«Հանրապետություն» կուսակցության նախագահ Արամ Սարգսյանն այսօր դիմեց ԿԸՀ, որպեսզի «Ուժեղ Հայաստան» կուսակցության մասնակցությունն առաջիկա ընտրություններին կասեցվի: Նա իր հարցազրույցներում բազմիցս կոչ է արել իշխանություններին՝ թույլ չտալ իր խոսքով` «Ռուսաստանի շահերը ներկայացնող Սամվել Կարապետյանի հիմնադրած ու գլխավորած ուժի մասնակցությունը», սակայն երեկ Հանրայինի եթերում ընտրությունների մասնակից ուժերի առաջին դեմքերի մասնակցությամբ բանավեճի ընթացքում Փաշինյանի հորդորներին ի պատասխան նախ խոստացավ դիմել ԿԸՀ, ապա փոշմանեց՝ ասելով, որ դա ոչ այնքան իր խնդիրն է, այլ ԱԱԾ-ի։ Բայց փաստորեն, Փաշինյանի գրպանային ընդդիմության առաջնորդն անկարող է եղել չկատարել «շեֆի» հորդորը։
Մենք զրուցեցինք նախկին դատախազ, իրավաբան Րաֆֆի Ասլանյանի հետ:
Նա մեզ հետ զրույցում ասաց. «Երեկ Արամ Սարգսյանը փաստորեն իր վերադասից նման հրահանգ ստացավ` բանավեճի ժամանակ, և դա չկատարել, պարզապես, չէր կարող: Այն, որ Արամ Սարգսյանը Փաշինյանի կցորդն է, դա կարծում եմ ցանկացած մտավոր նվազագույն ծավալ ունեցող մարդ գիտակցում ու տեսնում է: Ես չգիտեմ, թե Արամ Սարգսյանի նպատակը որն է, նա, լինելով սպարապետի եղբայրը, քծնում է մեկին, ով հանձնել է հայրենիքը: Այս մարդու համար իր նեղ անձնական շահերը, փաստորեն, թանկ են իր հայրենիքից: Ամեն դեպքում այն, ինչ արվում է, արվում է Փաշինյանի ուղիղ ցուցումով: Սամել Կարապետյանի ուժին արգելել ընտրություններին մասնակցելուց, չկա որևէ իրավական հիմք: Այլ հարց է, որ Փաշինյանը քարոզարշավի ավարտական փուլում հասկացել է, որ պարտվելու է, իսկ Սամվել Կարապետյանի ուժն ամենալուրջ ընդդիմադիր քաղաքական ուժն է: Երբ խոսում ենք Մոլդովայի օրենքների մասին, ապա պետք է նշել, որ Մոլդովայի օրենսդրությունն ու ԿԸՀ-ին վերապահված լիազորությունները լրիվ այլ էին: Չկան օրենսդրական հիմքեր մեր պարագայում, իսկ ընտրական խախտումները կարող են հիմք հանդիսանալ բացառապես քրեական վարույթների համար, բայց կա անմեղության կանխավարկածի խնդիր: Նախ պետք է լինեն վճիռներ, որպեսզի կարողանան արգելել քաղաքական ուժին: Ես, իհարկե, հասկանում եմ, որ հայաստանյան բոլոր կառույցները դարձել են Նիկոլ Փաշինյանի կուսակցական շտաբերը, և կատարում են իրենց ղեկավարի քաղաքական հրահանգները ու հարկ եղած դեպքում 40 քրեական գործ էլ կսարքեն, դա իրենց համար խնդիր չէ, բայց այս պահի դրությամբ ոչինչ անել չեն կարող: Հասարակության աչքին են թող փչում»:
- Իսկ քրեական վարույթները և առավոտյան ձերբակալություններն ինչի՞ համար էին:
- Նա ձերբակալում է այն մարդկանց, ովքեր վերջին 6 տարվա ընթացքում տասն անգամ ձերբակալվել ու ազատ են արձակվել: Երբ իրեն ասում են, որ իր խոստումները չի կատարել, նա կարծում է, որ մարդկանց բանտարկելով կարող է հանրության աչքին թոզ փչել, բայց դա այդպես չէ: Հասարակության գիտակից զանգվածը նրա կապիկություններին վաղուց չի հավատում: Երկիրն այնպիսի վիճակի է հասցրել, որ երկրի թիվ մեկ հանցագործն այդ ինքն է:
- Բայց նա ընդամենը վարչապետ է, այլ ոչ թե դատական իշխանության ղեկավար:
- Նա մոռացել է, թե ինքը ով է: Նա կարծում է, որ Կառավարությունն էլ է ինքը, օրենքն էլ է ինքը: Չի հասկանում, թե ինքը ով է ի վերջո: Երեկ էլ կարդաց Սամվել Կարապետյանի դատավճիռը: Աստված մի արասցե, եթե այսպես շարունակվեց, շուտով կկարդա Հայաստանի դատավճիռը:
