Ռոսսելխոզնադզորը մայիսի 30-ից և հունիսի առաջին օրերից փուլային սահմանափակումներ է մտցրել Հայաստանից մի շարք գյուղմթերքների՝ այդ թվում լոլիկի, վարունգի, պղպեղի, ելակի, ինչպես նաև կեռասի, ծիրանի, դեղձի, խաղողի և այլ ապրանքների ներմուծման նկատմամբ։ Սահմանափակումների հետևանքով ծանր վիճակում են հայտնվել ոչ միայն գյուղմթերք արտադրողները, այլ նաև բեռնափոխադրողները։
Վարորդներից մեկի խոսքով՝ եթե նախկինում Ռուսաստանից վերադառնալիս հայկական ֆուռերը բեռ էին վերցնում` դատարկ չէին գալիս եւ դա էլ էր իրենց որոշակի եկամուտ ապահովում, ապա այժմ ռուսական ընկերությունները հրաժարվում են իրենց արտադրանքը վաճառել հայկական կողմին եւ Ռուսաստանից Հայաստան եկող բեռներն էլ են զգալիորեն կրճատվել։ Արդյունքում հայկական ընկերությունները հայտնվել են երկկողմ ճնշման տակ․ դժվարացել է թե՛ արտահանումը Ռուսաստան, թե՛ ներմուծումը Ռուսաստանից, իսկ բեռնատարները հաճախ ստիպված են վերադառնալ դատարկ։
