Հին բուրգը քանդել են, նոր բուրգ չեն կառուցել
Դատախազության հին աշխատակիցներից մեկն իրավապահ համակարգում տիրող իրավիճակը բնութագրեց որպես «աղետալի»։ Կոնկրետ դատախազությունում, օրինակ, 6 ամիս է՝ սպասողական վիճակ է․ ամեն օր սպասում են, որ գլխավոր դատախազ Արթուր Դավթյանին «գործից կհանեն», իսկ դա կաթվածահար է անում ողջ համակարգի գործունեությունը։ Բայց խնդիրը միայն դա չէ, այլ այն, որ «շունը տիրոջը չի ճանաչում», եւ պրոֆեսիոնալիզմի մակարդակն իջել է «պլինտուսից ցածր»։ Այնքան ցածր, որ շատ քիչ գործ են կարողանում քննել ու հանցանքն ապացուցել, դրանից շատ ավելի քիչ մասն է հասնում դատարան, իսկ դատարանում մեղադրանքն ապացուցելու մասին էլ չենք խոսում, որովհետեւ փաստաբանական կորպուսն այսօր ավելի գրագետ ու պատրաստված է, քան քննիչ-դատախազներինը, եւ գործերը քանդվում են աչքիդ առաջ։
Սրան գումարած նաեւ այն, որ պրոֆեսիոնալ կադրերի մեծ հոսունություն կա համակարգերում եւ թափուր տեղեր, որոնք չեն լրացվում։ Առհասարակ, իրավապահները կարծում են, որ իրենց աշխատանքը նսեմացնելու, վարկաբեկելու պրոցես է գնում, եւ այդ պրոցեսի գլխին օրվա իշխանությունն է կանգնած։ «Ճիշտ է՝ տարեկան մի քանի գործ եղել են քաղաքական, մի տասնյակի չափ էլ գուցե այլ գործոններով պայմանավորված են լուծվել, բայց տարեկան հազարավոր վճիռներ ու դատավճիռներ են կայացվել։ Չի կարելի մի ողջ համակարգի աշխատանքը ջուրը գցել՝ առանց կոնկրետ ապացույցների, միմիայն կասկածների հողի վրա»,- ասաց մեր զրուցակիցը։
Իսկ ո՞րն է իրավապահների մոտ այս շփոթի, կաթվածահարության պատճառը։ «Առաջ՝ լավ, թե վատ, ինչ-որ համակարգ կար, բուրգ էր գործում։ Բուրգը, համակարգը քանդել են ու տեղը ոչինչ չեն դրել։ Հիմա զանգեր էլ են արվում, հրահանգներ էլ են իջեցվում, սպառնում էլ են դատավորներին ու քննիչներին, նրանց նաեւ գաղտնալսում են ու նրանց դեմ կոմպրոմատներ են հավաքում, ուղղակի դա համակարգված չի արվում, եւ մարդիկ չեն կողմնորոշվում, թե ոնց պահեն իրենց»։
Կարծիքներ