Անցած շաբաթ տեղեկություն տարածվեց, որ Պետգույքի կառավարման կոմիտեի նախկին նախագահ, ՀՀԿ անդամ Արման Սահակյանը՝ Գալուստ Սահակյանի որդին ձերբակալվել է, ապա նրան մեղադրանք է առաջադրվել Քրեական օրենսգրքի փողերի լվացման հոդվածով։
Գործը վերաբերում է այն ժամանակահատվածին, երբ Սահակյանը եղել է Պետգույքի կառավարման կոմիտեի նախագահ, սա ըստ էության, նախկին քրեական գործի շարունակությունն է։ Ըստ իրավապահ մարմինների՝ Սահակյանը և ևս 12 անձ «2012-2015 թվականներին Երևանի 3 ուսումնական հաստատությունների զբաղեցրած տարածքների վերաճշտման պատրվակով, ապօրինի առանձնացրել են հողատարածքներ, որոնց հանցավոր ծագումը թաքցնելու նպատակով նշված անշարժ գույքերը ձևական աճուրդների միջոցով օտարել են իրենց հետ փոխկապակցված անձանց»: Վարույթի շրջանակում ձերբակալվել էր ևս 7 անձ, որոնց նկատմամբ դատարանի որոշմամբ տարբեր խափանման միջոցներ են ընտրվել: Այսպիսով, Սահակյանը ևս մյուսները մեղադրվում են պաշտոնեական լիազորությունները չարաշահելու, խոշոր չափի փողերի լվացման համար:
Մեզ հասած տեղեկություններով՝ 7 անձինք, որոնք առնչվում են այս քրեական գործին, պետգույքի կառավարման կոմիտեի նախկին աշխատակիցներն են, նրանցից մի քանիսն էլ՝ քաղաքացիներ, որոնք այս կամ այն հարցով առնչվել են կոմիտեի հետ։
Քննչական կոմիտեից հրաժարվում են անուններ հայտնել, մեղադրյալների նկատմամբ ընտրված խափանման միջոցների հետ կապված էլ փոխանցում են․ «Մեկ անձի նկատմամբ կիրառվել է գրավ և վարչական հսկողություն, մեկ անձի նկատմամբ՝ տնային կալանք, երկու անձի նկատմամբ՝ գրավ և տնային կալանք, երկու անձի նկատմամբ՝ վարչական հսկողություն, մեկ անձի նկատմամբ՝ վարչական հսկողություն և չբացակայելու արգելք»։
Նշենք նաեւ, որ Սահակյանի պաշտպանը` փաստաբան Էմին Խաչատրյանը ավելի վաղ մեզ հետ զրույցում մեղադրանքի հետ կապված ասել էր․ «Մեղադրանքը բացահայտ անհիմն է, տարան դատարան, որպեսզի կալանավորեին, դատարանը վարչական հսկողություն կիրառեց, այսինքն` չկալանավորեց։ Մեղադրանքի բովանդակությանը չեմ կարող անդրադառնալ, ես ասում եմ` փողերը չի լվացել, այդ մեղադրանքն ակնհայտ անհիմն է, նույնիսկ` անհասկանալի»։
Ի դեպ, Արման Սահակյանի նկատմամբ նաեւ ապօրինի ձեռքբերված գույքի առգրավման վարույթ հարուցվեց, սակայն Սահակյանին եւ նրա փաստաբաններին հաջողվել էր ապացուցել այդ գույքի ձեռքբերման օրինականությունը եւ վարույթը կարճվել էր: Ինչպես տեսնում ենք` իշխանությունը երբ ինչ որ մեկին իր նշանառության տակ է առնում, ամեն կերպ փորձում է հասնել նպատակին:
