Վարդենիսցիներին խոստանում են ամեն ինչ՝ զամշե կոշիկից մինչեվ լողավազան. նրանք ապշած են քաղաքապետացուների շքերթից

Վարդենիսում նախընտրական եռուզեռ է: Նախկին քաղաքապետ Արամ Հարությունյանը դեկտեմբերի 2-ին հրաժարական էր տվել, իսկ նորի ընտրությունը նշանակված է փետրվարի 17-ին: Թեկնածուների գրանցման ժամկետն ավարտվում է հունվարի 27-ին: 5 օր էլ օրենքով տրվում է ինքնաբացարկների համար: Բայց քաղաքապետացուներն արդեն ակտիվացել են: Հանդիպումներ են ունենում հիմնարկներում, ծանոթ-բարեկամների շրջանում, համոզում են, որ իրենց կողքին կանգնեն: 

Թեկնածուները շատ են, մեր տեղեկություններով, այս պահի դրությամբ 11 հոգի ցանկություն ունի առաջադրվելու: ԿԸՀ-ից հայտնում են, որ հունվարի 25-ի դրությամբ առաջադրվել է երկու անձ՝ Վարդենիսի կադաստրի վարիչ Գրիշա Աղաջանյանը եւ փոխքաղաքապետ Կարեն Մկրտչյանը: 

Դպրոցականներին կոշիկով է ապահովել

Մասնագիտությամբ  քաղաքագետ Կարեն Մկրտչյանը Վարդենիսում պատմության ուսուցիչ է եղել, հետո՝ դպրոցի փոխտնօրեն: Ռադիոտեխնիկայի խանութ է ունեցել, այլ բիզնես: 2017 թվականին առաջադրվել է քաղաքապետի թեկնածու, բայց հետո, պայմանավորվելով Արամ Հարությունյանի հետ, հանել է  թեկնածությունը, հավանաբար, փոխքաղաքապետ նշանակվելու խոստման դիմաց: Ասում է. «Աթոռակռիվ չեմ սիրում: Որոշեցի  միանալ Արամ Հարությունյանի հետ: Այսօր էլ առաջադրվելուս նպատակն այն է, որ համայնքի համար պատասխանատվություն ստանձնեմ»: Կարեն Մկրտչյանը շեշտում է այն, որ համայքի համար ճանապարհաշինական եւ գյուղատնտեսական տեխնիկա է պատրաստվում բերել համայնքի համար, տարածքային զարգացման հիմնադրամի հետ համագործակցելով, որ չորս բազմաբնակարանների տանիքների վերանորոգում է իրագործել՝ հիմնականում բարերարի գումարներով, մի քանի հարյուր անապահովների սնունդ, սերմացու է բաժանել, 1-4-րդ դասարանի երեխաներին գրենական պիտույքներով, պայուսակներով եւ կոշիկով է ապահովել: 

Վարդենիսում «զամշի կոշիկ» հասկացություն չկա

Քաղաքապետարանից այլ թեկնածուներ էլ կան՝ քաղաքապետի ժամանակավոր պաշտոնակատար Արամ Մելքոնյանը եւ նախկին քաղաքապետ Արամ Հարությունյանի օգնական Արկադի Խաչատրյանը: Վերջինս  մսամթերքի արտադրությամբ զբաղվող «Աթենք» ընկերության գլխավոր տեխնոլոգն է եղել: Ինչո՞ւ է ուզում առաջադրվել: «Ժողովրդի մեծամասնության պահանջը կա»: Որտեղի՞ց գիտեք, թե մեծամասնության: «Նրանց հետ շփումից»: Ի՞նչը կփոխեք, եթե դառնաք քաղաքապետ հարցին նա տրիվիալ պատասխան տվեց: «Շատ բաներ կան փոխելու: Էնպիսի ծրագրեր, որ աշխատատեղեր բացվեն»: Հայտնեց, որ իր նախկին ղեկավարի՝ Արամ Հարությունյանի հետ ընդհանրապես հարաբերություններ չունի: Այնինչ նա Արամ Հարությունյանի մորաքրոջ տղան է։

Այսօրվա ԺՊ, նախկինում անհատ ձեռներեց Արամ Մելքոնյանը, որն անասնապահական ֆերմա ունի Արեգունի գյուղում, մասնագիտությամբ աշխարհագետ, բնապահպան, օրերս բոլոր ցանկացողներին հրավիրել է ժողովի եւ ֆինանսական հաշվետվություն ներկայացրել: «Դա մարզպետարանի նախաձեռնությունն է, եթե քաղաքապետ դառնամ, պետք է երեք ամիսը մեկ այդպիսի ժողովներ անցկացնեմ, ես մեծ բավականություն ստացա այդ նախաձեռնությունից»,- ասում է նա: Մելքոնյանը նաեւ պրոֆեսիոնալ բռնցքամարտիկ է: Ասում է, որ աշխարհով մեկ ճանապարհորդելով, տեսել է «ուրիշ կյանք»: «Էդ ոճով իմ քաղաքն եմ ուզում առաջ տանել, որ քաղաքում անբարեկարգ, չլուսավորվող, ցեխոտ ճանապարհներ չլինեն: Վարդենիսում «զամշի կոշիկ» հասկացություն չկա, էնքան շատ է ցեխը»: Վստահեցնում է, որ ԺՊ աշխատելու մեկուկես ամսվա ընթացքում գաղափարներ է հանձնել թղթին, որոնք պատրաստվում է իրագործել: 

Օրինակ, կարի ֆաբրիկա է ստեղծելու, որ կանայք տանը չնստեն, հիվանդանոցն է փրկելու, որ հոսպիտալ չդարձնեն, եւ այլն: «Եթե մարդկանց կանչեք կլոր սեղանի շուրջ, ու ինձանից ավելի անշահախնդիր, պատրաստված թեկնածու լինի, ես դուրս կգամ ընտրապայքարից»,- ասում է քաղաքապետի ԺՊ-ն:   
 
Խլոյանին վերաբերող յուրացումների գործը դեռ փակված չէ                        

«Ես ժողովրդից ծնված մարդ եմ, ժողովրդից դուրս եկած, պիտի իրականացնեմ իմ ժողովրդի ցանկությունը»,- քաղաքապետի պաշտոնում վերստին առաջադրվելու իր ցանկությունն այսպես է բացատրում Վարդենիսի նախկին քաղաքապետ, համայնքը 15 տարի ղեկավարած Վոլոդյա Խլոյանը: Բայց վարդենիսցիների մեծ մասը դեպրեսիայի մեջ է ընկել՝ իմանալով, որ Խլոն՝ ինչպես նրան անվանում են խիստ յուրօրինակ բարքերով այս քաղաքում, կարող է նորից իշխանության ղեկին հայտնվել: 

Նա իր համաքաղաքացիների հակակրանքին է արժանացել նախեւառաջ ոստիկանների հետ սերտ կապերով: Խլոյանը ցուցմունք է գրել նույնիսկ ամենաչքավորների դեմ: 
Օրինակ, մի անգամ նա «գրել» էր իր նախկին հավաքարար Սոնիկի էպիլեպսիայով տառապող որդու՝ Վանյայի դեմ, որը հայտնի է Գիժ Վանյա մականունով: Խլոն խոստացել էր թանգարան բացել Վանյայի համար ու նրան նշանակել տնօրեն, բայց չէր կատարել խոստումը: Վանյան էլ երկար սպասելուց հետո ներխուժել էր քաղաքապետի աշխատասենյակ ու խփել նրան: Խլոյանը ցուցմունք էր գրել Վանյայի դեմ: Մեր տեղեկություններով, այս պահին էլ Խլոյանի հետ կապված յուրացումների գործ է քննվում: Պատճառված վնասի դիմաց նրանից  6,3 մլն դրամի հետգանձում են կատարել: Սակայն մեղադրյալի կարգավիճակ Խլոյանը չունի: ՀԿԳ քննիչ Ալիկ Սուքիասյանը, որի վարույթում է այս գործը, հայտնեց, որ նախաքննությունն ակտիվ փուլում է, գործը հարուցված է յուրացումների փաստով: «Նախաքննության գաղտնիք չենք կարող հրապարակել: Վնասի փոխհատուցման հարցը պարզ կլինի փորձաքննություններից հետո: Կարող եմ ասել, որ նշանակված են փորձաքննություններ: Մեղադրանք չկա: Գործը 6 դրվագից է կազմված: Դրանք վերաբերում են Վարդենիսում տեղադրված հենասյուներին, ռետինե անիվների, անասնաֆերմայի, ջրագծի հետ կապված գործարքներին։ Եվս երեք դրվագ կա»: Քաղաքում պատմում են, որ Խլոյանը թղթի վրա ցույց է տվել, թե նոր էլեկտրասյուներ է ձեռք բերել, սակայն դրանց փոխարեն հներն է տեղադրել, անվադողերի հետ կապված մեքենայություններ է արել: Նախկին քաղաքապետին հարցրինք, թե ինչպես է առաջադրվել՝ մեջքի հետեւում ունենալով յուրացումների վերաբերյալ նման «պատկառելի» գործ: «Դա զրպարտանք է, յուրացում գոյություն չունի: Սուտ բաներ են»,- ասաց Խլոյանը եւ ներողություն խնդրեց, որ այլ հարցերի չի պատասխանի, որովհետեւ մարդ է մահացել, եւ ինքը սգո արարողության տեղում է: 

Որ քաղաքը սարքեմ սիրուն

Վարդենիսի քաղաքապետի թեկնածուներ են պատրաստվում դառնալ թիվ 2 դպրոցի ուսմասվար, հայոց լեզվի ուսուցչուհի Նոնա Վարդանյանը, Գարսիկ Սաղաթելյանը, որին ճանաչում են որպես նախկին ՕԵԿ-ական։ Թեկնածու Արսեն Ամիրխանյանը գործարար է: Ունի սեփական խանութ քաղաքի կենտրոնում: «Դժվարացել եմ միշտ անուն դնելխանութի համար, այդպես էլ մարդիկ ճանաչում են՝ Արսենի խանութ, կամ ասում են՝ էն բարեհամբույր տղայի խանութը»,- պարզաբանում է Ամիրխանյանը: Նա դեկտեմբերին քիչ էր մնում քաղաքապետի ԺՊ նշանակվեր: Ընկերների ու ծանոթների համար նույնիսկ «մաղարիչ» էր արել «օբյեկտում», բայց հետո «վերեւում» որոշումը փոխվեց: Մաղարիչի ծախսն իզուր անցավ: Ինչո՞ւ եք ուզում քաղաքապետ դառնալ՝ հարցրինք։ «Որպեսզի Վարդենիսը սարքեմ սիրուն, ինչքան որ հնարավոր է, մեզ նեղություն տալով, չշարաշահելով բյուջեն, մշակույթին զարկ տալով, սպորտ-խմբակների բացումով, բոքսի: Լողավազան եմ ուզում սարքեմ: Սեւանը մեր կողքն է, բայց Վարդենիսի 50 տոկոսը լողալ չգիտի»,- ասաց Ամիրխանյանը: 

Փոխմարզպետին ազատել են կեղծ դիպլոմի պատճառով

Քաղաքապետ է երազում դառնալ նաեւ Գեղարքունիքի նախկին փոխմարզպետ Վահան Զարոյանը: Նա «Իմ քայլից» է: Հունիսին այս պաշտոնին էր նշանակվել Փաշինյանի կողմից: Ակտիվ հեղափոխական էր, բայց անսպասելիորեն ազատվեց փոխմարզպետի պաշտոնից: Վարդենիսում լուրեր են պտտվում, թե պատճառը Զարոյանի ներկայացրած կեղծ դիպլոմն է եղել, իրականում նա չունի բարձրագույն կրթություն, եւ Փաշինյանը, տեղեկանալով այս մասին, ջղայնացել է ու առանց երկար մտածելու, ազատել պաշտոնից: Վահան Զարոյանը վստահեցնում է, որ պաշտոնից հեռանակն իր անձնական որոշումն է եղել: «Որոշակի խնդիրներ են եղել: Ես դիմում եմ գրել, դուրս եմ եկել: Իրականում կեղծ դիպլոմ չի եղել: Քրեական գործ է հարուցվել կեղծ դիպլոմի կապակցությամբ, հետո կարճվել է: Հիմա կպարզվի ամեն ինչը, ու բոլորը կիմանան, որ իմ դիպլոմը կեղծ չի եղել, ուղղակի որոշ մարդկանց ցանկությունն է եղել, որ այդպես վարվեն ինձ հետ: Ես Վարդենիսի Վիկտոր Համբարձումյանի անվան պետական մանկավարժական ինստիտուտի շրջանավարտ եմ, պատմության ֆակուլտետում եմ սովորել: Իմ նպատակը հեղափոխությունը Վարդենիս բերելն է»: Զարոյանը թեեւ « Իմ քայլ»-ից է, բայց իր հեղափոխական ընկերների հետ չի շփվում եւ որպես «Իմ քայլի» թեկնածու չի ընկալվում: «Առաջ իշխանությունն ասում էր, թե ով առաջադրվի: Հիմա ազատ են թողել, ու տեղից վեր կացողն ուզում է քաղաքապետ դառնա: Դարձել է կոլխոզի նախագահի ընտրություն»,- ամփոփում է Վարդենիսի երիտասարդներից մեկը՝ արտահայտելով համընդհանուր զարմանքը քաղաքապետացուների այս շքերթի եւ նման մեծաքանակության կապակցությամբ: Պարզ չէ, թե արդյունքում ինչ ընտրություններ են լինելու։