«Հրապարակի» զրուցակիցը Միխայիլ Միլշտեյնն է (Մերձավոր Արեւելքի եւ Աֆրիկայի ուսումնասիրությունների Մոշե Դայան կենտրոնի Պաղեստինի ուսումնասիրությունների ֆորումի ղեկավար, Իսրայել)։
-Մարտի 18-ին հայտնի դարձավ, որ Իսրայելը վերսկսել է ռազմական գործողություները Գազայի հատվածում այն բանից հետո, երբ ՀԱՄԱՍ-ը հրաժարվեց ԱՄՆ-ի առաջարկով երկարաձգել ժամանակավոր հրադադարը (գործեց հունվարի 19-ից մինչև մարտի 1-ը): Վարչապետ Նեթանյահուն ասում է՝ սա միայն սկիզբն է: Մի՞թե հնարավոր չէ՞ կանխել նոր արյունահեղությունը:
-Անկեղծ ասած, շատ իսրայելցիներ իրականում չեն հասկանում, թե որն է ներկայիս գործողության խորը երկարաժամկետ նպատակը, և կան շատերը, ովքեր կասկածում են, որ դա Գազայի լիակատար օկուպացիան է: Խնդիրն այն է, որ նման նպատակը չի հանգեցնի պատանդների ազատմանը: Թվում է, թե այս պահին ավելի շատ իսրայելցիներ կան, ովքեր աջակցում են այս գործողությանը կամ պատերազմի դադարեցմանը:
-Դոնալդ Թրամփը լիովին աջակցում է Իսրայելի ներկայիս ռազմական գործողություններին Գազայի հատվածում։ Այս մասին հայտնեց Սպիտակ տունը և հիշեցրեց, որ ԱՄՆ նախագահն ավելի խոստացել էր կոշտ միջոցներ ձեռնարկել, եթե պաղեստինյան շարժումն ազատ չարձակի իսրայելցի պատանդներին:
-Ճիշտ եք, բայց կարծես թե մեծանում է անջրպետը Վաշինգտոնի և Երուսաղեմի միջև պատերազմի առնչությամբ: Դրա նշանավոր արտահայտությունը Թրամփի ծրագիրն է պաղեստինցիներին Գազայի հատվածից տեղափոխելու մասին։ Թվում է, թե Թրամփը կորցրել է ոգևորությունը, մինչդեռ Նեթանյահուն դեռ հավատում է, որ այն կարող է իրականացվել:
-ՀԱՄԱՍ-ն իր հերթին պնդում է, որ Նեթանյահուն իսրայելցի պատանդների մահվան դատավճիռն է ստորագրել:
-Կրկին իրավացի եք, բայց ինձ սովորաբար հավատ չի ներշնչում ահաբեկչական կազմակերպությունը, որը զոհաբերում է սեփական ժողովրդին և իրականում չի վարանում ստել և կեղծ լուրեր տարածել:
-Բայց բուն Իսրայելում էլ, կարծեք, համամիտ չեն Իսրայելի վարչապետի հետ: Ըստ լրատվամիջոցների, հազարավոր իսրայելցիներ փողոց են դուրս եկել, քննադատել Նեթանյահուի վարած քաղաքականությունը և հրադադարը խախտելու որոշումը:
-Իհարկե: Ես դրա մասին արդեն ասացի: Կրկնեմ, մտայնություն կա, թե նոր ռազմական գործողություններով հնարավոր կլինի հասնել բոլոր պատանդների ազատ արձակմանը: Այս կարծիքը կարող ենք համարել կառավարության վրա հանրային ճնշում:
-Միջազգային հանրությունն էլ մտահոգ է. Գերմանիայի արտաքին գործերի նախարարն, օրինակ, աղետ է որակել Գազայի հատվածում ռազմական գործողությունների վերսկսումը: Թուրքիան էլ, ինչպես միշտ, կոշտ է գնահատականներում:
-Անշուշտ: Բայց մի աշխարհում, որը ղեկավարվում է Թրամփի կողմից, թվում է, որ միջազգային ձայնը շատ ավելի քիչ կարևոր է: Կարծում եմ, որ աշխարհի մեծ մասն այժմ կենտրոնացած է Ուկրաինայի վրա և շատ ավելի քիչ ժամանակ ունի Գազայի հատվածում տեղի ունեցող իրադարձությունների համար:
-Պատերազմական գործողություններն այսօր դարձել են մարդկության ամենամեծ չարիքը՝ Ուկրաինայից մինչև Մերձավոր Արևելք. Իսրայել, Գազա, Եմեն, Սիրիա, Լիբանան: Խաղաղության ձայները կրկին խլանում են զենքերի հզոր որոտից: Ի՞նչը կարող է կագնեցնել այս կործանարար շղթան, այդ թվում՝ իսրայելա-պաղեստինյան հակամարտությունում:
-Միայն պատերազմներ և ճգնաժամեր ստեղծող ոլորտների խորը մշակութային փոփոխությունը, օրինակ՝ Իրանի ռեժիմի փլուզումը, իրոք ավելի լավը կդարձներ աշխարհը, ի լրումն մուսուլմանական աշխարհի կրթական համակարգերի խորը փոփոխությունների: Այնպես որ այս ոլորտում երիտասարդ սերնդի ուղեղի ավելի քիչ արմատական վատնում կլինի:
