Ռոսսելխոզնադզորը մայիսի 30-ից կսահմանափակի մրգի և բանջարեղենի ներմուծումը Հայաստանից: Այս մասին գրում է ՌԻԱ Նովոստի-ն` վկայակոչելով գերատեսչության տարածած հաղորդագրությունը։
«Ռոսսելխոզնադզորը 2026 թվականի մայիսի 30-ից ժամանակավոր սահմանափակումներ է մտցնում Հայաստանի ծագում ունեցող և այնտեղից առաքվող թարմ լոլիկի, վարունգի, պղպեղի, կանաչեղենի և ելակի ներմուծման վրա՝ մինչև առաքվող արտադրանքի անվտանգության ապահովման համապատասխան ալգորիթմի մշակումը»,- ասված է հաղորդագրության մեջ։
Ռուսական կողմը հայտարարում է, որ միայն 2026 թվականին հայկական արտադրանքի հետ կապված արձանագրվել է 181 խախտում։ Ավելին՝ Մոսկվայում արդեն բաց տեքստով խոսում են արտահանման համակարգում անկարգությունների, անհասկանալի ընկերությունների և վերահսկողության բացակայության մասին։
Իսկ ամենացավալին այն է, որ հերթական անգամ հարվածի տակ են հայտնվում ոչ թե պաշտոնյաները, այլ գյուղացիները, ջերմոցատերերը, արտահանողները և հազարավոր ընտանիքներ, որոնց եկամուտը կախված է ռուսական շուկայից։
Ավելի վաղ՝ մայիսի 15-ին հայտնի է դարձել, որ Ռոսսելխոզնադզորը մտադիր է ստուգումներ անցկացնել մի շարք հայկական ձեռնարկություններում` ներառյալ այն ընկերությունները, որոնց արտադրանքի մատակարարումը Ռուսաստան ավելի վաղ դադարեցվել էր: Պատճառը կեղծված ձկնամթերքի ներկրման կասկածներն են, որոնք ենթադրաբար եվրոպական ծագում ունեն։
Հիշեցնենք, որ ՀՀ ՍԱՏՄ–ն մայիսի 27–ին հերքել էր լուրը, թե ՌԴ–ն որոշել է դադարեցնել Հայաստանից ծիրանի ներմուծումը։
