Ընտրությունների մեկնարկը կտրվի, ամեն մարդ իր տրամադրություններին հատուկ կգնա-կքվեարկի. Վանաձորի համայնքապետ

Հունիսի 21-ին նախատեսված արտահերթ խորհրդարանական ընտրությունների թեմայով «Հրապարակ» թերթը զրուցել Վանաձոր համայնքի ղեկավար Մամիկոն Ասլանյանի հետ։

- Պարո՛ն Ասլանյան, ձեր համայնքում ի՞նչ իրավիճակ է, արդեն արտահերթ ընտրությունների տրամադրություններ կա՞ն։

- Կոնկրետ ես չեմ նկատել։

- Ձեզ հետ արդեն կապ հաստատե՞լ են այդ թեմայով։

- Ի՞նչ է նշանակում կապ հաստատել։ 

- Դե որ նախապատրաստվեք։

- Չէ, դա մեր ֆունկցիոնալ պարտականությունների մեջ է մտնում։ Մեզ որևէ մեկը պետք չի, որ ասի, նախապատրաստվենք։ Երբ որ ընտրությունների մեկնարկն այսպես ասած կտրվի, այդ ժամանակ մենք, ըստ Ընտրական օրենսգրքի, մեր գործառույթները կիրականացնենք։ Այս պահին որևէ նախապատրաստություն, նույնիսկ ինչ-որ տրամադրություններ չկան։ Նույնիսկ նմանատիպ խոսակցության էլ ականատես կամ ականջալուր չեմ եղել։

- Փորձո՞ւմ են իշխանությունները Ձեզ վրա ճնշում գործադրել, օրինակ՝ մարդ հավաքելու համար։

- Ոչ։ Ոչ ոք այդպիսի բան չի կարող։

- Երկրում իրավիճակի հետ կապված ի՞նչ գնահատականներ ունեք։

- Դրանք քաղաքական պրոցեսներ են, որոնք Սահմանադրության, գործող օրենքի շրջանակներում պիտի որ լուծում ստանան։ Իմ գնահատական այնքան է, որքանով որ տեսանելի։

- Իսկ ընտրությունները կթուլացնե՞ն իրավիճակը կամ լուծում կհանդիսանա՞ն։

- Նայած ինչ հանգուցալուծում կստանա, նայած ինչ իրադրության մեջ կանցնեն ընտրությունները։ Ահագին բանից է կախված։ Որևէ մեկը միանշանակ «այո» կամ «ոչ» ասել չի կարող։ Ըստ էության, սա է հանգուցալուծման միակ տարբերակը, տեսնենք, կանխատեսումներ չունեմ։

- Արդեն որոշե՞լ եք՝ որ ուժին կսատարեք։

- Բայց Դուք, օրինակ, գիտե՞ք՝ որ ուժերն են մասնակցում կամ ե՞րբ են ընտրությունները։ Ընտրությունների մեկնարկը կտրվի, ամեն մարդ իր խղճի մտոք, իր քաղաքական հայացքներին կամ տրամադրություններին հատուկ կգնա-կքվեարկի։ Այս պահին անկեղծորեն որևէ բան չեմ կարող ասել, որովհետեւ ինձ համար գոնե հասկանալի չէ որևէ բան։