«Լեւադա կենտրոնի» անցկացրած սոցհարցումների համաձայն, ռուսաստանցիների հետաքրքրությունը Ուկրաինայի շուրջ ընթացող զարգացումների հանդեպ, շարունակական նվազումից հետո, սկսել է աճել։ Մայիսին ուկրաինական զարգացումներով հետաքրքրված է եղել հարցվածների 45 տոկոսը։ Ընդ որում՝ շատ ուշադիր հետեւել է 15, բավականին ուշադիր՝ 30 տոկոսը։ Ռուսական բանակին աջակցություն հայտնել է հարցվածների 74 տոկոսը։ Ընդ որում, 42 տոկոսը հայտարարել է, որ որոշակիորեն աջակցում է ռազմական գործողություններին, 32 տոկոսը հայտարարել է, որ ավելի շուտ աջակցում է ռազմական գործողություններին։
Իսկ հունիսին, մայիսի սոցհարցման համեմատ, այս ցուցանիշն աճել է 6 տոկոսով։ Ռազմական գործողություններին չի աջակցել հարցվածների 17 տոկոսը։ Անցյալ ամսվա համեմատ այս ցուցանիշը նվազել է 4 տոկոսով։ Սոցիոլոգներն արձանագրում են, որ ավելացել է այն անձանց տեսակարար կշիռը, ովքեր կողմնակից են ռազմական գործողությունները շարունակելուն։ Մայիսին այն կազմել է 30 տոկոս, մարտին՝ 6 տոկոսով պակաս։ Բանակցությունների օգտին հանդես է գալիս հարցվածների 60 տոկոսը։ Սակայն այս ցուցանիշը եւս սկսել է նվազել։ Հարցվածների 54 տոկոսի կարծիքով, հակամարտությունը կարող է վերաճել Ռուսաստան-ՆԱՏՕ դիմակայության։ Հակառակ կարծիքին է հարցվածների 31 տոկոսը։ Nezigar կայքի վերլուծաբանի կարծիքով, ուկրաինական պատերազմի նկատմամբ ուշադրության աճը պայմանավորված է ռուսական ռեգիոններին հաճախակի հասցված հարվածներով, որոնք իրականացվում են հրթիռների կամ ԱԹՍ-ների կողմից։ Հասարակության մեջ պատերազմը սկսել է արդեն ավելի ու ավելի շատ ընկալվել որպես գոյաբանական առճակատում, մինչդեռ, պատերազմի քաղաքական կարգավորմանը հավատացողների թիվը սկսել է նվազել։ Ուշագրավ է այն, որ հատկապես մեծ է հետաքրքրությունը թիկունքում կատարվողի, քան պատերազմական առաջնագծում ծավալվող մարտերի նկատմամբ։ Հասարակությունը նաեւ հոգնած է, հոգեբանորեն հյուծված՝ անկախ ամեն ինչից, որքան էլ իշխանությունները փորձում են ամեն կերպ համախմբված ներկայացնել։
