Գրել էինք, որ «Ապրելու երկիր» խմբակցությունը պատրաստվում էր Գյումրիում ավագանու արտահերթ նիստ հրավիրել՝ համայնքապատկան մանկապարտեզները անվճար դարձնելու հարցը քննարկելու նպատակով։ Նիստը կայանալու համար անհրաժեշտ է ավագանու անդամների առնվազն 11 անդամի ստորագրությունը: Նիստը չկայացավ, քանի որ ՔՊ-ն հավանություն չտվեց նախագծին, եւ ընդամենը 8 ավագանի ստորագրեց նախագիծը քննարկման դնելու համար նիստ հրավիրելու առաջարկությանը: Նիստը նախատեսվում էր հունվարի 8-ին: Նշենք, որ մոտ 2500 երեխայի մասին է խոսքը, որոնք հաճախում են համայնքապատկան մանկապարտեզներ, որոնց թիվն էլ Գյումրիում 22-ն է:
«Ապրելու երկիր» խմբակցության ղեկավար Կարեն Մալխասյանը hraparak.am-ի հետ զրույցում ասաց, որ ՔՊ-ն այդպես էլ որևէ հակափաստարկ չի ներկայացրել իրենց, թե ինչու չեն միանում նախաձեռնությանը:
«Ես մեկ անգամ ասել եմ, նորից կկրկնվեմ՝ դա իրենց ձեռագիրն է, իրենք չեն պահպանում ոչ մի գործընկերային հարաբերություն, ինչ ուզում, այն էլ անում են:Ինչևէ, տարին սկսել է, մենք շարունակելու ենք նույն ձևաչափով աշխատել, այսինքն՝ նորից նախագծեր ենք ներկայացնելու, իսկ թե իրենք կմիանան, թե չեն միանա, դա իրենց խնդիրն է:
Նշեմ, որ Նոյեմբերյան համայնքում, որտեղ համայնքի ղեկավարը «Ապրելու երկրի» անդամ է, արդեն որոշում են կայացրել եւ ընդունել, որ հունվարից մանկապարտեզներն անվճար են լինելու: Այսինքն՝ արդեն կա նախադեպը, որ կյանքի է կոչվել մեր քաղաքական ուժի կողմից նախաձեռնված: Իսկ մեր բերած նախագիծը Գյումրիում, լուրջ հիմնավորված էր, ֆինանսական աղբյուրը նշված էր, մեր գործընկերները մերժեցին, չուզեցին․․․: Ասել եմ ու էլի կասեմ՝ գյումրեցին այս ամենը տեսնում է, հասկանում եւ համոզված եմ՝ գնահատականը քվեի տեսքով կտա ընտրություններին»,-ասաց մեր զրուցակիցը:
Անդրադառնալով գարնանը Գյումրիում սպասվող արտահերթ ՏԻՄ ընտրություններին՝ «Ապրելու երկիր» խմբակցության ղեկավար Կարեն Մալխասյանը մեկ անգամ ևս վերահաստատեց իրենց դիրքորոշումը՝ ընդգծելով, որ ընտրությանը մասնակցելու նախնական որոշումը մնում է անփոփոխ․ «Մասնակցելու ենք՝ մեր կուսակցությունով, գիտեմ՝ շատերին հետաքրքրում է դաշինք կազմելու եւ չկազմելու հարցը, բայց ասեմ, որ նման հարց չի քննարկվել, առաջին իսկ օրվանից ինչ որոշում որ ունենք, այդ ձևաչափով էլ գնալու ենք ընտրության: Եթե որևէ բան փոխվի, միանշանակ, կտեղեկացնենք»,-նշեց Մալխասյանը :
