկը նույնպես չի տրվել, իսկ նախարարությունը մինչ այս պահը փոխհատուցում չի արել, հապաղում են»,- ասում է Կարապետյանը։

Դատարանը սահմանե՞լ է վճարման ժամանակացույց, թե մինչեւ երբ նախարարությունը պետք է վճարի այդ տուգանքը։ Գ․ Կարապետյանն ասաց, որ եթե նախարարությունը չի բողոքարկել որոշումը, ապա դա արդեն նշանակում է, որ անմիջապես այդ գումարը պետք է վճարվեր իրեն, ինչը չի արվել։ Այդ հարցով Կարապետյանը գրավոր դիմում է ներկայացրել նախարարությանը, որտեղից պատասխանել են, որ հարցը քննարկվում է․ «Վճիռն արդեն գնացել է հարկադիր, որն էլ պետք է պարտադրի նախարարությանը վճարել, ինչն առայսօր վճարված չէ»։   

Դատարանի որոշումն արդյո՞ք նշանակում է, որ ինքը պետք է վերականգնվի նաեւ տնօրենի պաշտոնում։ «Նախ, այս ամբողջը զավեշտ է, որովհետեւ մշակույթի նախարարության իրավաբանը չի՞ տեսնում, որ պետռեգիստրում առ այս պահը ես եմ գրանցված որպես տնօրեն, հարկայինում նորից ես եմ գրանցված տնօրեն, էլ չեմ ասում, որ Լիլիթ Փալանջյանի 2019թ․ չարած գործունեության ամբողջ տույժ-տուգանքները եկել են իմ անվան տակ, որովհետեւ փաստաթղթերով տնօրենը ես եմ, իրենց ձեռքին կա միայն նախարարության մի հրաման։ Լիլիթ Փալանջյանի գործունեությունը եղել է նա, որ գնացել է հարկային մարմին, գրանցել է իրեն որպես լիազոր անձ, բայց ո՞ւմ կողմից լիազոր անձ։ Փոխանակ այս ամեն ինչին իրենք հետեւեն, կառչում են նրանից, որ դատարանը չի բավարարել վերականգնելու մասը։

Բայց դատարանն իրավասու չէ չեղած պայմանագիրը վերականգնելու, իմ պայմանագրի ժամկետը լրացել էր, ինչպես որ նախորդ 2 տարիներին լրացած պայմանագիրը նույն՝ Արմեն Ամիրյանի ժամանակով ծանուցվում էր, որ կարող է շարունակվել, եւ շարունակվում էր։ Այս պարագայում դատարանը փաստել է, որ ապօրինի է եղել պայմանագիրը չշարունակելը, եւ տուգանել է նախարարությանը, որովհետեւ կարող էին շարունակել, վճռի մեջ նշված էր՝ եթե ես ունենայի թեկուզ 10 օրվա պայմանագիր, իրենք կվերականգնեին ինձ»,- բացատրում է թատրոնի նախկին տնօրենը։

Ինչ վերաբերում է նոր տնօրենին, ապա դերասանախումբը բողոք է ներկայացրել նախարարություն, որ նոր տնօրենը չի գալիս աշխատանքի արդեն 9 ամիս․ «Ինքն ասում է, որ ընդունում-հանձնում չեմ արել․․․, ի՞նչն ես ուզում ընդունել՝ 4 հատ սեղան, 5 հատ աթոռով թատրոն չեն ղեկավարում։ Մինչեւ հիմա խաբել էին վարչապետին, ես փետրվարի 22-ին հանձնել եմ կնիքը Քննչական կոմիտե, որտեղ բողոք էր ներկայացրել Նազենի Ղարիբյանը։ Ես մեծ բացատրություն տվեցի, հետո կնիքը հանձնեցի քննիչին։ Դա փետրվար ամսին էր, բայց ապրիլ ամսին Սամվել Մուրադյանը վարչապետի նամակին պատասխանում է, որ նախորդ տնօրենը կնիքը չի հանձնել, եւ դատարանում էլ հայց կա»։

Թատրոնի դերասաններն արդեն 9 ամիս է՝ աշխատավարձ չեն ստացել, ինչի առիթով կոլեկտիվը դիմել է դատարան նոր հայցով՝ ընդդեմ մշակույթի նախարարության․ «Դա պայմանավորված է Լիլիթ Փալանջյանի կամայականությամբ, ով թատրոնին ապօրինի հարկադիր պարապուրդի է մղել։ Մինչեւ հիմա հայտարարում էին, որ 6 ամսում թատրոնը պետք է դառնա բալետային թատրոն, եթե չդարձավ, կփակենք։ Հիմա թատրոնը ո՛չ փակվել է, ո՛չ էլ դարձել բալետային, բայց Փալանջյանի ժամկետը երկարացրել են։ Սա, չգիտեմ, կոռուպցիոն դրսեւորում ասեմ, թե ինչ։ Ինչի՞ հիման վրա եք երկարացրել, երբ նա նշանակվել է ապօրինի։ Էլ չասեմ այն, որ մարդը 3 տեղ է աշխատում, բայց 4-րդ տեղով էլ հրաման են տվել, երբ Կոնստանտին Օրբելյանին 2 հաստիքի համար ազատում են աշխատանքից»։

Թատրոնը մինչ այս պահը պետռեգիստրում գրանցված է որպես «Խորեոգրաֆիայի պետական թատրոն» ՊՈԱԿ, տնօրեն՝ Գայանե Կարապետյան։ «Մինչեւ հիմա դեմագոգիայով էին զբաղված, հիմա էլ տեղ չկա, դատարանը փաստել է, որ ես իրավացի եմ»,- ասում է Գ․ Կարապետյանը, ով մշակույթի նախարարությունից սպասում է իր փոխհատուցմանը։  

Նախարարությունը պատրաստվո՞ւմ է 800 հազար տուգանք վճարել, եւ ինչպե՞ս են լուծվելու Խորեոգրաֆիայի թատրոնի կարգավիճակը, դերասանների աշխատավարձի հարցը։ Այս եւ մի քանի այլ հարցեր ուղղեցինք մշակույթի նախարարություն, որոնք ստանալուն պես կներկայացնենք նաեւ նախարարության դիրքորոշումը։